Azğın düşmənə qarşı 44 günlük Vətən müharibəsi Qələbə ilə nəticələnsə də, mənfur qonşularımız öz pisliyindən, məkrli niyyətindən əl çəkə bilmirlər. Möhtəşəm ZƏFƏRİ həzm edə bilməyərək yeni təxribatlara əl atırlar. Belə genişmiqyaslı təxribatlardan biri 2022-ci il sentyabr ayının 12-də gecə saatlarında baş verir. Ermənistan Silahlı Qüvvələrinin diversiya qrupları Azərbaycan-Ermənistan dövlət sərhədinin Daşkəsən, Kəlbəcər və Laçın rayonları istiqamətlərində Azərbaycan Ordusunun bölmələrinin mövqeləri arasındakı ərazilərin və təminat yollarının minalanmasını həyata keçirirlər. Bu əməllərin qarşısının dərhal alınması məqsədilə bölmələrimiz tərəfindən görülən təxirəsalınmaz tədbirlər nəticəsində döyüş toqquşması baş verir. Düşmən müxtəlif iriçaplı silahlardan, o cümlədən minaatanlardan istifadə etməklə, mövqelərimizi intensiv atəşə tutur. Əks-tərəfin atəş nöqtələrinin susdurulması və döyüş toqquşmasının miqyasının genişlənməsinin qarşısının alınması məqsədilə, zəruri tədbirlər görülür. Təəssüf ki, bu mübarizə itkisiz ötüşmür... Şəhid olan igid oğulların arasında leytenent Elnur Səmədov da olur...

---------------------

QISA ARAYIŞ: ELNUR SƏDAQƏT oğlu SƏMƏDOV 11.03.1988-ci ildə İsmayıllı rayonunda ziyalı ailəsində anadan olub. 1994-2005-ci illərdə A.Aslanov adına şəhər 2 saylı tam orta məktəbdə, 2005-2009-cu illərdə Sumqayıt Dövlət Universitetinin "Avtomatika və idarəetmə” fakültəsində təhsil alıb və "Avtomatika mühəndisi” ixtisasına yiyələnib.

E.Səmədov ali təhsilini uğurla başa vurduqdan sonra, Füzuli rayonunda müddətli həqiqi hərbi xidmətə başlayıb. Xidməti dövründə görünüşünə və psixoloji durumuna, bacarıq və qabiliyyətinə görə xüsusi təyinatlılara seçilib. 2010-cu ilin yayında xidmətini başa vuran gənc əsgər hərbçi olmağa qərar verərək, Müdafiə Nazirliyinə müraciət edib. Razılıq aldıqdan sonra, o, nazirliyin nəzdində fəaliyyət göstərən "Təlim və Tədris Mərkəzi”ndə kurslara qatılıb. Daha sonra Xızı rayonunun Yaşma qəsəbəsində hərbçi kimi xidmətə başlayıb. Burada o, uzun müddət gənc əsgərlərə "Xəritəşünaslıq” üzrə dərs keçib.

E.Səmədov 2010-2020-ci illərdə hərbi fəaliyyəti dövründə bir çox təlimlərdə iştirak edib. Qayda-qanuna, nuzam-intizama riaəyət etməsinə, döyüş hazırlığına, savad və bacarığına, fərdi yüksək keyfiyyətlərinə görə, o, dəfələrlə rəhbərlik tərəfindən təltif olunub, mükafatlandırılıb.

-------------------

Şanlı Aprel döyüşlərinin və II Qarabağ – Vətən müharibəsinin iştirakçısı olan cəsur zabit, torpaqlarımızın mənfur düşməndən azad olunması uğrunda gedən savaşda öz sözünü qətiyyətlə deyərək, düşmənin layiqli cavabını verib, şücaəti ilə adını könüllərə yazıb. Füzuli, Hadrut, Xocavənd, Cəbrayıl, Zəngilan, Qubadlı... istiqamətlərində gedən döyüşlərdə iştirak edərək, rəşadətli döyüş yolu keçib. O, neçə-neçə silahdaşının həyatını ölümdən xilas edərək, onlara həyat bəxş edib. Hətta döyüşlərin birində komandirlərdən biri yaralanıb və komandaya rəhbərlik etmək ona həvalə olunub. O an dəstəni əsla başsız qoymaq olmazdı. S.Elnurgilin dəstəsi mühasirəni mətinliklə yararaq bu savaşdan alnıaçıq çıxıb.

