Bəli, yaşıllığa bürünmüş gözəl məkanımızın hər yanı güldü, çiçəkdi. Bu gülün, çiçəyin, növbənöv ağacın qayğısını, nazını çəkən, əziyyətinə qatlaşan, bu sahəyə xüsusi diqqət yetirən zəhmətkeş insanlarımız var. Yeni mövsümdə onların gördüyü işlərlə yaxından tanış olmaq üçün üz tutduq Yaşıllaşdırma İdarəsinə. Rəis İlyas Həsənovla görüşüb söhbət etdik. Onu da xatırladaq ki, İlyas müəllim uzun illərdir şəhər təsərrüfatında çalışır. Fəaliyyəti yüksək qiymətləndirilib. Ölkə Prezidentimiz cənab İlham Əliyevin Sərəncamı ilə 3-cü dərəcəli "Vətənə xidmətə görə” ordeni və "Tərəqqi” medalı ilə təltif olunub. 

Şəhərimizin yubileyi ərəfəsində yaşıllaşdırma sahəsində görüləcək tədbirlərdən həvəslə söz açan həmsöhbətim dedi ki, yazın gəlişi ilə işlərimiz daha geniş vüsət alıb, intensiz xarakter daşıyıb. Mövsümlə, yubileylə əlaqədar idarənin qayğıları birə-beş artıbdır. Ağacların dibləri bellənir, aqrotexniki qulluq işləri vaxtında aparılır, yeni ağac və gül kolları basdırılır, çəmənliklər salınmış ərazilərə münbit torpaq daşınıb hamarlanır, yaşıllıqların qorunması üçün lazım olan digər işlər görülür. Dekorativ kolların formaya salınmasına, eyni zamanda, insanların həyatı üçün təhlükə yarada bilən iri gövdəli ağacların budanmasına və kəsilib ərazidən uzaqlaşdırılmasına xüsusi diqqət ayrılır. 

Bu ilki yaz mövsümündə də nadir ağac və bitki nümunələrinin kütləvi əkilməsinə başlanılmışdır.

Xüsusilə vurğulayım ki, cari ildə kollektivimiz tərəfindən ağacəkmə tədbirləri böyük miqyas kəsb etmişdir. Şəhərimizin "Heydər Əliyev”, "Sülh”, "Koroğlu” prospektlərində, Bakı küçəsində, Heydər parkında, eləcə də küçə və xiyabanlarda, Bakı-Quba yolunda on beş min ədəd müxtəlif növ ağac, həmçinin həmişəyaşıl Eldar şamı, Sərv ağacları, Tuya ağacları basdırılmışdır. Eyni zamanda, göstərilən ünvanlarda 17-18 min qızılgül kolları əkilib və bir daha əkini davam etdirilir. daxil olmaqla, Ümumilikdə 60 min ədəd mövsümi gül, dekorativ gül və kollar əkilməsi həyata keçirilir. Həmin bitkilərə xüsusi qulluq göstərilir. Mövsümlə əlaqədar şəhərin mikrorayon və məhəllələrində, mərkəzi küçələrində yaşıl budama işləri görülmüşdür. Həmçinin Bakı-Quba yolunda, şəhərin müxtəlif küçə və prospektlərində yeni su xəttlərinin çəkilməsi, eləcə də təmir edilməsi işləri davam etdirilir. Bundan əlavə, ot biçininə başlanılacaqdır. Sahə ustaları Sahib Nəcəfov, Mürvət Əsədov, bağ fəhlələri Ramid Məmmədzadə, Əşrəf Qasımov, Əli Əliyev, Xuraman Paşayeva, Roza Allahverdiyeva və digərləri təcrübə və bacarıqları ilə hər kəsə nümunədirlər. Ümumiyyətlə, bütün kollektiv üzvlərimiz üzərlərinə düşən işlərin öhdəsindən layiqincə gəlirlər.  

Bir sözlə, 75-ci yazını yaşayan Sumqayıt möhtərəm Prezidentimiz İlham Əliyevin diqqət və qayğısı sayəsində, şəhər icra hakimiyyətinin başçısı Zakir Fərəcovun qətiyyətli idarəçiliyi nəticəsində qəlboxşayan gözəl bir məkana çevrilmişdir. Parkların, xiyabanların yaşıl örtüyə büründüyü, ağacların çiçək açdığı, qızılgüllərin tumurcuqladığı bu yaz ətirli günlərdə əsrarəngiz gözəlliklərə baxdıqca insanın könlü açılır. Müxtəlif ünvanlarda yaradılmış landşaft mənzərəsi hamının zövqünü oxşayır. Bütün görülən işlər şəhər sakinləri tərəfindən böyük rəğbətlə, sevinclə qarşılanır. 

Alyaşıl donlu, gül-çiçək ətirli Sumqayıtımız, səndən doymaq olarmı?!