AYB Sumqayıt Bölməsi və N.Nərimanov adına şəhər Mədəniyyət Evinin birgə təşkilatçılığı ilə şair-qəzəlxan Lilpar Cəmşidqızının şəhidlərə həsr etdiyi "Zəfəri yaşadanlar” adlı kitabının təqdimat mərasimi keçirilib.
Xeberle.com xəbər verir ki, burada şəhid anaları, şəhər ictimaiyyətinin nümayəndələri və ziyalılar iştirak ediblər.
Tədbirin moderatoru AYB-nin poeziya seksiyasının rəhbəri, Poeziya Evinin direktoru İbrahim İlyaslı hər kəsi salamladıqdan sonra kitab haqqında geniş məlumat verib.
Şumqayıt şəhər İcra Hakimiyyətinin Humanitar məsələlər üzrə şöbəsinin müdiri Fərman Kazımov, Şəhid analarına dəstək ictimai birliyinin rəhbəri Ceyran Axundova, Ağsaqqallar şurasının sədri Təbrik Quliyev, filologiya elmləri doktoru, professor Rafiq Yusifoğlu, AYB Sumqayıt bölməsinin sədri Gülnarə Cəmaləddin, şair-qəzəlxan Əhməd Haqsevər, şair Fəxrəddin Meydanlı, şəhid anaları çıxış edərək bu mövzuda kitabların yazılmasının günümüz üçün əhəmiyyətindən danışıb, belə ağır missiyanı öz üzərinə götürərək bu cür kitab araya-ərsəyə gətirdiyi üçün Lilpar xanıma təşəkkür ediblər. Bədii qiraətçi Arzu Heydərovanın ifasında səslənən Lilpar Cəmşidqızının şeirləri məclisə başqa bir ovqat bəxş edib. Tədbirdə Əhməd Bakıxanov adına musiqi məktəbinin müəllimi, xanəndə Firudin Ağayev müəllifin qəzəllərindən ibarət muğamları ifa edib.
Sonda Lilpar xanım kitabı imzalayaraq şəhid ailələrinə təqdim edib və xatirə şəkilləri çəkdirilib.
Xəbərdən istifadə edərkən istinad etmək vacibdir.
