Gənc və istedadlı yazıçı, Azərbaycan Yazıçılar Birliyinin üzvü Günel Eyvazlı  müsahibə verib.

- Ədəbiyyata nə zamandan marağınız formalaşdı?

- Deyim ki, kiçik yaşlarımdan yazmışam. Bu da elə-belə formalaşmayıb. Anamın ədəbiyyata marağı çox olub. Yadımdadır, hələ kiçik yaşlarımızdan bacımla mənə şeirlər əzbərlədərdi. Bir də evdə tək qalmaq məcburiyyətində qalırdım. 3-cü sinifdən. Valideynlərim nahar fasiləsinə gələnə qədər, qulaq yoldaşım hava radiosu olurdu. Orada ədəbiyyat verlişləri çox yayımlanardı. Çox güman ki, bunlar mənə təsir edib.
Orta məktəbdə güclü ədəbiyyat müəllimim olmayıb. Özümün mütailəyə böyük marağım olub. Kitabxanalara gedirdim. Dil kurslarına gedirdim.
Həm də Filologiya fakültəsini bitirmişəm. Bütün bunlar addım-addım məni ədəbiyyata gətirirdi. Orada oxuduğum illərdə yazılarım bir az da püxtələşdi.
İlk dəfə 2003-cü ildə Təbrizdə “Körpü” jurnalında dərc olundum. Bu həm təsadüf idi, həm də qismət. Valideynlərimin ana tərəfi Təbrizli idi. Və qismət elə gətirdi ki, elə ilk dərcim də Təbrizdə oldu. Sonra ardıcıl olaraq “Sirdaş” qəzetində, 2004-cü ildə Yeni Azərbaycan qəzetində dərc olunmağa başladım. O zaman qəzetin cümə nömrəsi sırf ədəbiyyata aid olurdu. Sonra “Ulduz”da və digər qəzet və dərgilərdə yayımlanmağa başladım. 2005-ci ildə ilk kitabım nəşrə tam hazır idi. Kitab rəy də almışdı. Qismət elə gətirdi ki, müəyyən səbəblərə görə onun dərci mümkün olmadı. Və beləcə qaldı.
Yaradıcılığımın ən pik nöqtəsinə 2011-ci ildə Bakı Slavyan Universitetinə Yaradıcılıq fakültəsinə daxil olmağımdan sonra çatmışam. Sıralarımızda güclü gənc yazarlar çox idi. Həm də ciddi tənqidlə üzləşirdik. Yazılarımızı dəyərli pedaqoqlarımızın qarşısında oxumaqdan çəkinirdik. Çünki, hər an kritika ilə üzləşirdik. Elə yazarlar oldu ki, Türklər demiş pes etdilər. Yaradıcılıqlarına nöqtə qoydular. Mən isə xaraktercə üsyankar adamam, yəni heç vaxt mübarizəmdən əl çəkmərəm. Çünki, getmək istədiyim yeri bilirdim, reallaşdırmaq istədiyim arzularımı bilirdim. Bəli, mən fəxr edirəm ki, Kamal Abdulla, Niyazı Mehdi, Rəhim Əliyev, Tehran Əlişanoğlu kimi dəyəli pedaqoqlardan dərs almışam. Onların tövsiyyələrinə düzgün riayət etmişəm. Bizim uğurlarımız onların zəhmətlərinin və bizim zəhmətkeşliyimizin nəticəsidir. 
İlk dəfə məhz fakültədə oxuyan zaman özümü jurnalist kimi kəşf etdim. Jurnalistik məqalələrim ilk dəfə “Dayaq” saytında dərc olunurdu. Məni narahat edən mövzuları məqaləyə çevirirdim. Bu da ictimaiyyət tərəfindən rəğbətlə qarşılanırdı. Bu rəğbət, oxucuların mənə gələn çoxsaylı təşəkkürlərindən, razılıqlarından bəlli olurdu. Ətrafımda yüzlərlə oxucu kütləsi var idi. İnsanlar mənim yazılarımı gözləyirdilər. Məqalələrim reytinq gətirdiyindən, həm də insanları düşündürən mövzulara toxunduğumdan onları digər saytlar məndən xəbərsiz yayımlayırdılar. Hətta, problemi olanlar belə mənə yazırlar. Mən də çalışdığım qədər onları yazılarımda işıqlandırıram. Sonra məqalələrim qəzetlərdə yayımlanmağa başladı. 

