Taleyinə-qismətinə dünyalarca sevdiyi Odlar Yurdu düşən və xalqımızı özünə hər zaman etibarlı arxa-dayaq bilən, elə özü də bu xalqın ayrılmaz bir üzvü, sədaqətli oğlu olan Giya Paçxataşvili ilə bu görüş üç əlamətdar məqamla bağlı idi – ömrünün heç də qayğısız yaşanmamış 55 illiyi, haqqında yenicə çapdan çıxmış monoqrafiya-oçerk xarakterli "Dərviş” kitabı ilə və bir də bütün dövrlərdə dünyada özünün qonaqpərvərliyi və beynəlmiləlçiliyi, tolerantlığı ilə seçilən ölkəmizdə bu ilin "Multikulturalizm ili” elan olunması ilə.

Sumqayıtın 45 yaşlı Əli Kərim adına Poeziya Klubunun və şair-alim Qiymət xanım Məhərrəmlinin təşəbbüsü, şəhərin S.Vurğun adına Mərkəzi Kitabxanasının təşkilatçılığı ilə keçirilən görüşdə özünü "dərviş”, "yetim gürcü” adlandıran Giyanın qələm dostları ilə yanaşı təhsil, mədəniyyət və incəsənət adamları, çoxsaylı oxucular və mətbuat nümayəndələri də iştirak etmişlər.

Tanınmış şair, Ə.Kərim adına Poeziya Klubunun sədri, Prezident mükafatçısı İbrahim İlyaslı qələm dostu Giya Paçxataşvilinin yaradıcılığından söhbət açaraq, onun həm istedadlı şair, həm də tərcüməçi kimi Azərbaycan, gürçü və rus dillərini mükəmməl bilərək xalqımızın poeziya nümunələrinin tərcüməsi sahəsində fəaliyyətini yüksək dəyərləndirmişdir.

Görüşün təşəbbüskarlarından olan istedadlı şairə, filoloq-alim, Azərbaycan Milli Elmlər Akademiyasının Folklor İnstitutunun böyük elmi işçisi, "Dərviş” kitabının müəllifi Qiymət xanım Məhərrəmli Giyanın həyat və yaradıçılığı haqqında tədbir iştirakçılarına daha geniş məlumat vermişdir. "Yetim gürcü”nü az-çox tanıyan qələm dostlarına da aydın olub ki, hələ dünyaya gəlməsinə bir-neçə ay qalmış atasını itirən Giya, bu faciə azmış kimi sonradan ana nəvazişindən də məhrum olmuş, doğulduğu Qax rayonundan əvvəlcə Gəncə uşaq evinə, sonradan isə Bakıya göndərilmişdi.

Vətəni Azərbaycanın diqqət və qayğısı ilə böyüyən Giya hələ məktəb illərində idman komandasının tərkibində hətta xarici ölkələri – Çexoslovakiyanı, Macarıstanı və Bolqarıstanı da gəzib-görmüşdü. Ata-ana talesizliyinə, görmə zəifliyinə baxmayaraq, oxumağı-öyrənməyi özünün həyat tələbinə çevirmiş bu "ağ oğlan” öz inadı, qətiyyəti ilə orta məktəbi rusca, həm də müvəffəqiyyətlə bitirərək, 1980-ci ildə Azərbaycan Dövlət Universitetinin jurnalistika fakültəsinə daxil olmuşdu. İki il sonra isə istedadının, təhsildəki uğurlarının nəticəsi olaraq o, M.Lomonosov adına Moskva Dövlət Universitetyinə göndərilmişdi. Vətənin etimadını doğruldan "ağ tələbə” həmin nüfuzlu Universiteti fərqlənmə diplomu – "qırmızı diplomla” bitirərək, doğma Azərbaycana üzüağ qayıtmış, müxtəlif mətbuat orqanlarında jurnalist fəaliyyəti ilə yanaşı ara-sıra poeziya ilə, tərcüməçiliklə də məşğul olmağa başlamışdı.