Aynur xanım (həyat yoldaşı): "27.10.2020-ci ildə axşam zəng etdi ki, "qorxma, bir söz deyim, yaralanmışam, indi gətirəcəklər, ancaq bilmirəm hara. Heç kimə bir söz demə”. Soruşdum ki, "harandan yaralanmısan?”, cavab verdi ki, "yanımda mina partlayıb”. Sonradan bildik ki, Füzuli rayonunun Dilağa kəndində yaralanıb. 8 nəfər olublar, 8-i də o vəziyyətdə. Hamısını Füzuliyə gətirmişdilər. Oktyabrın 28-də isə onları Göyçaya apardılar. 15 gün müalicə yazımışdılar. Tezliklə sağalıb cəbhəyə getməyə can atırdı. O ərəfədə də müharibə Qələbə ilə başa çatdı. Çox sevinirdi...”.

Ayşə xanım: "Mən Elnurun həm xalası, həm də qayınanasıyam. Həyat yoldaşım rəhmətə gedəndən sonra məni gətizdirdi evlərinə, öz istəyi ilə. Həm tək qalmayım, həm də uşaqlardan muğayat olum deyə. Çox böyük ürəyi vardı. İşinin vurğunu olan əsl vətənpərvər idi.

Bir gün Aynur otaqdan çıxanda gördüm ağlayır. Soruşdum, "nə olub?”, cavab verdi ki, "Elnur deyir ki, "uşaqlardan muğayat ol, onları sənə tapşırıram. Haqqınızı halal edin. Ağır döyüşə gedirik”. 44 günlük müharibədə 6 gün ondan xəbər çıxmadı. Görün, o günləri biz nələr yaşadıq... Kaş, onun müharibə dövründə göndərdiyi səsli mesajları saxlayardıq...

Onun uşaqlığı Azərbaycanın keçid dövrünə təsadüf edib. O səbəbdən uşaqlığı ağır keçib. Təbiətcə zarafatcıl, deyib-gülən idi. Olar ki, hamı eyni sözü desin və sakitlik olsun, lakin Elnur bu sözü elə deyərdi ki, hamı gülümsəyərdi. Onunla bir yerdə olanda hamı şən olardı. Amma son illərdə bu təbəssümdən əsər-əlamət qalmamışdı. Yoldaşlarının itkisənə çox üzülürdü...”.

Vətən müharibəsi qurtaranda gənc zabit Göyçayda müalicə olunurdu. Evə döndükdən sonra o, Xızı rayonunun Yaşma qəsəbəsində hərbi fəaliyyətini davam etdirir.2021-ci ildə isə "Leytenant” rütbəsi alır.

AİLƏ:Səmədovlar ailəsi 5 nəfərdən ibarət olub. Ata – Sədaqət Səmədov İsmayıllı rayonunda musiqi məktəbində təsərrüfat işlərinə baxıb. Ana – Sənubər Səmədova riyaziyyat müəllimi işləyib. Vətənpərvər ruhda böyüyən üç qardaş dost, sirdaş olmaqla bərabər, hər zaman bir-birilərinə dəstək olublar.

E.Səmədov əslində 21.03.1988-ci il tarixdə dünyaya gəlib. "Doğum haqqında Şəhadətnamə”də səhvən 11.03.1988-ci il tarixi yazılsa da, ailədə doğum gününü məhz Novruz bayramında qeyd ediblər.