İrəliləyişim, uğurlarım, dost bildiyim çox insanların qısqanclığına səbəb olurdu. Mənim üzərimə çox təpkilər oldu. Çox. Allah, mən nələr yaşamadım. Mən ya qələmi əlimdən qoymalı idim, ya da davam etməli idim. Daha çox susub hərəkət etməyə üstünlük verdim. Heç nə və heç kim məni yaradıcılıq yolumdan sapındıra bilməzdi. Sonra get-gedə daha tanınmış saytlara ayaq açdım. Sonra tərcümələrlə məşğul oldum. Yaradıcılıq ampulamı dəyişdim. Hekayə janrında yazmağa başladım. Bütün bunlar zaman-zaman mütailəmin dərinləşməsi nəticəsində baş verirdi. Bu da mənim ədəbiyyatda formalaşma ardıcıllığım. Qeyd edim ki, 2 ildir bir roman üzərində işləyirəm. İnşallah inanıram ki, çox fərqli, özüməməxsus bir roman ərsiyəyə gələcək.

- Sizcə yazıçı olmaq asanddır?

- Heç nə həyatda asan deyil. Heç nə. Əziyyət çəkməsən bəhrəsini görməzsən. Mən çox zəhmətkeşəm. Yazıçılıq həm də Allah vergisidir. Mən əvvəllər deyirdim, yazarları ilahiləşdirmək lazım deyil. Bəli, doğrudur hardasa ilahiləşdirməyə ehtiyac yoxdur. Amma, onlar digər insanlardan fərqlidirlər. Mən əsl istedadlıları nəzərdə tuturam.

- Ədəbi yaradıcılıqla məşğul olanların həyatı digər peşə sahiblərinin həyatından çoxmu fərqlənir ?

- Var tənbəl insan, var fəal insan. Tənbəllər elə ədəbiyyatda da uğur qazana bilmir. Ədəbiyyat yalnız ilham pərisi deyil. Ədəbiyyat alın təridir, mütailədir, zəhmətdir, çalışqanlıqdır. Yəqin bir az çətinlik xanımlar üçün ola bilər. Azərbaycan cəmiyyətində uğurlu xanımın, istedadlı xanımın paralel olaraq xoşbəxt olması bir az müammalı məsələdir. Xoşbəxtıliyi hərə bir şeydə görə bilər. Mən özümə həm xoşbəxt deyə bilərəm, həm də yox. Bəlkə də həyatda tam heç nə yoxdur. O da ola bilər. Hər halda bu mənim həyatımdır və mən ondan çox razıyam. 
Ümumiyyətlə, insanın qarşıdakı məqsədə çatması üçün iki yolu var. Mən həmişə uzun və çətin yolu seçmişəm. Və ən düzgünü də elə budur. 
Həm də fərqlilik, rəngarənglikdə də ola bilər. Bəli, yaradıcı insanın ətrafı fərqlidir, çevrəsi bir az dardır, yəni hər adamla ünsiyyət saxlamaq olmur. Mən daha çox sükutda olmağı, özümlə danışmağı sevirəm. Teatrda, tamaşalarda, konsertdə olmağı, təbiətin qoynunda olmağı çox sevirəm. Daha çox rəsm əsərlərinə baxıram. Sürrealist rəsm əsərlərinə daha çox üstünlük verirəm. Real, təbiət tablolarını daha əvvəlki kimi sevmirəm. Kimlərinsə həyata pessimist baxışını sevmirəm, elə insanlardan uzaq dayanıram. Bəzi insanlar enerji vampirləridir. Mümkün qədər belələrindən qaçıram. Çünki onlarla ünsiyyətdə özümü tükənmiş sayıram. Yaradıcı insanın, əsl yaradıcı insanın həyatı çox fərqlidir, rəngarəngdir. Bu rəngarənglik çox maraqlıdır əslində. Mənim üçün savadlı bir insanı dinləmək, ədəbi söhbətlərin iştirakçısı olmaq zövqü, dünyanın heç bir zövqü ilə əvəz oluna bilməz.

