Sumqayıt Bələdiyyəsinin keçmiş üzvü Fərid Dəmirov haqqında yayılan məlumatlara münasibət bildirib.
F. Dəmirovun Xeberle.com-a açıqlamasını olduğu kimi təsdim edirik:
"Qız evində toydur, oğlan evinin xəbəri yox". Necə olur ki, bəzi hörmətli saytlar hansısa işimin məhkəmədə olduğunu və hətta hakimin kimliyini də məndən qabaq müəyyənləşdirir və sanki sensasiya baş veribmiş kimi bu xəbəri böyük həvəs və canfəşanlıqla paylaşırlar.
Cənablar, mən iki ildən çoxdur ki, işsizəm, hamı tərəfindən atılmış, unudulmuş birisiyəm. Heç bir nüfuz sahibi deyiləm, heç bir ictimai maraq kəsb etmirəm. Bəs yıxılanı baltalamaq həvəsi nədən qaynaqlanır?! Görünür hədəfdə mən deyiləm. Əgər kimlərsə bu xoşagəlməz faktdan istifadə etməklə kimlərinsə nüfuzunu zədələmək həvəsinə düşüblərsə, yanılırlar. Cücəni payızda sayarlar.
14:09
xxx
Sumqayıt şəhər Bələdiyyəsinin keçmiş üzvü, dələduzluqda ittiham edilən Fərid Dəmirovun cinayət işi üzrə ibtidai istintaq başa çatıb.
Xeberle.com report.az-a istinadən xəbər verir ki, iş baxılması üçün Sumqayıt Şəhər Məhkəməsinə göndərilib və hakim Elçin Məmmədovun icraatına verilib.
Cinayət işi üzrə hazırlıq iclası yaxın günlərdə keçiriləcək.
Qeyd edək ki, Dəmirov Fərid İslam oğlu etibardan sui-istifadə edərək, Osmanov Fərhad Heybət oğluna qarşı dələduzluq etməkdə təqsirləndirilir.
Ona Cinayət Məcəlləsinin 178.2.2-cu (təkrar dələduzluq) maddəsi ilə ittiham verilib.
F.Dəmirov 2011-ci ildən Milli Məclisin deputatı Muxtar Babayevin köməkçisi olub.
2018-ci ildə Muxtar Babayev Ekologiya və Təbii Sərvətlər naziri təyin olunduqdan sonra F.Dəmirov nazirliyin Audit şöbəsində sektor müdiri təyin edilib, bir müddət sonra işdən çıxarılıb.
23 dekabr 2014-cü ildən 2019-cu ilin dekabrın 23-ə kimi Sumqayıt şəhər Bələdiyyəsinin üzvü olub.
Xəbərdən istifadə edərkən istinad etmək vacibdir.