Əziz-doğmaların xatirələrindən aydın olur ki, gənc zabit xoşxasiyyət, mehriban, ailəcanlı, həm də çox zəhmətkeş olub. Hələ orta məktəbdə təhsil aldığı illərdə vaxt tapıb fərdi işlərdə də çalışıb. Zərgərliyə marağı olduğundan bu sənəti könüllü olaraq öyrənməyə çalışıb. Futbol azarkeşi olan yeniyetmə, imkan tapan kimi, dostları ilə futbol oynamağa tələsib. Hər zaman fəal, aktiv olaraq, zamanını dəyərləndirməyə, vaxtını səmərəli keçirməyə can atıb.

E.Səmədov 2015-ci ildə, qohumların məsləhəti ilə, öz xalası qızı ilə ailə həyatı qurub. Saf, təmiz hisslər, qarşılıqlı hörmət və ehtiram... get-gedə böyük bir sevgiyə, daha sonra isə möhkəm sevgi telləri ilə düyünlənmiş əsl ailəyə çevrilib. Və bu sevgidən Səmədovlar ailəsində iki gözəl övlad dünyaya gəlib...

E.Səmədov ailəsinə qarşı çox diqqətcil, qayğıkeş idi. İstəyirdi ki, övladları təlim-tərbiyəli, vətənpərvər, savadlı olsunlar. Vaxt məhdudiyyəti olduğundan, işdən yorğun gələn zabit əlavə nə iləsə məşğul ola bilmirdi; filmlərə baxmağa, kitab oxumağa, məclislərə getməyə... Şahmat oynamağı sevər, əksər hallarda da qalib o, olardı. Çox vaxt oğlu Cavidlə şahmat oynayar, onunla ata-oğul dostluğu yaratmağa çalışardı. Övladları ilə keçirdiyi dəqiqələrdə o, bütün yorğunluğunu unudardı. Bir sözü olardı: "Ailədə bir nəfərin sözü keçər, hamı da buna riayət edər”. Onun öz ailə qayda-qanunları vardı. Xidməti dövründə işi haqqında, hansı bölgədə olması ilə bağlı heç kimə heç bir məlumat verməzdi, hətta ailəsinə belə.

Aynur xanım deyir ki, "Elnurun yeməyə qarşı heç bir "kaprizi” olmayıb. Allahın verdiyi ruzini iştahla yeyər, min şükür edərdi. Hərdən tərs uşaqlar kimi tərsliyi də olsa, saf qəlbli, kin-küdurətdən uzaq olduğundan, bu hal tez də keçib gedərdi”.

E.Səmədov çox ağıllı, uzaqgörən, zəki insan idi. Ailə həyatı qurduğu gündən, sanki bir gün başına hansısa hadisənin gələ biləcəyini düşünüb, həyat yoldaşını möhkəm, mətin olmağa, həyatın sınaqlarında, keşməkeşli yollarında büdrəməməyə hazırlayırdı. O, istəyirdi ki, uşaqlarının anası hər cür çətinliyi dəf etməyi bacarsın, həyatın bərki-boşundan çıxıb güclənsin, dəyanətli olsun.

S.Elnur erməni dilini səlis bilirdi. "Düşməni məhv etmək üçün ən güclü silahlardan biri onun dilini bilməkdir” söyləyərdi. O, 23.02.2015-ci il tarixdən 20.06.2015-ci il tarixədək ASQ-nin "Təlim və Tədris Mərkəzi”ndə fəaliyyət göstərən "erməni dili üzrə təməl” kursunu uğurla bitirmişdi. Həmçinin ingilis dilinə marağı olduğundan, bir neçə kursu bitirib sertifikat da almışdı.

