Fevralın 17-də Sumqayıt Regional Mədəniyyət İdarəsinə tabeli Abşeron rayon Mədəniyyət müəssisələrinin əməkdaşları tərəfindən qəzəlxan-şair Əliağa Vahid yad edilib.
İlk növbədə Abşeron rayon Mədəniyyət müəssisələrinin rəhbər işçiləri Əliağa Vahidin Abşeron rayonu Masazır qəsəbəsində yerləşən büstünü ziyarət edərək, abidənin önünə gül dəstələri qoyublar.
Sonra Abşeron rayon Mədəniyyət Mərkəzində "Vahidəm, xəlqimin qəzəl şairiyəm” adlı dəyirmi masa keçirilib. Çıxış edən Sumqayıt Regional Mədəniyyət İdarəsinin baş məsləhətçisi, Abşeron rayonu üzrə nümayəndə İlham Manafov bildirib ki, klassik qəzəl məktəbinin istedadlı davamçısı kimi öz dəstxəti ilə seçilən, qəzəlləri və satirik şeirləri xalq arasında yayılan, dahi Füzulini özünün böyük ustadı adlandıran Əliağa Vahidin əsərləri sevilərək oxunur. Həmçinin bildirilib ki, onun qəzəlləri poetik dilinin sadəliyi, xəlqiliyi və ahəngdarlığı ilə seçilir, vətənə məhəbbət, düşmənə nifrət, qələbəyə inam hissləri təbliğ edilir.
Tədbir zamanı həmçinin Əliağa Vahidin əsərlərindən, haqqında monoqrafiyalardan, jurnal və qəzet materiallarından, fotoşəkillərdən ibarət sərgi də nümayiş olunub.
Xəbərdən istifadə edərkən istinad etmək vacibdir.
