Sumqayıtda Dövlət Bayrağı, Konstitusiya və Milli Dirçəliş günləri münasibətilə bir sıra idarə, müəssisə və təşkilatların komandaları arasında keçirilən "Xəmsə” bilik yarışının qalibləri mükafatlandırılıb. Bilik yarışı SOCAR-ın "Azərikimya” İstehsalat Birliyinin təşkilatçılığı ilə reallaşıb.
Xeberle.com xəbər verir ki, Birliyin akt zalında keçirilən yarışda "Azərikimya” İB-nin də təmsil olunduğu Karbamid zavodunun, Bakı Ali Neft Məktəbinin, Sumqayıt Dövlət Universitetinin, Moskva Dövlət Universitetinin Bakı filialının, YAP Sumqayıt şəhər təşkilatının, FHN-in Sumqayıt Regional Mərkəzinin, "N” saylı hərbi hissənin, Respublika Qızıl Aypara Cəmiyyətinin Sumqayıt şəhər bölməsinin, Mərkəzləşdirilmiş Kitabxanalar Sisteminin, "ASAN xidmət”in və digər müəssisələrin komandaları iştirak edib.
İyirmi komandanın qatıldığı bilik yarışı münsiflər heyətinin, o cümlədən "Xəmsə” yarışları üzrə mütəxəssislərin ciddi nəzarəti altında keçirilib. Ənənəvi olaraq üç seçim və bir final mərhələsindən ibarət olmaqla, dörd saata qədər davam edən yarışda yüksək bilik səviyyəsi, geniş dünyagörüşü və hazırcavablıqları ilə seçilən "ASAN xidmət”in komandası birinci, Respublika Qızıl Aypara Cəmiyyətinin Sumqayıt şəhər bölməsinin və Bakı Ali Neft Məktəbinin komandaları isə müvafiq olaraq ikinci və üçüncü yerləri tutublar.
Qalib komandalara "Azərikimya” İstehsalat Birliyi Həmkarlar İttifaqı Komitəsi tərəfindən diplomlar və mükafatlar təqdim olunub.
Həmçinin dördüncü yerdə qərarlaşan "N” saylı hərbi hissənin komandası həvəsləndirici mükafata layiq görülüb, Sumqayıt Dövlət Universitetinin komandası isə bilik yarışında fəal iştirak etdiyinə və 4 fəal komanda arasında keçirilən şans mərhələsində qalib kimi mükafatlandırılıb.
Xəbərdən istifadə edərkən istinad etmək vacibdir.