Hissiyatı güclü olan zabitin hər sözü, hərəkəti məntiqə əsaslanardı. Baş verəcək hadisəni qabaqcadan hiss edər, lazımi ölçü götürər, düzgün addım atardı. Artıq hərbçilər də onun xasiyyətinə bələd idilər. O, nəsə düşünəndə kənara çəkilər, gözlərini qıyar, dərin düşüncələrə dalar, bu anlarda siqaretini damağına qoyub tez-tez qüllab vurardı... Ona kənardan əsla müdaxilə olmazdı. Hamı səbisizliklə qəti qərar veriləcək anı gözləyərdi. Qəribədir ki, hər dəfə də zabitin verdiyi qərar düzgün olardı. Nəticə bunu təsdiq edərdi.

Nizam-intizamı, təmizliyi, səliqə-sahmanı sevən, qayda-qanuna riayət edən, sözübütöv, ciddi xarakterli, həssas qəlbli, istiqanlı... – belə idi bizim Elnur Səmədov!

2022-ci il... Sonuncu doğum günü... O, tortun üstünə qoyulmuş şamı yandırmaq istəyir. Şamın biri yandır, digərini isə neçə dəfə yandırmağa çalışsa da, yanmır ki yanmır. Özü də pərt olur... Bir anlıq çöhrəsini kədər bürüsə də, bunu sezdirməməyə çalışır... Bəlkə də, yanmaq bilməyən şamın mənası bir ailənin sönən işığı, milyonlarla insanların işıqlı sabahları demək idi...

Aynur xanım: "Təbiətcə sakit idi. Çox danışmağı, hər şey haqqında hesabat verməyi, nəyisə qabaqcadan bildirməyi sevməzdi. Hərbi qaydalara riayət edən idi. Tapşırılmışdı ki, hərbi geyimdə dükan-bazara getmək olmaz. Yolüstü dərman almaq belə lazım idisə, evə gəlib formasına dəyişər, sonra gedib alardı.

15 gün idi Yaşmada qrupunu dəyişmişdilər. Sumqayıtda yan-yana yerləşən "Hiper”, "Qayalı” marketlərin şüşələrinə Şəhidlərimizin şəkilləri vurulub. Yolumuz buradan keçəndə hər dəfə deyirdi: "Bu, boş yerləri bizim üçün saxlayıblar olsun...”. Cavab verirdim ki, "elə demə”. Bir dəfə üstüörtülü bildirdi ki, "sentyabrda nəsə olacaq, amma bu dəfə tamam başqa cür olacaq. Müharibədə elə idi ki, qərarı özüm verə bilirdim, amma indi fərqlidir. Qrup komandiriyəm və mən mütləq orada olmalıyam!”. Başqa heç bir söz demədi”.

30.08.2022-ci ildə iş yerindən birbaşa ön cəbhəyə göndərilən Elnur Səmədov 31.08.2022-ci il tarixdə öz dəstəsi ilə artıq Kəlbəcərdə təlimlərdə iştirak edirdi.

Həyat axarı ilə davam edurdi. Gənc zabit böyük ümidlərlə önə baxırdı. 15.09.2022-ci il tarixdə oğlu Cavid ilk dəfə məktəbə qədəm qoyacaqdı, imtahanları uğurla verən həyat yoldaşının isə ilk iş günü olacaqdı. Hamı səbirsizliklə o sevincli günü gözləyirdi... Məhz həmin gün necə gözəl arzular reallaşacaq, unudulmayacaq anlar yaşanacaqdı...

Hərbçi həyatı, doğrudan da, çox ağır, məşəqqətlidir. Hərbçilər çörək ətirli doğma torpağın hər qarışı uğrunda ölümlə üz-üzə dayanmağa hazır olan Vətən fadailəridirlər!

2022-ci il sentyabrın 12-sindən 13-ünə keçən gecə səhər saatlarınacan Ermənistan Silahlı Qüvvələrinin bölmələri tərəfindən Azərbaycanla dövlət sərhədinin müxtəlif istiqamətlərində genişmiqyaslı təxribat törədilir. Qeyrətli Vətən oğlu Elnur Səmədov da düşmənə qarşı əks-hücüm əməliyyatında fəallıq göstərir. Təəssüf ki, sentyabrın 13-ü tarixində Kəlbəcər istiqamətində düşmən təxribatının qarşısını alarkən Vətən sevdalı igid zabit qəhrəmancasına həlak olaraq Şəhidlik Zirvəsinə ucalır.

