“Ölkədə istehsal olunan benzinin qiymətindəki artım aqrar sahəyə təsir göstərəcək”. 

Bunu ANS PRESS-ə açıqlamasında İqtisadi və Sosial İnkişaf Mərkəzinin (İSİM) sədri Vüqar Bayramov deyib. O bildirib ki, təxminən üç ay öncə yanacağın qiymətindəki dəyişiklik aqrar sahədə istehsal olunan məhsulların qiymətinə birbaşa təsir edir. Onun sözlərinə görə, bu fəsadlar tək aqrar məhsullarla kifayətlənmir. Mütəxəssis bildirir ki, yanacağın bahalaşması artıq maşın bazarında öz sözünü deyir: 

"Mühərriki həcmi yüksək olan bahalı maşınlara tələbat kəskin azalacaq. Bu faktor bir mənalı şəkildə hazırda da müşahidə olunur. Avro 4 standartlarının tətbiqi və yanacağın qiymətindəki artım insanların daha səmərəli, mühərrik həcmi kiçik olan avtomobillərə yönəlməsinə səbəb olub. Bu hal artıq müşahidə olunur və bazarlarda daha çox az yanacaq sərfiyyatlı maşınlara tələb göstərilir. Təbii ki, bu da yavaş-yavaş sözügedən qənaətli avtomobillərin qiymətində özünü göstərir". 

Aİ-95 markalı benzinin qiymətindəki artıma da toxunan ekspert bildirib ki, bu növ yanacaq artıq Azərbaycanda istehsal olunmur. Vüqar Bayramov bildirir ki, Aİ-95 markalı benzinin qiyməti bazar qiymətlərinə uyğunlaşdırılır və bu səbəbdən qiymətində dəyişiklik müşahidə olunur. Ekspert hesab edir ki, Aİ-95 markalı benzində baş verən qiymət artımı bazara heç bir mənfi təsir göstərməyəcək.