Həmsöhbətim tanınmış yazıçı Varis Yolçiyevdir.

Salam, xoş gördük, Varis müəllim. Necəsiniz?
- Mən həmişə bu sualı belə cavablandırıram - yaxşı olasınız həmişə.
Özünüzü necə hiss edirsiniz?
- Doğrusu, çox yorğun və üzgünəm. Bu il mənimçün olduqca məhsuldar, çox ağır iş rejimin olub.
Oxuculara və sizi sevənlərə özünüzü necə təqdim edərdiniz?
- Uzun bir yolun başlanğıcında dayanan şəxs.
Yazmağa nə vaxtdan başlamısınız?
- Əslində, 5 yaşımda ilk dəfə kağız və qələm məni özünə çəkib, şeir yazmışam. Şeir belə idi:
                      Həyətdə bir uşaq var, ağlayır, hey ağlayır.
                       Çıxdım dedim, neyçün sən
                       Ağlayırsan, ay uşaq.
                       Mənə dedi, məgər sən
                       Bilməyirsən ki, bunu
                       Daha yetim olmuşam?..
 
İlk yazdığınız əsər, yaxud roman necə adlanıb və nə vaxt ərsəyə gəlib?
- Nəşrə də uşaq yaşlarından başlamışam, təxminən 12-13 yaşımda hətta povest də yazmışam. Ancaq ilk ciddi işim hekayələrim olub. Tələbəlik illərində ilk hekayələrimi yazmışam, onları oxuyan xalq yazıçımız İsmayıl Şıxlının xeyir-duası ilə ədəbiyyata gəlmişəm.
Nədən bəhs edirdi o hekayələr?
- İlk hekayələrim həyatda özünü axtaran insanlardan bəhs edirdi. Çünki bəzən insan yaşayıb ömür sürür, amma özünü tapa bilmir, öz həyatını yaşaya bilmir...
Bəs ən axırıncı yazdığınız roman nədən bəhs edir və necə adlanır?
- «Son məktub» adlı romanım 2013-cü ilin son günlərində işıq üzü görüb. Bu roman günahla günahsızlığın şiddətli mübarizəsi barədədir.
Axırıncı romanınız digərlərindən nə ilə fərqlənir?
- Bu roman fikir romanıdır, digərləri isə hərəkət romanlarıdır.
Oxucu kütlə hər hansı bir yazıçının romanını oxuyanda birinci nəyə fikir verməlidir? Eyni zamanda romanın maraqlı olması üçün yazıçı nə etməlidir?
- Hər oxucunun öz fərqli ovum və bəyənmə kriteriyaları var, yazıçının isə borcu oxucunun tələbini ödəmək, zövqünü oxşamaqdır.
Bildiyimiz kimi, siz ilin ən yaxsı yazıçısı seçildiniz. Bu, əlbəttə, çox qürur duyulası bir faktordur. Bəs bu titul sizə nə verdi və buna münasibətiniz necədir. Ümumiyyətlə, düşünürsünüzmü ki, bu təltifə layiqsiz?
- İlin ən yaxşı yazıçısı seçimini hansı qurum edibsə, əslində bundan heç xəbərim olmayıb. Mən Azərbaycan hökumətinin ali ədəbiyyat və Avrasiya yazarlar qurumunun mükafatlarını qazandım. Bir də, ölkədə ən çox kitabları satılan azərbaycanlı yazıçı elan edildim.
Artıq iki kitabınız Türkiyədə çap olunub, bilmək maraqlı olardı, hansı kitablardır? Ümumiyyətlə, bu kitablarınızı başqa ölkələrdə çap etdirmək fikiriniz var?
- Mənim Türkiyədə "Sənə inanıram” və "Yetmış yeddinci gün” romanlarım nəşr edilib. Eləcə də, Özbəkistanda "Sonuncu ölən ümidlərdir” və "Sənə inanıram” adlı romanlarım işıq üzü görüb. Kitabları başqa ölkələrdə nəşr etdirmək anlayışı dünyada yoxdur. Naşirlər sənin barədə eşidir, kitablarınla tanış olur və onları nəşr edirlər. yaxud da sən nümunə üçün əsərlərindən tərcümə edilmiş parçaları göndərirsən, onları bəyənirlərsə, nəşr edirlər, reallıqda bax, belə olur. Mənim romanlarıma maraq göstərən bir neçə ölkə var hazırda, daha yaxın görünən ABŞ-dır. Çox güman ki, əlverişlı qonorar şərtləri müqabilində bu ölkədə kitabım çıxsın.
Kitablarınız hansı dillərə tərcümə olunub?
- İngilis, rus, Türkiyə türkcəsi, özbək.
Sizcə, bir roman yazmaqla tanınmış yazıçı olmaq olarmı?
- Əlbəttə, olar. Xalid Hüseyni bir romanla - "Çərpələng uçuran”la  məşhur oldu.
Kitab oxumağı sevirsiniz?
- Təbii ki, sevirəm. Məncə, yaxşı yazıçı olmaq istəyən öncə yaxşı oxucu olmalıdır.
Axırıncı dəfə oxuduğunuz kitab hansıdır?
- Hazırda həm Mişa Selimovıçın "Dərvış və ölüm”, həm də Sərdar Özkanın "Kayıp gül” romanlarını oxuyuram.
Sizcə, yaxşı yazıçı olmaq asandır?
- Hər işdə yaxşı olmaq çox çətindir. Yazıçılıqda isə bu, xüsüsən nəzərə alanda ki, bədii ədəbiyyat beyinə informasiyadan daha üstün daxil olur, yaxud populyar yazıçı yüz minlərlə insana öz obrazları ilə həyat nümunəsi göstərir, onda bu işin çətinliyini və məsuliyyətini dərk etmək olar.
Siz hər hansı bir əsər, yaxud konkret bir obrazla bağlı ideyanı haradan götürürsünüz?
- İdeyalar süjetlərdən gəlir, süjetləri isə həyatdan götürürəm.
Hadisə və ya ideya ilə rastlaşmaq üçün mətbuatı izləyirsinizmi? Axı indi elə qəribə xəbərlər oxuyuruq ki, işləsən, bəlkə də bir əsərdir…  

