Qərbi Kaspi Universitetində Dağlıq Qarabağ münaqişəsi ilə bağlı dəyirmi masa keçirilib. Universitetin Tətbiqi Politologiya Mərkəzinin təşkilatçılığı ilə "Dağlıq Qarabağ: münaqişənin həlli yolları və mövcud reallıq” mövzusunda keçirilən dəyirmi masada universitetin müəllimi, politoloq Elxan Şahinoğlunun və beynəlxalq münasibətlər fakültəsində təhsil təhsil alan tələbələr iştirak ediblər.
Müzakirədə "Hazırkı şərtlər daxilində münaqişənin sülh yolu ilə həlli realdırmı?”, "Həmsədr dövlətlər – Rusiya, ABŞ və Fransa münaqişənin həllini sürətləndirmək üçün nə etməlidirlər?”, "Rusiya niyə münaqişənin həllində maraqlı deyil?”, "Türkiyənin münaqişənin həllindəki fəallığını necə qiymətləndirmək olar?”, "İşğalçı dövlətə qarşı hansı siyasət aparılmalıdır?” sualları ətrafında fikir mübadiləsi aparılıb.
E.Şahinoğlu ATƏT-in Nazirlər Şurasının və Xarici işlər nazirləri dünən keçirilən toplantısına toxunaraq bildirib ki, bu toplantıda həmsədr ölkələrin nazirləri ortaq bəyanatla çıxış etdilər. "Həmişəki kimi onlar üç maddəni sadaladılar: Güc tətbiq etməmək, ərazi bütövlüyü və xalqların öz müqəddəratını təyin etmək hüququ. Məhz burada 2-ci və 3-cü maddə münaqişənin həllinə imkan vermir. Biz 2-ci maddəni əsas götürürük, qarşı tərəf isə 3-cü maddəni. Dövlət başçısı İlham Əliyevin də bir fikri var ki, ermənilər artıq bir dəfə öz müqəddəratlarını təyin ediblər və Ermənistan adında dövlət yaradıblar, ikinci erməni dövlətinin Azərbaycan torpaqlarında yaradılmasına imkan verməyəcəyik. Şimali İraq və İspaniyada da baş verənlərə nəzər salaq. Əgər müqəddəratını təyin etmək hüququ varsa, nə üçün beynəlxalq aləm kürdlərin və katalonların "müstəqilliyi”ni tanımadı. Deməli öz müqəddəratını təyin etmək hüququ da əslində tanınmır. Biz də tələb edirik ki, İraqın, İspaniyanın ərazi bütövlüyünü dəstəklədikləri kimi Azərbaycana da eyni münasibət göstərilsin. Ancaq görürük ki, məsələ uzanır”,- deyə politoloq bildirib.
Müzakirələrdə münaqişənin həlli variantları, perspektivləri nəzərədn keçirilib, tələbələr öz fikir və mülahizələrini bölüşüblər.
Xəbərdən istifadə edərkən istinad etmək vacibdir.
