İlin əvvəlindən başlayaraq ölkənin daşınmaz əmlak bazarında baş verən qiymət artımı Sumqayıt şəhərindən də yan keçməyib. Paytaxtla müqayisədə Sumqayıt əhalisinin həyat səviyyəsinin aşağı olmasını nəzərə alsaq, mənzil ehtiyacı olan insanların vəziyyətinin bir az da çətinləşdiyini deyə bilərik. Əhalinin gəlirlərində nisbi artım baş versə də, bunu mənzil bazarındakı artımla müqayisə etmək olmaz.

Dediklərimizi Sumqayıtda - mənzil bazarındakı passivlikdən də hiss etmək mümkündür.

Maklerlər bizimlə söhbət zamanı əmlak bazarındakı passivlikdən şikayətlənərək bildirdilər.

Sumqayıtda evlərin alqı-satqısında və kirayə verilməsində qiymət artımı diqqətimizi çəkdi. Şəhərimizdə 20 ildən artıq bu işdə çalışan Elmar və Zahirlə söhbət etdik.

6 ay bundan əvvəl (təxminən noyabr, dekabr aylarında) evlərin alqı-satqısı və kirayəsi kəskin şəkildə qalxdı. 2 ayda 4 min fərq oldu. Hal-hazırda qiymət artımı dayanıb. 1 ay əvvəl 42 min manatlıq evi indi 40 minə satmaq olmur.

1 otaqlı evlərin ən ucuzu 37 min, ən bahası isə 55 min manatdır. Fərq isə belədir ki, 4-8 mkr.-da bu evlər ucuz, 2-3-cü məhəllələrdə isə baha olur. Şəhərdə 1 otaqlı "Leninqrad" layihəli evlər 6-cı mkr.- da iki ədəd 9 mətəbəli, bir də 9-cu mkr.-da bir binadır ki, bu evlərin təmirlisi 49 min manatadır. "Xuruşşov" layihəli bir otaqlı evlər bazar ətrafında yerləşdiyi üçün eyni qiymətədir.

Şəxsi mülklərin (həyət evləri) qiyməti isə 45 min manatdan 200 min manata qədər dəyişir. Bu evlərdə qiymət yerinə, həyətyanı sahəsinə, yola yaxın və uzaqlığına görə fərqlidir.

Bildiyimiz kimi, çoxmərtəbəli yaşayış binalarında (göydələn) evin qiyməti kv m-lə hesablanır. Hazırda təmirsiz evlərin kv m -i 600-700 AZN, təmirli isə 1000 AZN-dən başlayaraq hesablanır. 3-cü mkr.-nun arxa tərəfi, Təcili Yardım adı ilə tanınan ərazidəki binalarda isə kv m-i 450 manatdan satılır (təmirsiz).

Kirayə evlərə gəldikdə isə boş evin ən aşağı qiyməti 150 manatdan başlayır. 180-350 manat arası isə əşyalı evlərdir. 400-500 AZN-ə kirayə evlər də var ki, bu evlər  tam təmirli və kvartallarda yerləşməsindən asılıdır.

Qiymət düşümü (əsasən də kirayə evlərdə ), iyul və avqust aylarında olacaq. Bu da tələbələrin yay tətilinə çıxması ilə əlaqədardır.

Könül Salahova, Xeberle.com