Mətbuat elə bir sahədir ki, ora yalnız qələmi və yazmaq istedadı olan kəslər daxil ola bilir. Bəlkə də buna görədir ki, bu gün oxuduğu sahə, peşədə özünü tapa bilməyənlər qələmlərinin gücü ilə mətbuatda çığır salıb, karyera qururlar. Hətta mediaya sadə müxbir kimi gəlib nazirliklərə, dövlət idarələrinə mətbuat xidmətinin rəhbəri vəzifəsinə təyin olunanlar da az olmayıb. Elə biz də bu dəfə fərqli peşə sahibləri olan mətbuat xidmətlərinin rəhbərlərindən yazmaq qərarına gəldik. 

Bu məqsədlə Modern.az saytı qısa bir araşdırma aparıb. Araşdırmamız nəticəsində məlum oldu ki, gündə bir neçə dəfə ünsiyyət qurduğumuz mətbuat xidmətləri arasında bir neçə diploma sahib olan siyasətçidən tutmuş ərəb dili müəllimi ixtisasına sahib olanlar var. Odur ki, başladıq araşdırmağa...

10 ildir ki, Prezidentin mətbuat katibi olan Azər Qasımov Azərbaycan Pedaqoji Xarici Dillər İnstitutunu, Bakı Dövlət Universitetini və Çenq Du Universiteti (Çin) bitirib və ilk iş yeri Azərbaycandan 100 kilometrlərlə uzaqda olub. Azərbaycan Respublikasının Çin Xalq Respublikasındakı səfirliyində tərcüməçi işləyən A.Qasımov daha sonra XİN-in Beynəlxalq Təşkilatlar İdarəsində, XİN Konsulluq idarəsində, İran İslam Respublikasının Təbriz şəhərindəki Baş Konsulluğunda, həmin ölkənin konsulluğunda attaşe-üçüncü katib, XİN-in Asiya, Afrika və Latın Amerikası ölkələri idarəsində üçüncü katib və ikinci katib, Milli Məclis Aparatının Beynəlxalq münasibətlər şöbəsinin müdiri vəzifələrində işləyib. 

Bizim yaşda olanlar onu çox yaxşı tanıyır. Azərbaycan Televiziyasında “Xəbərlər” verilişi ilə üzünü yaddaşımıza həkk etdiyimiz, həmkarımız kimi tanıdığımız Milli Məclisin mətbuat xidmətinin rəhbəri Akif Təvəkküloğlu da qeyri-ixtisas sahibidir. Əmək fəaliyyətinə İmişli rayon Mərkəzləşdirilmiş Kitabxana Sistemində başlayıb. 1981-ci ildə Azərbaycan Dövlət Universitetinin kitabxanaşünaslıq və biblioqrafiya fakültəsinə daxil olub, 1986-cı ildə həmin fakültəni fərqlənmə diplomu ilə bitirib. Fəal ictimaiyyətçi olduğuna görə ikinci kursdan fakültənin komsomol təşkilatının katibi olub. 1986-cı ildən 1991-ci ilədək Azərbaycan Dövlət Kitab Palatasında filial müdiri, sonra isə şöbə müdiri vəzifələrində çalışsa da, mətbuata, jurnalistikaya olan meyli və istedadı onu bu sahəyə gətirib. 1991-ci ildən 2006-cı ilədək Azərbaycan Dövlət Teleradio Verilişləri Şirkətində müxtəlif vəzifələrdə çalışıb. 2006-cı ildən isə Milli Məclisin mətbuat katibidir. 
Akif Təvəkküloğlu Milli Məclisə mətbuat katibi təyin olunduğu gündən ali qanunverici orqanın mətbuatla işi tam açıq olub. Ölkədəki dövlət qurumlarının mətbuat xidmətlərinin hansılarının jurnalistlərə açıq olduğunu müəyyənləşdirən sorğularda Milli Məclisin adı dəfələrlə ön sıralarda yer alıb. Bu məsələdə Akif Təvəkküloğlunun xidmətləri danılmazdır.

