Sumqayıt Regional Mədəniyyət İdarəsinə tabe olan Mərkəzləşdirilmiş Kitabxana Sistemi tərəfindən Xurşudbanu Natəvanın 190 illiyinə həsr edilən bədii qiraət müsabiqəsi keçirilib. Müsabiqə S.Vurğun adına Mərkəzi kitabxanada təşkil olunub.
İlk olaraq tədbiri metodika biblioqrafiya şöbəsinin müdiri Təranə Mirzəyeva açıq elan edib. Sonra Vətən uğrunda canlarını qurban verən şəhidlərimizin ruhu bir dəqiqəlik sükutla yad edilib. Müsabiqənin şərtləri haqqında məlumat verilərək, qeyd edilib ki, müsabiqə 3 turdan ibarət olub. İki turun nəticələrinə əsasən seçilənlər yekun tura vəsiqə alıblar. Artıq yekun turun nəticələrinə görə qaliblərin müəyyən olunacağını bildirərək münsiflər heyətinin üzvləri təqdim olunub.
Azərbaycan Yazıçılar Birliyinin üzvü, gənc şair, Prezident təqaüdçüsü Elvin Əlizadə, Sumqayıt Dövlət Dram Teatrının aktyoru, qiraətçi Kamran Muradlı, AYB-nin üzvü, Sumqayıt Dövlət Dram Teatrının rejissoru, qiraətçi şair Ümid Abbas Nihani və Sumqayıt şəhər Gənclər və İdman Baş İdarəsinin Gənclər şöbəsinin baş aparıcı məsləhətçisi Könül Ələsgərova müsabiqə iştirakçılarını qiymətləndiriblər.
Müsabiqənin nəticələrinə əsasən Mərkəzi kitabxananın oxucusu Ayxan Soltanlı I yerə, Mələk Namazova və Mələk Cəbrayılova II yerə, Sərmayə Mehrəliyeva, Həcər Həsənova və Nəzrin Nəbizadə isə III yerə layiq görülüblər.
Digər iştirakçılar təşəkkürnamə ilə təltif olunublar. Beləliklə, müsabiqənin şərtlərinə görə birinci yerə 1, 2-ci yerə 2, 3-cü yerə isə 3 nəfər seçilib. Müsabiqənin sonunda qaliblər fəxri fərmanla, Gənclər və İdman Baş İdarəsi tərəfindən təqdim olunan hədiyyələrlə mükafatlandırılıblar.
Müsabiqənin sonunda MKS-nin direktoru Yeganə Əhmədova iştirakçılara təşəkkür edərək bildirib ki, X.Natəvanın yaradıcılığını öyrənən hər kəs qalib sayılır. Bu müsabiqənin gözəlliyi məhz Xurşudbanu Natəvan qəzəllərini oxuculara tanıtmaq və sevdirmək olub.
Xəbərdən istifadə edərkən istinad etmək vacibdir.