İllər keçdikcə ağ-bəyaz, uca görkəmi ilə sanki "gürcü Dədə Qorqudu”na bənzəyən Giyanın poetik istedadı diqqəti cəlb edir və onun şeirləri, tərcümələri tezliklə qəzet-jurnal səhifələrinə yol tapır. Diqqətəlayiqdir ki, bugünə kimi o, Azərbaycan şair və yazıçılarının 30-dan artıq kitablarını rus və gürcü dillərinə tərcümə etmişdir. Özünün isə Azərbaycan dilində "Sükutun rəngləri”, "Oğul ata itirdi”, "Son - əvvələ gedən yol”, rusca isə "Элегия”, "Грузинский хор” və "Я уверен” kitabları çapdan çıxmışdır. Təsadüfi deyil ki, məhsuldar və dəyərli yaradıcılıq fəaliyyətinə görə şair son 10 il ərzində Həsən bəy Zərdabi və "Ümid yeri” mükafatlarına, "Səməd Vurğun” yubiley medalına layiq görülmüşdür.

Azərbaycan Yazıçılar Birliyinin Sumqayıt şəhər şöbəsinin sədri şair Sabir Sarvan öz çıxışında onu da diqqətə çatdırmışdır ki, Giya Paçxataşvili yeganə şair-tərcüməçilərdəndir ki, Azərbaycanın yetirdiyi "beynəlmiləl bir istedad” kimi üç ölkənin – Azərbaycanın, Gürcüstanın və Rusiyanın Yazıçılar Birliklərinin üzvüdür. O, həm də Azərbaycan Jurnalistlər Birliyinin üzvü kimi də səmərəli yaradıcılıq fəaliyyəti göstərir.

Görüşdə çıxış edənlər – filologiya elmləri doktoru, tənqidçi Vaqif Yusifli, Azərbaycan Teatr Xadimləri İttifaqının üzvü, Respublikanın Əməkdar incəsənət xadimi, Gənc Tamaşaçılar Teatrının quruluşçu rejissoru Ağalar İdrisoğlu, "Xalq qəzeti”nin şöbə müdiri İlham Abbasov, şairlərdən Etibar Qərib, Giyanın Qaxdan olan jurnalist həmyerlisi Nüyvər Şərifova, "Borçalı” qəzetinin əməkdaşı İlhamə Məhəmmədqızı, Sumqayıt Mərkəzi Kitabxanasının müdiri Yeganə Əhmədova və digərləri Giyanın həm şair-tərcüməçi, həm jurnalist, həm də gözəl və dəyərli, xeyirxah və humanist bir insan kimi yüksək mənəvi keyfiyyətlərindən danışmış, onun Azərbaycan və Gürcüstan arasında vaxtilə görkəmli ədəbiyyatşünas alim, tərcüməçi, nüfuzlu elm xadimi Leyla Eradzenin yaratdığı mənəvi-ədəbi əlaqələrin bu gün də uğurla davam etdirilməsində mühüm rolu olduğunu bildirmiş və yubilyara yeni yaradıcılıq uğurları arzulamışlar.

Görüşdə ömür-gün yoldaşı, həyatının mənası bildiyi Lamara xanımın dünyadan vaxtsız köçməsinin ağri-acısını bu gün də yaşayan Giyanın saf məhəbbətindən də söhbət açılmış, onun xatirəsinə gürcü "Məcnun”-şairin həsr etdiyi şeirlərin böyük sevgi haqqında bitib-tükənməyən ayrılıq nəğmələri, lakin qismətinə bu cür tale düşənlər üçün nümunə ola biləcək nikbin, işıq dolu nəğmələr olduğu da qeyd edilmişdir.

Tədbirin sonunda çıxış edən Giya görüşün təşkilində əməyi olan hər bir təşkilata və hər kəsə, o cümlədən Sumqayıt şəhər rəhbərliyinə, Mədəniyyət şöbəsinə və son illərin ağır sınaqlarından qeyrətlə, mərdliklə çıxmış bütün sumqayıtlılara öz təşəkkürünü, minnətdarlığını bildirmişdir.

Rəhman ORXAN.