Azərbaycanın 2025-ci il Gənclər paytaxtı seçilmiş Sumqayıt şəhərində "Gənclər Paytaxtı Sumqayıtda Poeziya Günü” adlı tədbir keçirilib.
Milli Məclisin deputatı Səbinə Salmanovanın təşkilatçılığı ilə baş tutan tədbirdə Sumqayıt şəhər icra hakimiyyətinin başçısı Zakir Fərəcov, Xalq artisti Rasim Balayev, Xalq şairləri Vahid Əziz və Sabir Rüstəmxanlı, şair Rüstəm Behrudi, həmçinin şəhər ictimaiyyəti iştirak edib.
Deputat Səbinə Salmanova təşkil edilən tədbirin məqsədi haqda ətraflı danışaraq Sumqayıtdakı yaradıcı mühitin xüsusilə son dövrlərdə xeyli canlandığını vurğulayıb, genişmiqyaslı layihələrin gerçəkləşdirildiyi şəhərin sürətli inkişaf dövrünü yaşadığını diqqətə çatdırıb:
"Qısa müddətdə bir-birindən gözəl Heydər Əliyev Mərkəzinin, Şahmat və Musiqi məktəblərinin, Muğam Mərkəzinin, Yeni Azərbaycan Partiyası üçün binanın, çox sayda uşaq bağçalarının, bir neçə məktəb binasının, Bayraq meydanının, "ASAN xidmət” binasının, 2 nömrəli xəstəxananın, Mehdi Hüseynzadə adına stadionun yenidən tikilməsi Sumqayıta göstərilən diqqətin bariz nümunəsidir.
Sahil zolağında - 146 hektarlıq sahədə qısa zaman ərzində salınan Dənizkənarı park isə Prezident İlham Əliyevin də dediyi kimi, bir möcüzə sayılmalıdır”.
Deputat qeyd edib ki, son dövrlərdə Sumqayıtın vəsf olunduğu çox sayda şeir, mahnı, bədii və rəsm əsərləri yaradılıb:
"Hələ 1961-ci ildə Xalq şairi Nəbi Xəzrinin "Sumqayıt səhifələri” adlı şeirlər kitabı müxtəlif şəhər və kəndlərdən gəlib yeni şəhər quran sumqayıtlılar üçün ilhamlandırıcı töhfə olub. Müasir dövrdə də klassik şairlərimiz hörmətlə anılır, onların yaradıcılığı yüksək həssaslıqla qorunur. Hazırda Sumqayıtda yaradıcı mühit çox canlanıb, yerli müəlliflərin ərsəyə gətirdiyi xeyli əsər ədəbi dairələrdə yüksək qiymətləndirilib”.
Daha sonra çıxış edən Sumqayıt şəhər icra hakimiyyətinin başçısı Zakir Fərəcov, Xalq artisti Rasim Balayev, Xalq şairləri Vahid Əziz və Sabir Rüstəmxanlı, həmçinin Rüstəm Behrudi, İbrahim İlyaslı digər natiqlər şəhərin ədəbi həyatı haqqında fikirlərini bildiriblər.
Tədbirdə Xalq şairi Nəriman Həsənzadənin videomüraciəti də yayımlanıb.
Tədbir ədəbi-bədii kompozisiya ilə davam etdirilib.
Xəbərdən istifadə edərkən istinad etmək vacibdir.
