Uzun illərdir dünyada ilk əlifbanın kimlər tərəfindən yaradılması ilə bağlı mübahisələr gedir. Çox vaxt ilk əlifbanın yaradıcıları kimi finikyalılar, misirlilər, minoylar təqdim edilir və bu əlifbaların təxminən 4-5 min il yaşının olduğu hesab olunur. Amma mərhum dilçi alim Əjdər Fərzəlinin uzun illər apardığı tədqiqatlar dünyanın ilk əlifbası ilə bağlı indiyə kimi deyilən bütün fikirləri şübhə altına alır. Onun 30 ildən artıq müddətdə apardığı tədqiqatların nəticəsində Naxçıvanda Gəmiqaya adlanan ərazidə, Qobustanda, digər arxeoloji abidələrdə və Azərbaycan xalçalarında ilk dəfə olaraq qədim Azərbaycan əlifbası aşkara çıxıb. Onun bu araşdırması kitab şəkilində çap edilib. Qeyri-hökumət Təşkilatlarına Dövlət Dəstəyi Şurasının maliyyə yardımı ilə "Aqra” Elmin İnkişafına Dəstək İctimai Birliyi tərəfindən nəşr edilən  "Nuhun gəmisi Gəmiqaya Qobustan əlifbası” kitabında dünyanın bütün əlifbalarının Azərbaycanda yaranan əlifbadan bəhrələndiyi əksini tapır.

Qeyd edək ki, dilçi alim Qobustandan 6 min, Gəmiqayadan isə götürdüyü 1000 təsvir əsasənda təhlillər aparıb.

Əjdər Fərzəlinin tədqiqatları nəticəsində məlum olub ki, Qobustan və Gəmiqayadakı təsvirlərlə Mərkəzi Asiyadakı Orxon-yenisey abidələri və digər qədim Türk yazıları arasında xeyli bənzərliklər mövcuddur.

Tədqiqatçı həmçinin Nuh tufanından sonra yaranan ilk mədəniyyətin Gəmiqaya-Qobustan mədəniyyəti olduğunu göstərir.  (atv.az)