- Ümumiyyətlə, medianı izləyirəm. Əsər üçün süjeti isə heç vaxt axtarmıram, o, adətən, özü gəlib məni tapır.
Hazırdv əlinizdə yazdığınız, yaxud işləmək istədiyiniz əsər varmı?
- Azərbaycanda 8-ci romanım çıxdı. "Son məktub”. Ertəsi gün seçim etdim ki, 9-cu romanım necə adlanacaq. Açığı, mənim üçün mövzu qıtlığı yoxdur, tükənmək təhlükəsi də hiss etmirəm, içimdə hələ demək istədiyim çox sözlər qalıb.
Ümumiyyətlə, yaxşı roman yazmaq üçün yazıçıya birinci növbədə nə lazımdır, nə kimi amil o romanı maraqlı və oxunaqlı edə bilər?
- Bestseller yazmağın qızıl qaydaları var. Maraqlı süjet, sadə dil, lakoniklik, hədsiz dramatizm, reallıq illüziyası yaratmaq.
Oxucunun zövqünə görə yazmaq lazımdır, yoxsa yazıçı öz üslubunda yazsa daha yaxşı olar?
- Yazıçı öncə oxucuların arxasınca getməlidir ki, sonradan onları öz ardınca apara bilsin.
Özünüzü tanınmış yazıçı hesab edirsiniz?
- Mənim hesab etməyimdən asılı olmadan, deyə bilərəm ki, mən tanınmış yazıçıyam, tirajım, xarici uğurlarım, kitablarımın satılma faizi, aldığım on minlərlə oxucu rəyləri öz sözünü deyir. Siz sualı belə qoyun, özünüzü yaxşı yazıçı hesab edirsinizmi? Mən də deyim ki, bütün qazandığım uğurlara rəğmən özümdən razı deyiləm əsla. Hələ öz üzərimdə hey işləməli və işləməliyəm. İnsan özündən razı olanda tükənir. Əsl uğurlar hələ bundan sonra olacaq.
Sizi necə təqdim etməyi istərdiniz, tanınmış yazar, yoxsa kifayət gədər tanınan yazıçı?
- Məni Varis kimi təqdim edin. Sadəcə, Varis.
Maariflənmək, savadlı olmaq, əlavə biliyə yiyələnmək üçün bizə mane olan nədir?
- Tənbəllik.
Yaxşı əsər yazıb ortaya çıxarmaq üçün yazıçıya nə qədər vaxt lazımdır?
- Bu, yazıçıdan asılıdır. Mən təqribən 8 aya bir roman yazıram. 10 ilə bir roman yazan da var, 3 aya yazan da.
Gənclər niyə kitabxanaları ziyarət etmir? Gənclərimiz niyə kitab oxumaqdan qaçırlar? Hətta saatlarla kompüter arxasında oturmağı kitab oxumaqdan üstün tuturlar…
- Məncə, kitaba həvəsli kifayət qədər gəncimiz var. Son dövrlər bizdə kitaba sevgi artib, bu, məni sevindirir. Kompüter isə tək bizdə deyil, bütün dünyada gəncləri daha çox özünə çəkir.
Kitab təqdimatları keçirirsiniz?
- Mən son vaxtlar kitab təqdimatı deyil, mütəmadi imza günləri keçirirəm. Amma arada təqdimatlar da olur. Bu, daha çox xaricdə dərc edilən kitablarla bağlı olur.
Bu yazıçılıqla sevərək məşğul olursunuz, yoxsa maddi maraq üçün yazırsınız?
Hər kəs həyata öz rolunu oynamağa gəlir, mənin rolum yazıçılıqdır.
Oxucularla ünsiyyətdə olmaq sizin üçün nə dərəcədə önəmlidir?

- Sosial şəbəkələrdə oxucularımla ünsiyyətdə oluram, kitablarımda telefon nömrələrim, elektron ünvanım var. Məncə, yazıçı oxucuları ilə ünsiyyətdə olmalı, onları tanımalıdır ki, ortaya sevilən əsərlər qoya bilsin.
Sizcə, insan öyrənə-öyrənə adam ola bilər?
- Bəlkə adam öyrənə-öyrənə insan olur?
Xoşbəxtlik sizin üçün nədir? Ümumiyyətlə, özünüzü xoşbəxt insan hesab edirsiniz?
- Xoşbəxtlik arzuların son həddidir, amma insan o həddə heç vaxt çata bilməz.
Gənc yazıçılara tövsiyələriniz və məsləhətləriniz...
Daha çox mütaliə etsinlər, daha işgüzar olsunlar, daha çox insanlar arasında olsunlar, ölkələr gəzsinlər… Sevməyi bacarsınlar. Dərk etməyə çalışsınlar. Amma hər halda, yazıçılıq üçün bunlar bir yana, əsas şərt istedaddır.
Gələcək fəaliyyətinizdə sizə uğurlar arzu edirəm və bir daha xoş və səmimi söhbətə görə təşəkkür edirəm.
- Çox sağ olun.
 

Leyla Namazova, starxeber.az