Aynur xanım: "Bir gün dedi ki, "döyüşə gedirik, hər şey ola bilər, hazır olun”. Narahat anlar yaşayırdıq... Sentyabrın 14-ü səhərəcən gözlədik, gördük yoxdu... 15-i oğlum birinci sinfə gedirdi, mənim də ilk iş günüm idi...Kədərimiz o qədər ağır oldu ki, sevincimizi yaşaya bilmədik...”.

14.09.2022-ci il tarixdə igidimizin nəşi şəhid olduğu ərazidən çıxarılaraq doğulduğu İsmayıllı rayonuna aparılır. Burada təşkil olunan vida mərasimində yüzlərlə rayon sakini iştirak edir. Daha sonra şəhidimizailəsinin yaşadığı Sumqayıt şəhərinə gətirilir.

Azərbaycan Ordusunun hərbi qulluqçusu, Xüsusi Təyinatlı Qüvvələrin cəsur kəşfiyyatçısı Elnur Səmədov 15.09.2022-ci il tarixdə Sumqayıt Şəhidlər Xiyabanında dəfn edilir.

E.Səmədovun anası Sənubər xanım o günləri xatırlayaraq müsahibələrində belə deyir: "O, harada olmağından asılı olmayaraq, hər 5 oktyabr - Müəllim günündə məni, bir müəllimi kimi, təbrik edirdi. Amma ilk il oldu ki, mən Elnurumdan o mesajı almadım. Və 40 gün müddətində bircə dəfə onu yuxumda gördüm. O, məni yuxumda müəllim günü münasibəti ilə təbrik etdi. Hərbi formada gəlib dayandı qarşımda və sonra getdi...

Oğluma demək istəyirəm: "Bilirsən, Elnurum, heç doymadım səndən, heç doymadım... canım oğlum...”.

Döyüş yoldaşlarının E.Səmədov haqqında xatirələri bitib-tükənmir...

* "E.Səmədovla Aprel döyüşlərində, Vətən müharibəsində, xidməti dövründə döyüş tapşırıqlarını yerinə yetirəndə... – bunların hamısında birgə olmuşuq. Əsl Vətən oğlu idi!”.

* "Vətən mənə oğul desə, nə dərdim,

Mamır olub qayasında bitərdim”.

Elnur, həqiqətən də, mamır olub qayalarda bitməyi bacardı...”.

* "Əsgər olub, gizir olub, indi də gəlib zabit oldu. Bütün çətinlikləri görə-görə gəldi. Bundan necə komandir olar, sizcə?!”.

* "Bəlkə də doğma qardaşımı itirsəydim, bu qədər üzülməzdim...”.

* "Elnurun ad günü idi. Qəfildən dedi ki, "bir qardaşınızın şəklini çəkin. Altından da yazarsız, "nur üzlü şəhidim...””. O, heç vaxt belə söz deməzdi...”.

* "Elnur öz həyat məktəbini bitirdiyi gün oğlu yeni həyatına, məktəb illərinə qədəm qoydu... O, bu günü necə də görmək istəyirdi... Təəssüf...”...

Bu gün Səmədovlar ailəsində ata həsrəti ilə gözləri qapıya dikilən iki Vətən övladı böyüyür. Cavidbacısından fərqli olaraq, az yaşı ilə hər şeyi dərk edir. Hər gün saatlarla atasının böyüdülmüş şəklinin qarşısında xalçanın üstündə oturub, gözlərini atsının şəklinə zilləyir. Görəsən, bu anlarda nələr düşünür o? Bəlkə, varlığını, qoxusunu hiss edib yaşatdığı atasının ruhu ilə ötən xoş anları xatırlayır... Bəlkə, atasının ona gizlicə söylədiyi nəsihətləri dinləyir... Ya da ki, atasına onun üçün çox, lap çox darıxdığını bildirir, ondan onları niyə belə tez tərk etdiyini soruşur... Kim bilir...

