S.Vurğun adına Sumqayıt şəhər Mərkəzi
Kitabxanasında Azərbaycan Yazıçılar Birliyinin üzvü, respublikanın Əməkdar
jurnalisti, yazıçı-publisist Eyruz Məmmədovun yeni kitabının - "Sən
kimsən, Armando?" adlı romanının müzakirəsi keçirilib.
Özünün dramatik gərginliyi ilə
oxucunu sonadək intizarda saxlayan, ona dünyanın acılıqları, gözlənilməz
"sürprizləri" fonunda həyatın ən adi sayıla bilən töhfələrini,
şirinliklərini qiymətləndirməyi bacarmağı təlqin edən əsər o qədər güclü ədəbi-psixoloji
təsirə malikdir ki, görüşə gələnlərin çoxu tədbirin aparıcısı, respublikanın
Əməkdar Mədəniyyət işçisi, şair Əşrəf Veysəllinin, sonra isə Eyruzun "proloq" çıxışlarını
diqqətlə dinləsələr də, sanki intizarla müəllifi suallar "topuna"
tutacaqları məqamı gözləyirdilər. Bir-birinin ardınca "yağdırılan"
şifahi və yazılı suallara istedadı kimi mütaliəsi də güclü olan, dünya
ədəbiyyatını və Azərbaycanın klassik, həm də müasir ədəbiyyatını dərindən bilən
Eyruz Məmmədovun cavabları elə maraqlı olurdu ki, oxucu elə bil yazıçının
mənəvi dünyası və həyat fəlsəfəsi ilə yenidən və daha dərindən tanış
olurdu.
Görüş zamanı suallardan imkan edib çıxış etmək fürsəti tapanlar - şəhərin
tanınmış ziyalısı, maraqlı müdrik-fəlsəfi düşüncələri ilə "statusman"
ləqəbi qazanmış doktor Hümbət Quliyev, şairlərdən Zirəddin Qafarlı, Rafiq Oday,
Asif Asiman, Mərkəzi Kitabxananın baş direktoru, Əməkdar Mədəniyyət işçisi
Yeganə Əhmədova, veteran jurnalist Zümrüd Baloğlanova, tarixçi Fazil İmanov,
Sumqayıt şəhər Qarabağ Veteranları və Əlilləri Cəmiyyətinin sədri,
"Tərəqqi" medallı Tərlan Hacızadə, kitabın redaktoru, yazıçı Arif
Ərşad və digərləri əsərdə kitabxanaçı qızın üzləşdiyi çətinliklər və yaxşı
adamların, o cümlədən mərd, qeyrətli nişanlısının köməkliyi ilə problemlərdən,
müsibətlərdən yaxa qurtarıb, azad olması ilə bağlı müəllifin həyati erpizodları
inandırıcı şəkildə vermək bacarığını, yazıçı istedad və təxəyyülünü yüksək
qiymətləndirmişlər.
Görüşdə Eyruz Məmmədovun görkəmli
Azərbaycan kino-rejissoru, mərhum Davud İmanovla birgə sovetin ideoloji baryerləri
şəraitində çəkdikləri çox unikal, SSRİ dövründə böyük cəsarət, mərdlik,
qətiyyət, prinsipiallıq, ən başlıcası isə - əsl vətənpərvərlik tələb edən
"Sumqayıtın əks-sədası" tarixi filmi, həmçinin onun erməni faşizmini,
siyasi riyakarlığını, işğalçılıq niyyətlərini ifşa edən, rus, ingilis, alman,
türk və ispan dillərində çap edilərək, dünyanın bütün aparıcı ölkələrində
yayılan "Sumqayıt - 1988", "Cinayət və cəza" və s. kimi
tarixi-publisistik araşdırmaları yada salınmışdır. Və oxucular xalqımız, o
cümlədən Sumqayıt və sumqayıtlılar qarşısında xüsusi xidmətlərini nəzərə
alaraq, bu il 65 illik yubileyi qeyd edilən Eyruz Məmmədovun "Sumqayıtın
Fəxri vətəndaşı" adına və fərdi Prezident təqaüdünə təqdim edilməsinin
labüdlüyünü də bir arzu kimi dilə gətirmişlər.
Tədbirin sonunda Kitabxananın baş
direktoru Yeganə Əhmədova "Sən kimsən, Armando?" romanında ustalıqla
yaratdığı kitabxanaçı qız obrazına, kitabxana işini dolğun, mənalı epizodlarla
təsvir etdiyinə görə müəllifə dərin təşəkkürünü bildirmişdir.
Tədbir xatirə şəkillərinin çəkilməsi
ilə başa çatmışdır.
Rəhman ORXAN
Xəbərdən istifadə edərkən istinad etmək vacibdir.
