Hər il olduğu kimi, bu il də şəhərimizdə Kitab bayramı keçirilib. Bu dəfəki tədbir Sumqayıtın 75 illik yubileyinə təsadüf edib. Əli Kərim adına Poeziya Evində "Qanun” nəşriyyatının təşkilatçılığı və Mədəniyyət Nazirliyinin dəstəyi ilə təşkil olunan 6-cı Mili Kitab sərgisi may ayının 9-da 12-dək davam edib. Rəngarəng çıxışlar, yazarların imza günləri, oxu saatları, Azərbaycan, rus, türk və ingilis dillərində endirimli nəşrlərin satışı, bir-birindən gözəl proqramlar, istedadlı insanlarla, kitab müəlliflərilə canlı görüşlər, musiqi kollektivlərinin ifaları və s. sərgi boyu davam edib. Sumqayıt ziyalıların, kitab oxuyanların şəhəri olduğu üçün burada alıcıların, kitabsevərlərin fəallığı hiss olunub. Ölkənin ən aparıcı nəşriyyatları və müəllifləri bu tədbirə qatılıblar.
Sumqayıtlı şair və yazıçılara da ayrılan bir saat vaxt ərzində təşkil olunan görüşü yazıçı Əyyub Qiyas açaraq hər kəsi salamlayıb.
Azərbaycan torpaqları uğrunda canlarını fəda etmiş Vətən oğullarının xatirəsi anılıb.
Azərbaycan Yazıçılar Birliyi Sumqayıt bölməsinin sədri Gülnarə Cəmaləddin tədbirin mahiyyətindən və əhəmiyyətindən söz açaraq belə görüşlərin şəhərimizin yubileyinə bir töhfə olduğunu vurğulayıb. Sonra söz qələm adamlarına və qonaqlara verilib. Rafiq Yusifoğlu,Əyyub Qiyas, İbrahim İlyaslı, Aygün Yaşar, Elvin Əlizadə, Lilpar Cəmşidqızı, Hikmət Fərzəli, Qəşəm Nəcəfzadə, Esmira Günəş və başqaları şəhərimizə həsr olunmuş şeirlərini oxuyublar.
Bir sözlə, hər kəsin marağına səbəb olan sərgi əsl kitab bayramına çevrilib.
İlhamə Məhəmmədqızı
Xəbərdən istifadə edərkən istinad etmək vacibdir.