Balaca İnci isə evdə yaradılmış kiçik muzeyin qarşısından sağa-sola qaçır, ya atasının şəklinə söykənib diqqətlə ona baxır, ya isti öpüşləri ilə atasının üzündə izlər qoyur, ya da oyuncaqlarını yığıb muzeyin qarşısındakı xalçada oturaraq, tez-tez də şəkilə baxaraq gəlinciyinə sığal çəkir... Atasının onu gördüyünü zənn edərək, o, çox sevinir... Bəzən də, baş verənləri hələ tam dərk etməyərək, anasına sual verir: "Ana, atam nə vaxt gələcək? Atanı istəyirəm...”. Bu körpə fidana veriləcək cavab isə yoxdur...

Bir gün anası İncini bağçadan evə gətirəndə o, bəy-gəlin maşınını görüb deyir ki, "ana, mən gəlin olacam, ata da gələcək...”. Qardaşı cavab verir ki, "yox, gəlməyəcək”. İnci möhkəm və qəti səslə ona cavab verir ki, "yox, gələcək!”. Həyat beləcə davam edəcək, uşaqlar böyüyüb boya-başa çatacaq... lakin onların intizar dolu baxışları hər zaman atalarını axtaracaq, onun şəhid olmasını bilsələr belə...

Bu gün Şəhidimizin əmanətlərini – Cahid (26.01.2016-cı il təvəllüd) və İncini (12.07.2019-cu il təvəllüdlü) qorumaq, onların sağlam böyümələrini, arzu-istəklərinin reallaşmasını təmin etmək bizim hər birimizin borcudur!

2014-cü ilin avqust, 2016-cı ilin Aprel döyüşlərində və 44 günlük Vətən müharibəsində iştirak etmiş qeyrətli Vətən oğlu Elnur Səmədov 13 illik xidməti dövründə bir çox mükafatlara layiq görülüb. Belə ki, o, "Azərbaycan Silahlı Qüvvələrinin 95 illiyi” (1918-2013) Yubiley (24.06.2013), "Azərbaycan Ordusunun 100 illiyi (1918-2018)” Yubiley (26.06.2018) medalları; Vətən müharibəsindən sonra "Azərbaycan Bayağı” ordeni (15.12.2020), "Şücaətə görə”(24.12.2020) medalı, "Hərbi xidmətdə fərqlənməyə görə” 3-cü dərəcəli (30.12.2020) medalla, həmçinin Vətən müharibəsində göstərdiyi şücaətlərə görə, "Cəbrayılın azad olunmasına görə”, "Füzulinin azad olunmasına görə”, "Kəlbəcərin azad olunmasına görə” medalları ilə təltif olunub.

2021-ci ildə "Leytenant” rütbəsi alan gənc zabit həmin il "Qüsursuz xidmətə görə” 3-cü dərəcəli (26.06.2021), "Hərbi xidmətdə fərqlənməyə görə” 2-ci dərəcəli (28.09.2021) medallarla təltif edilib.

Azərbaycanın ərazi bütövlüyü uğrunda gedən mübarizədə göstərdiyi şücaət və igidliyə görə, Azərbaycan Silahlı Qüvvələrinin mətin zabiti, 34 yaşlı leytenant Elnur Sədaqət oğlu Səmədov ölümündən sonra, Azərbaycan Respublikasının prezidenti İlham Əliyevin 05.11.2022-ci il tarixli Sərəncamına əsasən,3-cü dərəcəli "Rəşadət” ordeni və "Vətən uğrunda” medalı ilə təltif olunub.

Ruhun şad olsun, Cənnətməkan Şəhidimiz!!!

Aygün Hacıyeva,

jurnalist-publisist,

AJB, AYB və AAB-nin üzvü

 

 

 

 

 

 

 

 

 

 

Xəbərdən istifadə edərkən istinad etmək vacibdir.