Ötən il bir neçə anla yaddaşlara həkk olundu. Ölkəmizin həm siyasi, həm mədəni, həm də digər sahələrində mühüm hadisələr baş verdi. Həmin hadisələrin mərkəzində olanlar isə 2013-ün ən yadda qalan şəxsləri oldular.
Simsar.az ötən ilin ən yadda qalan 10 şəxsini təqdim edir.

İlham Əliyev
Sözsüz, ötən ilin ən yadda qalan hadisəsi 9 oktyabr tarixində keçirilən prezident seçkiləri oldu. Səsvermənin nəticələrinə əsasən Yeni Azərbaycan Partiyasının namizədi İlham Əliyev böyük səs çoxluğu ilə rəqiblərini üstələyərək üçüncü dəfə Azərbaycanın prezidenti seçildi. Rəhbərliyini davam etdirən İ.Əliyev iqtisadi-sosial, siyasi, mədəni və digər sahələrdə uğurlu fəaliyyətini davam etdirdi.

Cəmil Həsənli 
Prezident seçkilərində müxalifətin vahid namizədi qismində çıxış edən Cəmil Həsənli İlham Əliyevin əsas rəqibi hesab olunurdu. Seçkidən əvvəl həyata keçirilən kompaniyalar və mitinqlər onun hansı nəticəyə nail olacağını maraqlı etmişdi. Nəticədə isə uğurlu olmadı: C.Həsənli yetərli səs toplaya bilmədi. Seçkilərdən sonra C.Həsənlinin Bakı Dövlət Universitetindəki fəaliyyətinə son qoyulması da ölkə gündəmində maraq doğurmuşdu.

Rüstəm İbrahimbəyov
Rejissor, ssenarist, kinodrammaturq, Oskar mükafatı laureatı Rüstəm İbrahimbəyov ötən ilə fərqli simada damğa vurdu. Prezident seçkilərində müxalifətin vahid namizədi olan əməkdar incəsənət xadiminin sonda namizədliyi təstiqlənmədi. İkili vətəndaşlığı olan Rüstəm İbrahimbəyov özünü siyasət sahəsində sınaya bilmədi.

Mikayıl Cabbarov
Təhsil naziri postunda Misir Mərdanovu əvəzləyən Mikayıl Cabbarov ötən ilin ən yadda qalan şəxslərindəndir. Təyin olunduğu gündən təhsil sahəsində müxtəlif islahatlar və tədbirlərlə yadda qalan yeni təhsil nazirinin gördüyü işlər əhali tərəfindən də maraqla qarşılanır.

Səfər Əbiyev
Oktyabrın 22-də Nazirlər Kabinetinin yeni tərkibi müəyyən eidildi. Nəticədə, ölkənin Müdafiə Naziri postunda dəyişiklik edildi. Səfər Əbiyevin 18 il Müdafiə Naziri vəzifəsində çalışdıqdan sonra Zakir Həsənovla əvəzlənməsi ötən ilin ən yadda qalan hadisələrindən biri oldu.

Hafiz Məmmədov
“Bakı” futbol klubunun prezidentinin ötən il gördüyü işləri müsbət qiymətləndirmək olar. “Lans” klubuna sponsorluq etməyə başlayan Hafiz Məmmədov ispaniyanın “Atletiko Madrid” klubu ilə də əlaqələri möhkəmləndirdi. Avropada bacarıqlı futbolçu uşaqların təlim-məşq toplanışlarında iştirakına şərait yaradan iş adamının Azərbaycan futbolu üçün əvəzsiz tövhlər verdiyini demək mümkündür. Həmçinin, Fransa çempionatında Azərbaycan bayrağının dalğalanması və La Liqa yarışlarında “Land of fire Azerbaijan” yazısını görmək qürurvericidir.

Elşad Abdullayev
Ötən ilin əvvəllində yayılan videomateriallar ölkəni silkələdi. Təqdim edilən materiallardan sonra Gülər Əhmədovanın rüşvətxorluqda ittiham olunması və həbsi də ötən ilin yadda qalan hadisələrdəndir. Elşad Abdullayev isə uzun müddət diqqət çəkməyi bacardı. Maraqlı və iddialı ittihamlarla yadda qalan E.Abdullayev ötən ilin yadda qalan şəxslərindən oldu.

Əkrəm Əylisli
Ötən ilin unudulmayanlarından danışarkən Əkrəm Əylisini unutmaq olmaz. Sözsüz, “Daş yuxular” romanı ilə dərin iz qoydu. 2012-ci ilin sonlarında “Drujba narodov” (“Xalqlar dostluğu”) jurnalında dərc edilən əsər ilin əvvəllərində geniş müzakirə mövzusuna çevrildi. Azərbaycan xalqının böyük etirazına səbəb olan roman sənətkarı xalq yazıçısı adından məhrum etdi.

Berti Foqts
Artıq 6 ildir milli komandamızın baş məşqçi postunda çalışan almaniyalı mütəxəssis daha 2 il Azərbaycanda qalacaq. Belə ki, ilin sonunda AFFA-nın verdiyi qərarla Berti Foqts növbəti seçmə tsikldə də millimizin baş məşqçisi olacaq. Əslində, bu, gözlənilən idi. Berti Foqtsla özünün yeni rekordlarını müəyyən edən komandamız ötən ili major notlarla bitirdi. Bu isə almaniyalıya növbəti 2 ildə də etibar etməyə kifayət etdi. Berti Foqts futbol azarkeşlərinə 2016-cı il Avropa Çempionatı uğrunda mübarizə aparacaqlarını vəd edib. Mütəxəssisə işlərində uğurlar arzulayırıq.

Toto Kutunyo
İtaliyanın məşhur musiqi ulduzunun “Baku Cristal Hall”dakı konsertdə “Sarı gəlin”i ifa etməsi böyük marağa səbəb oldu. Dünya musiqi sənətinin klassiklərindən olan Toto Kutunyonun Azərbaycan dilində, özü də, xalq mahnımızı ifa etməsi onun ən yadda qalan şəxslərdən biri olmasına səbəb oldu.