Müasir dünyada cəmiyyəti narahat edən problem içərisində ən mürəkkəbi, faciəvi nəticələrə gətirib çıxaranı narkomaniya və narkobiznesdir. Narkomaniya təkcə insanların sağlamlığına, mənəviyyatına deyil, həm də doğmalarına və sevdiklərinə əzab çəkdirir. Ən təhlükəlisi isə budur ki, insanları bu yola qıraqdan cəlb edirlər. Əsasən də qadınları və uşaqları bu çirkin yola çəkmək daha asandır. Elə son zamanlar da sosial medianın gündəmini zəbt edən video çarxlardan biri Azərbaycanda narkoman qadınların etirafları olub. 

ANS PRESS-in məlumatına görə, "ağ ölüm"ün əsirinə çevrilmiş qadınlar, peşmançılıq hisslərini dilə gətirməklə yanaşı, narkotik alverçilərinin onları necə tora saldıqlarını da deyirlər. Videoda qadınlar narkomaniya və buna necə cəlb edilmələrindən danışırlar. Diqqət çəkən məqamlardan biri budur ki, videoçarx real narkotik istifadəçilərinin iştirakı ilə çəkilib. Narkotikin qurbanı olan gənc qadınlar öz etirafları ilə digərlərini bu yoldan çəkindirməyə, narkotik alverçilərinin şirin dillərinə aldanıb onların tələsinə düşməməyə çağırır. Narkotik maddədən istifadənin ilk günlərində aldığı həzlərdən göylərə uçan qurbanlar, bir neçə dəfədən sonra şiddətli ağrılarla üzləşdiklərini və ancaq bu ağrılardan qurtulmaq üçün narkotikə möhtac olduqlarını deyirlər. Gənc qadınların bu etirafları hər kəsdə maraq oyatsa da onların bu vəziyyətlərinə yuxarıdan aşağı baxmaq düzgün deyil. Çünki, heç kim, heç vaxt bu cür problemlərdən sığortalanmayıb!

Azərbaycanda bu yola düşən şəxslərə kömək etmək istəyən insanların sırasında "Təmiz dünya" İB-nin sədri Mehriban Zeynalovanın adını da çəkmək olar. Araşdırmanın əvvəlində qeyd edilən narkoman qadınların etirafları ilə bağlı video çarxı məhz Mehriban xanım çəkib. Narkomaniyadan əziyyət çəkən insanlar ilə daha çox ünsiyyətdə olan şəxs kimi Mehriban Zeynalova ilə söhbət açdıq, Olduqca maraqlı məqamlara toxunan M.Zeynalova şok açıqlamalar verdi:

“Daha çox müştəri yığmaq və qazanc əldə etmək üçün narkobiznes ilə məşğul olan şəxslər artıq bir neçə ildir ki, hədəf olaraq qadınları və uşaqları seçirlər. Hər kəs bilir ki, xarici və eləcə də bizim ölkədə narkotik vasitələrdən küllü miqdarda pul götürülür. Bu biznesdən qazanc əldə etmək üçün təbii ki, insanları narkomaniyaya cəlb edərək asılılıq yaratmaq lazımdır. Qadınların bəziləri isə öz istəkləri ilə bu yola düşürlər. Onları bu bəlaya düşməsinin səbibi təklik, çətin vəziyyət, depressiya, hər hansı bir formada ətrafdan, yaxınlardan dəstək almamaq, zorakılıq kimi hadisələrdir. Belə olan təqdirdə cinayətkarlar onları asan yolla qurbanlarına çevirirlər” - deyə Mehriban Zeynalova bildirib. Onun sözlərinə görə, bəzi qadınlar öz həyat yoldaşları tərəfindən narkotikə qurşanırlar. Çox qəribə bir haldır ki, zərif cinsin nümayəndələri özlərinə doğma, yaxın bildikləri həyat yoldaşları və sevgililəri tərəfindən belə pis yola cəlb edilirlər. Mehriban xanım bildirib ki, belə hallar daha çox Gürcüstanda geniş vüsət alsa da son illər Azərbaycanda da rast gəlinir:"Narkotikə vərdiş edən qadının pulu yoxdursa, ona narkotik satan şəxs qadını seks fəaliyyəti göstərməyə təhrik edir. Bu yolla qadınlara pul qazandırırlar ki, daha sonra gəlib onlardan narkotik ala bilsinlər".

Artıq bu bəlaya düşmüş insanların normal həyata qayıtmaq istəyənləri də az deyil. Bəs, görəsən, onlara necə kömək etmək olar? 

“İstənilən halda reabilitasiya proqramları keçilməlidir. Narkomaniyadan əziyyət çəkən insanlara kömək olmaq üçün Azərbaycanda kifayət qədər reabilitasiya mərkəzləri yoxdur. Məsələ ilə bağlı ölkədə qeyri hökümət təşkilatlarının kadr potensiyalı inkişaf etdirilir. Amma istənilən halda həmin insanların reabilitasiya proqramından başqa, mühütünü dəyişməsi vacibdir. Narkotikdən asılı olan qadının özünü realizə edə bilməsi üçün yeni mühüt yaradılmalıdır ki, həmin çevrədən çıxa, özünü təsdiq edə bilsin. Əgər şəxsin iradəsi olsa, ona mütəxəssislər yardım edirsə, vəziyyətdən çıxmaq mümkündür” deyə Mehriban Zeynalova bildirib.

