Şəhərimizin sakinlərinin hər fəsildə özünəməxsus problemləri olur. Bunlara misal olaraq qışda qaz və işıq, yazda və payızda qaz və kanalizasiya, yayda isə içməli su və məişət tullantılarının daşınması problemlərini qeyd etmək olar. İndi yay fəsli olduğu üçün içməli su problemini təxirə salıb, məişət tullantılarının daşınması ilə yaranan problemi dilə gətirmək istəyirəm. Daha dəqiq desəm, Sumqayıt şəhər 20-ci mikrorayon sakinlərinin üzləşdiyi məişət tullantılarının vaxtında daşınmaması problemindən yazmaq istəyirəm. Özümün də yaşadığım adıçəkilən mikrorayon həyət evlərindən ibarətdir. Burada küçələrdə zibil qutuları olmadığı üçün məişət tullantıları hər bir evin həyətində toplanır. Və həftədə iki dəfə Sumqayıt şəhər Təmizlik Departamentinin işçiləri zibil maşını ilə gəlib tullantıları daşıyırlar. Amma, təəssüf ki, yay fəslində zibilin daşınması subyektiv səbəblərdən ləngiyir. Bəzən həftədə bir dəfə, bəzənsə həftədənbir gəlir zibil maşını.
Problemin səbəbini öyrənmək üçün Sumqayıt şəhər Təmizlik Departamentinin direktoru Rahim Mustafayevlə əlaqə saxladım. Departament rəhbəri bildirdi ki, "yəqin həmin ərazinin zibilini daşıyan maşında nasazlıq yaranıb, ona görə iş ləngiyir”. Daha sonra 20-ci mikrorayon və Corat qəsəbəsi ərazisi üzrə tullantıların daşınmasının icrasına nəzarət edən Vaqif adlı şəxslə əlaqə saxladım O, problemin texnikanın nasaz vəziyyətdə olması ilə əlaqələndirdi. İşə yararsız "Kamaz” markalı yük avtomobili ilə zibilin daşındığını və belə avtomobilin məişət tullantıları daşınması qanunauyğun olmadığını qeyd etdi. Həmçinin "bir sıra yaşayış massivlərinə normal zibil maşını verilidyi halda, bizə yararsız  "Kamaz” markalı avtomobil verilib. Bu səbədən də maşın tez-tez sıradan çıxır, yolda qalırıq, hal-hazırda da maşın xarab olub,  yolda qalmışıq” deyə, giley-güzar etdi. (Adamın ağlına min cürə fikir gəlir. Deyirəm bəlkə bunlar xətdən çıxıb zibil daşımaq əvəzinə gedib "xoltura” ilə məşğul olurlar – daş və ya qum daşıyırlar. Sakinlər də səhər açılandan tullantıları qalaq-qalaq yığırlar darvazalarının qarşısına. Bu vəziyyətdə zibil torbaları axşama kimi qalır küçədə. Daha sonra küçə itləri dağıdır zibilləri küçə boyunca.)
"Bəs çıxış yolu nədədir? Zibil yayın istisində həyətlərdə qalıb qurdlanıb, üfunətli iyindən dayanmaq olmur, biz sakinlər nə edək” sualıma isə Vaqif adlı şəxs "Gedin Sumqayıt şəhər İcra Hakimiyyətinin 164 nömrəli "Qaynar xətt"inə müraciət edin, şikayət edin, department rəhbərliyi mənə hansı maşını verir, mən də o maşınla zibili daşıyıram. Burada bizlik heç problem yoxdur”, deyib məsuliyyəti öz üzərindən atdı. Aradan 4 gün (sonuncu dəfə tullantıları apardıqları gündən 10 gün) keçdikdən sonra onunla küçəmizdə rastlaşdım. Acınacaqlı vəziyyətlə bağlı yenidən iradımı bildirdikdə aqressiv şəkildə məni və sakinləri borclu çıxarmağa çalışdı. Yuxarı instansiyalara müraciət edəcəyimi, həmçinin də jurnalist səlahiyyətimdən istifadə edərək problemi mətbuatda işıqlandıracağımı bildirdikdə "Mən – Əlizadə Vaqif haqqında get hara istəyirsən yaz” cavabını verdi. 
Qeyd edim ki, zibil maşınını hər bir evin qarşısında saxlamalı və fəhlələrin zibilləri darvazaların qarşısından götürüb maşına toplamalı olduqları halda (dünyanın hər bir ölkəsindən belədir), maşını bir nöqtədə saxlatdırıb, sakinlərə "zibillərinizi özünüz gətirin verin fəhləyə” deyən (buna foto sübutdur) Əlizadə Vaqif, üstəlik işçilərinə tapşırdı ki, heç kimə (günlərlə yığılıb qalmış, sellofan torbalara toplanmış torbalara) kömək etməyin.” 
Həyətlərindəki zibil tullantılarını zibil daşıyanlara verənlər əsasən qadınlardır. Bunların içində yaşlılar, səhhətində problem olanlar, hamilə qadınlar var. O insanlar ağır zibil torbalarını, müəyyən məsafə qət edərək necə daşısınlar? İnsaf da yaxşı şeydi axı, Əlizadə Vaqif! 
Deyəsən, Əlizadə Vaqif hələ öz işinin mahiyyətinə yetərincə vaqif olmayıb və məsuliyyəti hələki dərk etmir. Əlizadə Vaqif, nəzərnizə çatdırım ki, icra etdiyiniz işi öz şəxsi marağınıza uyğunlaşdırıb işləmək səlahiyyətini sizə heç kim verməyib. Tullantıların daşınması "İstehsalat və məişət tullantıları haqqında Azərbaycan Respublikasının Qanunu”nda da öz əklsini tapmışdır. Hesab edirəm ki, qanundan irəli gələn müddəaları öyrənib, icra etsəniz sakinlər də zibil problemindən uzaq olmuş olarlar.
Qloballaşan dünyada yaşayırıq. İnkişaf etməyi qarşısına məqsəd qoyan hər bir ölkə öz vətəndaşlarının rahatlığı, sağlamlığı naminə modernliyi, ən yeni texnogiyaları tətbiq etməkdədir. Ölkə prezidenti cənab İlham Əliyev də hər zaman dövlətimizin inkişafı, xalqın rahatlığı, firavanlığı naminə müvafiq tapşırıqlar verir, dövlət proqramlarının icrasına nəzarət etmək üçün bölgələrə səfərlər edir, yerindəcə görülən işlərlə tanış olmağa çalışır. Müasirləşən, inkişaf edən respublikamızda əfsuslar olsun ki, bu kimi hallar yuxarı instansiyaların, eyni zamanda bilavasitə cənab prezidentin fəaliyyətinə kölgə salmaqdadır.