BMT-nin Qocalma İnstitutunun direktoru, professor Marvin Formoza Azərbaycana səfəri çərçivəsində Sumqayıt şəhərində olub.

 

Xeberle.com xəbər verir ki, herontoloji tədqiqatlar aparan professor Marvin Formoza Qubadlı rayonundan məcburi köçkün düşən və Sumqayıtda yaşayan ən uzunömürlü sakinlərdən biri olan Məstan Əsədovanı ziyarət edib. Sumqayıt şəhərində yaşayan uzunömürlülər üzərində elmi-tədqiqat işlərini aparan Akademik A.İ.Qarayev adına Fiziologiya İnstitinun "Üzunömürlülüyün fiziologiyası" laboratoriyasının böyük elmi işçisi Natəvan Kərəmova uzunömürlü Məstan Əsədovanın sağlamlıq durumu, onun emosional və psixoloji vəziyyəti, yaddaş göstəriciləri, hazırki həyat fəaliyyəti və aktivlik səviyyəsi barədə məlumat verib.

Uzunömürlü ilə görüş zamanı professor onun ailə vəziyyəti ilə tanış olub və səmimi söhbət edib. Görüşdə Akademik A.İ.Qarayev adına Fiziologiya İnstitutunun "Üzunömürlülüyün fiziologiyası" laboratoriyasının müdiri biologiya üzrə fəlsəfə doktoru Çingiz Qasımov, qurumun digər əməkdaşları, eləcə də Qubadlı rayon İcra hakimiyyətinin nümayəndələri və uzunömürlü Məstan Əsədovanın yaxınları iştirak ediblər.

Dünya elminə Azərbaycanın uzunömürlülər diyarı olması və buranın iqlim şəraitinin də uzunömürlülük üçün əlverişli olması məlumdur. Lakin, son illərin iqtisadi –siyasi böhranı, ölkəmizin müharibə şəraitində olması, çox saylı qaçqın və köçkünlər, xəstəliklərin fizioloji yaş dövrlərində rastgəlmə tezliyinin artması, ekoloji və s. faktorları təbii ki, uzunömürlülük indeksinə də öz təsirini göstərməmiş deyil. İnsan ömrünün uzadılması məqsədi ilə çoxsaylı tədqiqatlar aparılmasına baxmayaraq, herontologiyada bu problem hələ də həll olunmamış qalır. Bu problemin həlli istiqamətində aparılan tədqiqatlar isə dünya elminin diqqət mərkəzindədir. Bu məqsədlə Azərbaycana gələn və aparılan tədqiqatların nəticələri ilə maraqlanan alimlərdən biri BMT-nin Qocalma İnstitutunun direktoru, professor Marvin Formozadır.

Xatırladaq ki, M.Formoza Fiziologiya İnstitutunun direktoru, biologiya üzrə elmlər doktoru Ulduz Həşimova  ilə də görüşüb.  Görüşdə institutun herontologiya sahəsində həyata keçirdiyi elmi tədqiqat layihələrinin nəticələri haqda məlumat verilibb. Professor Formoza Fiziologiya İnstitutunda herontologiya sahəsində əldə edilən təcrübənin əsas götürüldüyünü qeyd edərək həmin institutun BMT-nin Qocalma İnstitutunun regional mərkəzi olaraq seçildiyini deyib. 

Qeyd edək ki, Marvin Formozanın uzunömürlülərlə növbəti görüşü Lənkəran şəhərində planlaşdırılıb.