- Bir neçə gün əvvəl "Prezident təqaüdünə" layiq görüldünüz. Bu münasibətlə Sizi təbrik edirik. Gözləyirdinizmi bu addımı?

- Təşəkkür edirəm təbrikə görə. Gözlənilən idi. Mən artıq 11 ildir ədəbiyyatdayam. Az deyil. 2013-cü il “Yuxumu xeyrə yozun” adlı kitabım işıq üzü gördü. Sonra Azərbaycan Yazıçılar Birliyinə üzv edildim. Yazıçılar birliyində çox adam imzamla tanış idi, yazılarım ilə tanış idi. Məqalələrim ilə tanış idi. Təvəzökarlıqdan uzaq olsa da mən buna layiq idim. Baxmayaraq ki, yazılarımda müxalif yönümlüyəm. Cəmiyyətdə baş verən neqativ halları görüb və deyəcək qədər cəsarətliyəm. Həm də müstəqil, demokratik bir ölkənin vətəndaşıyam. Buna görə də təqaüd mənim üçün gözlənilən idi və mənim halal haqqım idi. Bundan öncə də dövlət jurnallarından təşəkkür məktubları gəlirdi. Yaradıcılığım izlənilirdi. Ümid edirəm ki, gələcəkdə gənc yazarlara təqaüdlə bərabər, yazıçı kimi yetişməsi üçün xarici ölkələrə ezamiyyətlər də təşkil olunacaq. Bax bu əla olar. Çünki, qapalı bir mühitdə inkişaf qeyri-mümkündür. Ədəbiyyatımızın uğuru üçün münbit şarait lazımdır. 
Dünya qapılarını çox az sayda yazıçılarımızın əsərləri döyür. Gənclərimiz arasında dünyaya çıxa biləcək yetərincə istedadlı şair və yazıçılar var. Məncə, çağdaş ədəbiyyatımız öz sözünü deyə biləcək.

- Ümumiyyətlə yaradıcılığınızda uğurların əsasında Sizcə nə dayanır ?

- Yaradıcılığımdakı uğurların əsasında Allahımın mənə verdiyi istedad dayanır. Onun mənə bəxş etdiyi vergi dayanır. Mən buna görə Allahıma minnətdaram. Mən cəmiyyət içində tamam fərqli adamam. Sadə, çox sadə. Amma, bu əsl Günel deyil. Siz məni yazı prosesində görsəniz, mənim daxilimdə yatmış və məni düşündürən məqamların həmsöhbəti olsanız əsl Güneli görərsiniz. Amma, mən bunları hər adamla danışmıram. 
Çox hissiyyatlıyam. Kiminsə daxilində pıçıldadığı sözləri eşidəcək qədər vergiliyəm. Bunu ilk dəfədir etiraf edirəm. Mən insanları uzaqdan oxuyuram. Belə şeylər rahat yaşamaq üçün insanı çox incidir. Çünki, üzünə tuşlanmış təbəssümün arxasında, nələrisə müşahidə etdikdə insana pis təsir edir. Mənə dayaq olduqları üçün valideynlərimə minnətdaram. Yaradıcı insanlar çox kaprizli olur. Onlar mənə dözürlər. Çılğınlığıma dözürlər. Və bilirlər ki, beləyəmsə, demək nəsə yazılacaq. Və o nəsənin mənim daxilimdən çıxmasına qədər səbr nümayiş etdirirlər. 
Uğurlarımın əsasında həm də ciddi təbiətim dayanır. Sağ olsun dostlarım ki, məni elə olduğum kimi qəbul edə bilirlər. Uğurlarımın əsasında həm də, zəhmətim dayanır, temperamentim, çalışqanlığım, istedadım, savadım, mütailəm dayanır.(ulusinfo.com)