Yenicə 51 yaşın kürəyini yerə vuran Baş Prokurorluğun mətbuat xidmətinin rəhbəri Eldar Sultanov bu vəzifəyə jurnalistikadan gəlməyib. İxtisasca hüquqşünas və iqtisadiyyatçı olan həmkarımız Azərbaycan Aqrar Universitetinin iqtisadiyyat və Bakı Dövlət Universitetinin hüquq fakültələrini bitirib. Mətbuat katibi vəzifəsinə qədər Baş Prokurorluğun Təşkilat Analitik İdarəsinin prokuroru vəzifəsində çalışıb. 1983-cü ildən dövlət qulluğunda çalışan E. Sultanov 2001-2006-cı illərdə Azərbaycan Milli Məclisinin sədrinin köməkçisi, 2007-ci ildən isə prokurorluq orqanlarında xidmətə başlayıb. 2008-ci ildən Respublika Prokurorluğunun mətbuat xidmətinə rəhbərlik edir. Bu müddət ərzində o, KİV-lə qarşılıqlı münasibətlərin daha da yaxşılaşmasına və yüksək əməkdaşlığa nail ola bilib. Mətbuat xidmətlərinin fəaliyyəti ilə bağlı aparılan sorğularda dəfələrlə birinci yerdə olub. Hətta onun eyni vaxta iki jurnalistin sorğusunu cavablandırmağını da şahidi olmuşuq. Onu da deyim ki, E. Sultanov Baş Prokurorluğa tabe olan qrupların da jurnalistlərə açıqlama verməsinə şərait yaradır.  

Kənd Təsərrüfatı Nazirliyinin mətbuat xidmətinin rəhbəri Murtuzəli Hacıyevi də qeyri-ixtisaslı kadrlardan saymaq olar. Lakin işlədiyi nazirlikdə onun ixtisasına böyük ehtiyac var. Aqrar elmlər üzrə fəlsəfə doktoru Murtuzəli Hacıyev Prezident yanında Dövlət İdarəçilik Akademiyasını da bitirib. İlk iş yeri elə bu nazirliyin elm-təhsil və elmin tətbiqi baş idarəsinin nəzdində informasiya təbliğat və nəşriyyat, tədris şöbəsinin rəisi vəzifəsi olub. Daha sonra ictimai əsaslarla mətbuat xidməti yaranıb və həmin dövrdən mətbuat xidmətinin rəhbəri vəzifəsini tutub. Nəhayət, nazirliyin rəsmi ştatında rəsmiləşəndən həmin vəzifəni icra edən M.Hacıyevi mətbuat işçisi də adlandırmaq olar. Həmkarlarım onu mətbuatın yaxın dostu adlandırılar. Ona ünvanlanan sualları elə telefondaca lazımi şöbələrdən dəqiqləşdirdikdən sonra jurnalistlərə ötürən həmkarımız işinin öhdəsindən lazımınca gəldiyindən 18 ildir ki, bu postda işləyir.     

Qaçqın və Məcburi Köçkünlərin İşi üzrə Dövlət Komitəsinin mətbuat xidmətinin rəhbəri Elçin Qədimov  Prezident yanında Dövlət İdarəçilik Akademiyasında siyasi idarəetmə fakültəsini bitirib. Elə ilk iş fəaliyyətinə də Komitədən başlayıb. Prezidenti yanında Dövlət Qulluğu Məsələləri üzrə Komissiyanın keçirdiyi test imtahanlarını və müsabiqələri keçərək 2008-ci ildə Əli Həsənovla çiyin-çiyinə işləməyə başlayıb. 
O vaxtdan bu yana komitədə işləyir. İlk günlər Komitədə mətbuat xidməti departamentində baş məsləhətçi, daha sonra isə dövlət qulluğu komissiyasının xətti ilə mətbuat xidmətinin rəhbəri işinə təyin olunub. İşinin ustası olduğundan, jurnalistləri incitmədiyindən 7 ilə yaxındır ki, Komitədə yorulmadan işləyir.  

