Belə vətəndaşlardan biri də Sumqayıt şəhər sakini Abdullayev Vüqar İltifat oğludur. A.Vüqar Xeberle.com-a müraciət edərək "Bank of Baku”nun Sumqayıt filialından dollarla kredit götürdüyünü və ödəyə bilmədiyi üçün bu gün evinə baxış keçiriləcəyini, əməkhaqının 50 faizinə həbs qoyulacağını bildirib. Onun sözlərinə görə, 2015-ci ildə beynində olan xoşxassəli şişin müalicəsi və övladlarının təhsil haqqı üçün "Bank of Baku”dan 9000 dollar məbləğində kreditə pul götürüb. Bir il müddətində mütəmadi olaraq həmin pulu banka ödəsə də, devalivasiyadan sonra krediti ödəməkdə çətinlik çəkib. Buna görə də sözügedən bank onu məhkəməyə verib. Şikayətə bütün instansiya məhkəmələrində baxılıb və sonda məhkəmə tərəfindən təhsil işçisi A.Vüqarın və onunla eyni peşə sahibi olan həyat yoldaşının maaşının hər ay 50 faizinin kəsilməsi barədə qərar verilib. Bu gün bank tərəfindən onun evinə baxış keçiriləcək. Müraciətçi bildirir ki, ümumən pulu ödəməkdən yayınmır, onu hissə-hissə ödəməyə hazırdır, amma neçə dəfə banka müraciət etsə də, bu məbləğin ödənilməsi üçün ona hər hansı bir  güzəştin olunmasına razılıq verilməyib. O qeyd edib ki, iki övladının təhsil haqqını, özünün müalicə xərclərini ödəməklə yanaşı, bu günlərdə anasını itirib və buna görə də əməkhaqlarının 50 faizinə "həbs” qoyulması onun yaşayışı üçün böyük çətinlik yaradacaq.

Məsələ ilə bağlı "Bank of Baku” ilə əlaqə saxladıq. Bankdan Xeberle.com-a bildirildi ki, onlar tərəfindən həmin vətəndaşa müvafiq güzəştlər təklif olunsa da, o razılaşmayıb: "Abdullayev Vüqar İltifat oğlu bankımızdan krediti birinci devalivasiyadan sonra götürüb. İkinci devalivasiyadan sonra ödənişlərdə çətinlik çəkdiyi üçün dəfələrlə ona zənglər etmiş və SMSlər göndərmişik. 2016-cı ildən etibarən ödənişin tələb olunması ilə bağlı onunla mütəmadi olaraq əlaqə saxlamışıq. O, vəziyyətinin yaxşı olmadığını və bu səbəbdən ödəniş edə bilmədiyini qeyd edib. Bankımız tərəfindən vətəndaşa ödənişin güzəştli hala keçirilməsi üçün kifayət qədər çoxsaylı təkliflər edilib. Həmin şəxs bu təkliflərimizin heç birinə cavab verməyib.  Bilirsiniz ki, bütün devalivasiyalardan sonra banklar tərəfindən vətəndaşlara tam şəkildə güzəşt olunması mümkün deyil. Edə biləcəyimiz bütün güzəştləri həmin vətəndaşa təklif etmişik. Problem də bundan qaynaqlanır.  Heç bir bank istəməz ki, onun müştərisi problemli kredit yaratsın. Çünki bu həm banka, onun imicinə, həm də qarşı tərəfə ziyandır”.