Azərbaycanlı yazıçı Varis Yolçuyevin  "Son məktub" romanı Birmingem Universitetinin kitabxanasının əsas fonduna daxil edilib. Bu barədə xəbəri yazıçıya universitet ofisinin vitse-kansleri Lorna Musgrave verib. 

30 000 tələbənin təhsil aldığı Birmingem Universiteti Avropanın 10, dünyanın 60 ən nüfuzlu universitetlərindən biridir. Buranın 8 məzunu Nobel mükafatı laureatıdır. 

Birmingem Universiteti Kral Xartiyasına daxildir. Universitetin 12 kitabxanadan ibarət birləşmiş kitabxanası  isə dünyanın ən böyük universitet kitabxanası hesab edilir. Burada İncilin 1566-cı il unikal nəşri, Uilyam Şekspirin, Çarlz Dikkensin ilk dərc edilmış kitabları qorunub- saxlanır.

 "Son məktub" romanı ilə bağlı geniş məlumat almaq üçün müəlliflə əlaqə saxladıq.  O, romanının Türkiyədə də böyük uğur qazandığını dedi: "Roman bu yaxınlarda  4 min tirajla Türkiyədə də çap olunub. Hətta türk mətbuatında bununla bağlı xəbəri 90 mindən çox adam oxuyub. Əsərin baş qəhrəmanı azərbaycanlı olsa da, hadisələr Türkiyədə cərəyan edir. Romanda bir neçə millətdən olan insanlar arasında sevgi əhvalatı yer alıb. Burada ingilis və pakistanlı gənclər arasında sevgidən bəhs olunur. 

Həmin bu ingilis və pakistanlı tələbələr Böyük Britaniyanın Birmingem Universitetinin məzunlarıdır. Bu da universitetin vitse-kansleri Lorna Musgravenin diqqətini çəkib. Daha sonra o, mənimlə əlaqə saxlayaraq "Son məktub" romanımı kitabxananın əsas fonduna daxil etmək istədiklərini bildirdi. Bir şeyi də xüsusi qeyd etmək istərdim ki, həmin universitetin kitabxanası artıq beş ildir ki, fonda kitab qəbulunu dayandırıb. İstisna olaraq mənim kitabımı daxil etdilər. Bu romanımda  Xocalı soyqırımında ermənilərin törətdiyi vəhşiliklər də qələmə alınıb. Buna görə də kitabımın xaricdə yayılması məni sevindirir. Çünki artıq dünya ictimaiyyəti də bu vəhşilikdən xəbərdar olacaq. 

"Son məktub" romanının uğurları bununla bitmir. Türkiyənin "İQ" nəşriyyatından mənimlə əlaqə saxlayaraq kitabımın artıq yenidən çap olunacağını bildirdilər".

Varis Yolçuyev onu qeyri-ciddi yazıçı hesab edənlərin də artıq deməyə sözləri qalmadığını düşünür: 

"Bir vaxtlar məni qeyri-ciddi ədəbiyyat yaratmaqda günahlandıranların artıq Türkiyədə uğurlarımı görəndən sonra deməyə sözləri qalmayıb. Bir növ öz işimlə qələbə qazana bildim. Ancaq bir şeyi də demək istərdim ki, bu mənim uğurlarımın yalnızca bir hissəsidir. Gələcəkdə yazıçı kimi qazanacağım uğurlar daha böyük olacaq. O ki, qaldı xırda-para adamların üzərimə hücum etməsinə, bütün bunlara demək olar ki, son qoyulub".

/teleqraf.com/