“Ya 500 manat verəcəksiniz, ya da işləməyə imkan verməyəcəyik”

Dekabr ayının sonlarından etibarən ölkədə fəaliyyət göstərən bir neçə sayta şiddətli haker hücumları təşkil olunub. Fasiləsiz və intensiv hücumların əsas məqsədi onların fəaliyyətini iflic vəziyyətə salmaq olub.

Bunlardan biri də “Media forum” saytıdır. Ötən il dekabrın 19-dan başlayan hücumlar dekabrın 31-də pik nöqtəsinə çatıb. Həmin gündən sayta girmək mümkün olmayıb və fəaliyyət tam dayanıb. Yanvarın 4-dən fəaliyyətini bərpa edən saytın rəhbərliyi hazırda hücumların mənbəyini araşdırır. “Yeni Müsavat”a açıqlamasında saytın baş redaktoru Azər Qaraçənli bildirdi ki, fəaliyyət göstərdikləri 9 il ərzində bir neçə dəfə haker hücumuna məruz qalıblar. Onlardan bir neçəsi Azərbaycanın xəbər saytlarına total hücum fonunda baş verib: “Amma bu dəfəki  - 2013-ün dekabrından başlanmış hücum kütləvi hücumdur. Mütəxəssislərin apardığı araşdırma göstərir ki, hakerlərin hədəfi mediaforum.az saytıdır. Onlar saytı iflic etməyi qarşılarına məqsəd qoyub. Bizim mütəxəssislər deyir ki, hücumları bir istiqamətdən başlayıb, o birinə keçiblər.  Bir dəfə axtarış sistemi vasitəsilə hücuma başlayıblar, sonra arxiv materiallarına keçiblər. Dərhal hücumun yönünü dəyişdirirlər”.

A.Qaraçənli bildirdi ki, hücumçular saytın fəaliyyətini saatbasaat izləyiblər. Hakerin üzünə qapanmış istiqamətdən yox, başqa istiqamətdən hücuma keçmə xətti götürüblər: “Hazırda hücumun kökünə yavaş-yavaş gedib çıxırıq. Bəri başdan arqument demək istəmirəm. Mütəxəssislər o İP-ləri araşdırırlar, onların yerləşdiyi hostinqə şikayət göndərilib. Araşdırması xahiş edilib. Güman edirik ki, bir neçə günə hücumun haradan, hansı ünvandan olması aydınlaşar. Hücumlar xaricdən olur, yavaş-yavaş hücumun mənbəyi bir ölkəyə gedib çıxır. Bu, araşdırılır, şikayətə nə cavab veriləcəyini də gözləyirik”.

Müsahibimizin sözlərinə görə, hakerlər böyük nəticəyə nail ola bilməzlər, saytın strukturunu dağıda bilməzlər. A.Qaraçənli dedi ki, hücumun xarakteri fərqlidir: onlar sorğu yollayırlar ki, guya yüz minlərlə insan mediaforum.az saytı ilə maraqlanır: “Biz bu işə xeyli maliyyə ayırmışıq, əsas məsələ hücumçunu dəf etməkdir. Hazırda saytın özündə də təkmilləşmə aparılmalıdır”.

Hücuma məruz qalan Gunxeber.com-un baş redaktoru Zabil Müqabiloğlunun sözlərinə görə, sayta hücumlar əsasən dekabrın 16-dan başlayıb və artan xətt üzrə davam edib: “Bu müddət ərzində azı iki dəfə server dəyişdirmişik. Saytın proqramçısı günlərlə əziyyət çəkib. Amma hələ də problemi tam həll eləyə bilmirik. Hər dəfə bu işləri görmək həm də xeyli əlavə xərc tələb edir. Mütəxəssislər deyir ki, saytlara belə hücumlar zamanı adətən göndərilən viruslar uzağı 3 gün ərzində özləri zəifləyirlər və problem getdikcə səngiyir. Amma bu dəfə vəziyyət tam fərqlidi. Hücumlar getdikcə artır. Müxtəlif ehtimallarımız var. Amma ən sensasion məqam odur ki, mənə çatan məlumata görə, bu günlərdə haker qrupu adından bir saytın rəhbərinə mesaj verilib ki, ya hər ay bizə 500 manat verməlisiniz, ya da sizin işləməyinizə imkan verməyəcəyik. Hazırda digər baş redaktorlarla və mütəxəssislərlə müzakirələr aparılırıq. Görünür ki, Milli Təhlükəsizlik Nazirliyinə müraciət edəcəyik. Çünki bu həm də ölkənin informasiya təhlükəsizliyinə ciddi təhdiddi”.

Hücuma məruz qalan Pia.az-ın baş redaktoru Azər Qaramanlının verdiyi məlumata görə, onların apardığı araşdırmalar nəticəsində məlum olub ki, bu kiber hücumlar bütün media qurumlarına eyni mərkəzdən və Bakı şəhərindən həyata keçirilir. Haker qrupu ddos (zombi kompyuterlərdən) istifadə etdiklərinə görə bü hücumlar dünyanının müxtəlif ölkələrindən olunan kiber hücum kimi görsənir: “Misal üçün eyni sayta bir saat ərzində növbə ilə Çindən, Anqoladan, Vyetnamdan, Braziliyadan, ABŞ-dan və sair onlarca ağlagəlməz ölkədən kiber hücumlar gəlir. Mütəxəssislər yaxşı bilir ki, hətta ən yaxşı təşkilatlanmış haker qrupları belə bu miqyasda hücumları davamlı olaraq həyata keçirə bilməz. Ona görə də hər hansı bir sayta xarici ölkələrdən girişi bağladıqda asanlıqla məlum olur ki, bu hücumların hamısı Bakıdan və bir mərkəzdən həyata keçirilir. Məlum olub ki, həmin haker qrup bir çox saytların texniki xidmət sahələrini öz əllərinə keçirmək üçün davamlı olaraq saytlara DDOS İP hücumları həyata keçirir və saniyədə hər hansı bir sayta milyonlarla İP ünvanlayırlar. Bu hücumların nəticəsində isə həmin saytın serveri yüklənməyə davam gətirə bilməyərək öz faliyyətini durdurur. Daha sonra isə hücum olunan sayta texniki xidmət təklifi yollayır və təminat verirlər. Təbii ki, əvvəlkindən iki, üç qat artıq qiymətə. Pia.az bu qrupun izinə düşüb və yaxın zamanda bu qrupun üzvləri haqqında ciddi məlumatları ictimaiyyətin nəzərinə çatdıracağıq. Bundan sonra isə kiber cinayət törədən şəxslər haqqında tədbir görmək üçün hüquq-mühafizə orqanlarına müraciət edəcəyik.

Təbii ki, kiber cinayətlə məşğul olan dəstənin layiqli cəzasını alması üçün əlimizdən gələn hər şeyi etmək üçün bütün internet medianı səfərbər etməyə çalışacağıq".

/demokratiya.info/