Biri var idi, biri yox idi...
Dünyanın ən gözəl ölkələrindən birində, hamının can deyib can eşitdiyi Can Azərbaycanda,çox dəyərli, müdrük bir xanım yaşayırdı. Onunla bu dünya daha parlaq, daha maraqlı idi.
O çox təvazökar mülayim təbiətlidir. Uşaqları çox sevir. Allahdan çox şey istəməz.
Bəlkə ona görə də, Ulu tanrı ən gərəkli şeyləri ona səxavət də bəxş etmişdi.
Ağıl, istedad, çalışqanlıq, ailə xoşbəxtlyi, sevmək, sevilmək səadəti, ana sevinci, nənə xoşbəxtliyi, böyük nənə bəxtəvlərliyi. O maddi korluq çəkməmiş, ürək istədiyini alıb yemiş, içmiş, gözəlcə geyinmişdi.
Heç zaman naşükürlük etməmişdi. Tox yanında ac olmadığı kimi, ac yanında da tox görünməyi sevməzdi.
Ehtiyacı olanlara əl tutar, kimsəsizə. kasiba sahib çıxar, ac qarınları doyurar.
Ən böyük arzusu insanlara sevinc bəxş edib, onları xoşbəxt görmək olub.
1950-ci il. Fevral ayının 26-sı.
Kiçik çillənin qarlı-boranlı bir günüdür.
Bax, belə bir gündə, Süsən dağının ətəklərində, Arazın sahilində, çınarlar yurdu olan bir türk obasında, Zəngilanda, ay parçası kimi bir qız uşağı dünyaya göz açdı.
Adını Qətibə qoydular.
Uğurlu, xoşbəxt ad
Sonra günlər, aylar, illər tez-tez keçdi, çox tez-tez keçdi.
O da tez böyüdü, təhsil aldı.
Amma hamı kimi olmadı.
Hamıya çox doğma, yaxın, əziz oldu.
Adı amalına tən oldu.
Anaların anası Qətibə xanım oldu.
Doğularkən ona verilən bu adi adı ömrü boyu çəkdiyi ağır zəhməti ilə böyütdü.
Bu, onun taleyinə yazılmamışdı. Qətibə öz taleyini özü yaratdı.
Adı, sanı, şöhrəti özü qazandı. O, bir dəyərə çevrildi.
Əgər bütün bunlara görə o kiməsə borclu idisə, o bir Allahı, bir özü, bir də qədirbilən ailəsi idi.
Hər yanda yaxşılıq axtarışına çıxan, sevdiyi insanlardan sevərək danışan bu qadın, böyüklərin, gənclərin, körpələrin sevimlisi, ümid yeri, məsləhət yeri oldu.
Dövlətinə, millətinə sədaqətilə seçilən səriştəli rəhbər oldu.
Bütün qohumlar üçün əziz və sevilən, qohumcanlı, istiqanlı, səxavətli, qəlbinin gözəlliyi üzünə çökmüş xanımlar xanımı, analar anası oldu.
75 illik yubileyi ilə yaşını qeyd etdiyimiz, işığına, nuruna toplaşdığımız Qətibə xanım!
Sağlıqla dolu, uzun ömür payı nəsibiniz olsun
Ömür gedir, gildir, gildir, yaşın artıq 75-dir.
Bizə ümid, təsəllidir, sədaqətin əziz bacım
Bir Allahdan güc alasan, dağlar qədər ucalasan,
Qucağında qocalasan səadətin, əziz bacım.
Sağlıqlı ol hər yaşında, izzətin dağlar basında,
O gün olsun yüz yaşında, birgə olaq, əziz bacım.
Beləliklə, sizə nəql etdiyim nağıl bitdi.
Göydən üç alma düşdü.
Yox, yox, bu səfər alma düşmədi.
Bu səfər göydən üç nur düşdü.
O Qətibə xanımın övladları Təranə, Pərvanə və Pərvindi.
Onlar yer üzünə anaları kimi nur paylamaya gəldilər.
Təyyibə Hüseynova
Saray qəsəbə 3 nömrəli tam orta məktəbin direktoru
Xəbərdən istifadə edərkən istinad etmək vacibdir.
