Sumqayıtın bütün ümumi təhsil müəssisələrini əhatə edən "Təhlükəsiz məktəb” sosial layihəsi Abşeron-Xızı Regional Təhsil İdarəsinin tabeliyində fəaliyyət göstərən şəhərin 11 nömrəli tam orta məktəbdə geniş tədbirlə yekunlaşıb. Layihə məktəblərdə səmərəli mühitin formalaşması işinə töhfə vermək, müəllim və şagirdlər üçün təhlükəsiz mühit yaratmaq, fövqəladə hal baş verdikdə ilk tibbi və psixoloji yardım göstərmək, mütəmadi olaraq şagird, valideyn, təlim-tərbiyə müəssisələrinin kollektivləri ilə maarifləndirmə, diaqnostik işlər aparmaq məqsədilə həyata keçirilib.
AZƏRTAC xəbər verir ki, idarənin rəsmiləri və şəhərin ictimaiyyət nümayəndələrinin iştirak etdiyi tədbir Azərbaycanın Dövlət Himnin oxunması ilə başlayıb. Şəhidlərin əziz xatirəsi bir dəqiqəlik sükutla yad edilib.
Əvvəlcə iştirakçılar yaradıcı şagirdlərin əl işləri, rəsmləri, gənc idmançıların nailiyyətləri ilə tanış olublar.
Layihənin əhəmiyyətindən danışan məktəbin direktoru Şəhla Bağırova təhsil müəssisələrində təhlükəsiz mühitin təşkilinə nail olmağın vacibliyini bildirib. O, məktəblərdə uğur və mükəmməlliyi təşkil edən faktorların önündə təhsil qədər təhlükəsizlik anlayışın da önəmli olduğun vurğulayıb.
Məktəbin müəllimi Elnarə Qurbanzadə isə internet təhlükəsizliyi mövzusunda çıxış edib.
Tədbir bədii kompozisiyalarla davam edib. Mövzu ətrafında viktorinalar, dialoqlar, müzakirələr, səhnəciklər böyük marağa səbəb olub. Şagirdlərin rəngarəng çıxışları xoş ovqat yaradıb.
Xəbərdən istifadə edərkən istinad etmək vacibdir.