Nazirlər Kabinetinin mətbuat xidmətinin rəhbəri Akif Əli 1978-1987-ci illərdə Azərbaycan Dövlət Televiziya və Radio Verilişləri Komitəsində müxtəlif vəzifələrdə çalışıb. Radionun “Satira və yumor” şöbəsində kiçik redaktor, redaktor və şöbə müdiri (1978-83), Televiziyanın Gənclər üçün proqramlar Baş redaksiyasının Baş redaktoru (1983-87) olub. 1991-93-cü illərdə “Vətən səsi” qəzetinin baş redaktoru vəzifəsində çalışıb. Bakı Sosial İdarəetmə və Politologiya İnstitutunda (indiki Dövlət İdarəçilik Akademiyası) baş müəllim, dosent və Mədəniyyətşünaslıq kafedrasının müdiri (1992-94) işləyib. 1994-cü ildən Nazirlər Kabinetinin mətbuat xidmətinin rəhbəri vəzifəsində çalışır. Bir sözlə həmkarımız olmasa da, işinin öhdəsindən heç də pis gəlmir.  

Ölkədə istənilən halla bağlı rəqəmləri anındaca jurnalistlərə ötürən Meri Əmirova da qələm əhlindən saymaq olmaz. Statistika Komitəsi ilə mətbuat arasında körpü yaradan M.Əmirova iqtisadçıdır. 1977-ci ildə Azərbaycan Dövlət İqtisad İnstitutunu bitirib. Özünün də dediyi kimi, o vaxtdan indiyədək Dövlət Statistika Komitəsində şöbə müdiri vəzifəsində çalışıb. Dövlət qulluqçusu, kollegiya üzvü və prezident tərəfindən dövlət qulluğunda fərqlənməyə görə medalla təltif olunan qeyri-jurnalist həmkarımız 2011-ci ildə “Qızıl qələm” mükafatına layiq görülüb. Yəqin ki, bu da səbəbsiz deyil. Komitəyə təyin olunandan indiyədək M.Əmirova Azərbaycanda mətbuata ən açıq şəxslərdən biri kimi tanınır. Nə zaman, hansı rəqəmi əldə etmək istəsən e-mail poçta sualları göndərmək kifayətdir.  

Jurnalistikaya yeni gələn elə bir gənc qız tapılmaz ki, həm səbrinə, həm zahiri görünüşünə görə onunla maraqlanmasın. Onu daha da yaxından tanıyanda isə təbii ki, ilk sual evli olub-olmaması ilə bağlı olur. Söhbət Tələbə Qəbulu üzrə Dövlət Komissiyasının mətbuat xidmətinin rəhbəri Elnur Nağızadədən gedir. O, Bakı Dövlət Universitetinin Tarix fakültəsini bakalavr səviyyəsi üzrə fərqlənmə diplomu ilə bitirib. Komitə sözçüsü daha sonra yenə həmin Universitetdə beynəlxalq münasibətlərin tarixi və nəzəriyyəsi ixtisası üzrə fərqlənmə diplomu ilə magistr dərəcəsi alıb. Hər il tələbələri imtahanlarla sınağa çəkən TQDK-nın əməkdaşının özünü də hazırda tələbə adlandırmaq olar. Belə ki, Azərbaycan Respublikası Prezidenti yanında Dövlət İdarəçilik Akademiyasının dövlət və bələdiyyə idarəetməsi ixtisası üzrə 2-ci magistr təhsili alan həmkarımız TQDK-da 2006-ci ilin yanvarindan çalışır. İlk işinə Komissiyanın İctimaiyyətlə Əlaqələr şöbəsindən başlayan E.Nağızadə daha sonra struktur dəyişikliyi nəticəsində komissiyanın mətbuat xidmətinin rəhbəri vəzifəsinə təyin olunub. Hər kəsin istirahətə yollandığı an onların işlərinin ən qaynar vaxtı olur. Buna baxmayaraq  onu tanıyan jurnalistlər bilir ki, Elnur Nağızadənin qapısını döyən bütün suallar elə həmin gün cavablandırılır. Qısaca onu deyə bilərəm ki, jurnalistlər arasında heç bir ayrı-seçkilik qoymayan TQDK sözçüsü mətbuatı eyni anda məlumatlandırır.