M.Zeynalovanın sözlərinə görə, son illər narkotikdən istifadə edənlərin sayı artıb: "Ən çətini isə budur ki, müalicə olunan insanlarda keçmiş vərdişlərinə qayıtmaq arzuları üzə çıxır. Son bir neçə ildə narkotikdən istifadə edən qadınlar və azyaşlılar arasında narkomaniyadan qurtulmaq üçün bizə müraciət edənlərin sayı çoxalıb. Bu o deməkdir ki, narkotik alveri ilə məşğul olan insanların qurbanları gündən günə artır. Maraqlı məqamlardan biri isə imkanlı ailələrin övladlarının bu yola sürüklənməsidir. Bu cür insanlar iki halda narkotikə qurşanır. Birincisi, sadəcə narkotikdən istifadə etmək istəyirlər. Yəni, imkanlı uşaqdır, həyatda hər bir şeyin dadını görüb, başqa heç nədə özünü tapmır. Nəticədə isə çalışır ki, narkotikdən daha çox həzz alsın".

Çalışdıq ki, narkotikin nə olduğunu və nə kimi nəticələrə gətirib çıxara biləcəyini sizə çatdıraq. Asan dildə desək, mərkəzi sinir sisteminə spesifik təsir göstərən və tez bir zamanda asıllıq yaradan maddələrə narkotik maddələr deyilir. Narkomaniya digər vərdişlərə görə daha təhlükəlidir. Çünki narkodillerlər - narkotikləri satan insanlar daima yeni alıcı axtarışında olur. Onlar maddi imkanı aşağı olan gəncləri tapdıqları kimi asanlıqla maddi imkanı çox yaxşı olan gəncləri də tora sala bilirlər. Abstinensiya halı çox əziyyətli olduğuna görə narkotikdən istifadə edən gənc yeni doza əldə etmək üçün əlindən gələni edir. Narkotikdən istifadə edənlərin əksəriyyəti gənc ikən ölür - onlar cinsi yolla yoluxan infeksiyalara, o cümlədən HİV-lə və ya hepatit C-yə yoluxur, bəziləri isə uzun müddət müalicə alaraq ailəsi və cəmiyyət üçün bir yükə çevrilir.

Narkomaniyanın fəsadları olduqca çox və ciddidir. Bu bəlanın yayılması millətin sağlam həyat tərzi üçün təhlükə törədir. Narkotik maddələrin qəbul edilməsi ilə insan fiziki və psixoloji cəhətdən məhv olur. Narkomaniya yaddaş və təfəkkürü pozur, həyata baş verən proseslərə qarşı laqeydlik yaradır. Narkomaniya orqanizmin zəifləməsinə bədənin arıqlamasına və fiziki gücün düşməsinə gətirib çıxarır.Orqanizmin zəhərlənməsi daxili orqanların qara ciyər və böyrəyin zəhərlənməsinə səbəb olur. Narkomanlar arasında ən geniş yayılmış xəstəlik hepatitdir. Ən qorxulu xəstəliklər orqanizmə qan vasitəsilə daxil olur. Rəsmi statistikaya görə son beş ildə Azərbaycanda narkomanların sayı 10 dəfə artıb. Son məlumatlara görə respublikada narkomanların rəsmi sayı 22 mindən nəfərdən artıqdr. Azərbaycanda daha geniş istifadə olunan narkotiklər tiryək, heroin, çətənə, həşiş, ekstazi və kokaindir.

Dünyada milyonlarla, ölkəmizdə minlərlə insan bu bəladan əziyyət çəkir. Təbii ki, belə inkişaf sürəti yaxın gələcəkdə ictimai faciəyə gətirib çıxara bilər. Ən acınacaqlısı isə budur ki, gənclər, yeniyetmələr və qadınlar arasında narkotiklərə aludəçilik gündən günə artır. Dünyada 2 milyon narkoman var. Onların 40-45% qadın və uşaqlardır. Erkən yaşlarında narkotik qəbul etməyə başlayan insanın orta ömrü 35-40 il olur. Bu insanlar narkotik maddələrdən istifadə edərkən, ən azı 10-15 nəfəri də narkomanlığa cəlb edə bilər.

Azərbaycan mühüm tranzit məntəqəsidir, xüsusən Əfqanıstandan Rusiya və Avropaya heroin nəqlində Azərbaycanda narkotilk maddələrin daxili istehlakı artmaqda davam edir. Ölkəmizdə tələbələr narkomanların 1/3 çoxunu 30-35% təşkil edir. Heroin istifadəçilərinin əksəriyyəti 64.6% iri şəhərlərdə Bakı, Sumqayıt, Gəncə, və Lənkəranda cəmlənib.

Araşdırmanın sonunda belə bir nəticəyə gəlib çıxdıq ki, insanların bir qismi ağrılarını kəsmək üçün, bəziləri özünün boşluğunu məhv etmək, bəziləri isə hər şeyləri var, amma daha da böyük həzz almaq üçün bu vasitəyə əl atırlar.