Hələ bir neçə müddət bundan əvvəl bütün yaşayış binalarında olan köhnə liftlərin yenilərilə əvəz edilməsi haqda danışılırdı. Artıq bəzi binalara yeni liftlər quraşdırıldı. Amma bu heç də problemi həll etmədi. Əksinə yeni liftlər yeni problem yaratdılar. Məsələn, Sumqayıtda 35 saylı yaşayış binasında olduğu kimi. Həmin ərazidən “İç xəbərə” şikayət məktubu yazan sakinlər öz köhnə liftlərinin qaytarılıb yerinə quraşdırılmasını istəyirdilər.
ANS PRESS-in verdiyi məlumata görə, Sumqayıt şəhəri, 6-cı mikrorayon, 35-ci binanın sakinlərinin, binaya təzə lift qoydular, deyə sevinməkləri uzun çəkməyib. Liftlər öz gəlişlərilə köhnə binaya yeni problemlər də gətirib. İstifadəyə verildikləri heç bir il deyil, artıq neçə dəfə xarab olaraq dayanan liftlərdən sakinlər zara gəlib. Deyirlər, ya təzə mala bir əncam çəksinlər, ya da bizim köhnə liftimizi geri qaytarsınlar.
Şikayətçi Ramiz Məmmədovun sözlərinə görə, liftlərin üstündən su damır. Lift dayanır, o liftin üstünü təmir eləmirlər.
Digər şikayətçi Fərman Cəbrayılov isə deyir ki, bir həftədir lift işləmir: “Təcili Tibbi Yardım Stansiyasından gələnlər pilləkənləri qalxanda deyirlər ki, bu liftdən anlayışı ola bilən biriləri yoxdur, deyirəm, biləni çağır gəlsin”.
11 girişli 9 mərtəbəli bu binada artıq 8 lift yeniləri ilə təmin olunub. Elə demək olar ki, binanan 8 girişində də adıçəkilən problemlər yaşanmaqdadır.
Sumqayıt şəhər “Lift-Servis” Birliyinin baş mühəndisi Ramiz Məmmədov isə sakinləri səbirsizlikdə qınayır. Deyir 35 binada yeni liftlərin quraşdırılması işinə ötən ilin sonlarında başlanılıb. 3 lift isə quraşdırılsa da hələ istismara verilməyib. Çünki orada işlər yekunlaşmayıb. Hazırda 8 lift istifadədir. Orada son proqramlaşdırma işləri gedir, bir neçə günə istifadəyə buraxılacaq.
Baş mühəndis Rusiya və Koreya istehsalı olan bu liftlərin köhnə liftlərdən çox həssas olduğunu əsas gətirərək, nəmişlik vaxtı liftin mühərrikinin dayandığını bildirdi. Deyir yaxın günlərdə, havalar isinən kimi bütün liftlərin dam örtüyü təmir olunacaq. Bu kimi problemlər də yaşanmayacaq. Qaldı, təzə liftlərdən anlayışı olmayan mütəxəssislərin olmaması məsələsinə.
Ramiz Məmmədov “Lift-Servis” Birliyinin baş mühəndisə çox qəribə gəlir ki, mütəxəssis yoxdursa, bu işləri kim görür, hamısı savadlı işçlərdir.
Təki elə olsun, sakinlər də ayaqları hesabına deyil, xərc çəkilib qoyulan bu liftlərlə mənzil başına qalxmaq istəyirlər.
Xəbərdən istifadə edərkən istinad etmək vacibdir.
