Adil Qeybulla: “Səhiyyəmizin çatışmayan ən mühüm problemlərindən biri Qərbin mövcud kliniki protokollarının ölkəyə gətirilməməsidir ” 

“Doğum evlərində ana ölümləri ilə bağlı məsələlər mətbuata çıxarılanda peşəkar formada analiz edilmir. Belə ki, baş verən ölüm halları ilə bağlı peşəkar rəyi olmadığına və situasiya düzgün araşdırılmadığına görə hadisəni yalnız həkimlərlə əlaqələndirməyə çalışırlar. Nəticədə ümumi rəy bu cür yaranır.”

Bu sözləri Xeberle.com-a müstəqil ekspert, tibb elmləri doktoru, professor Adil Qeybulla ölkə xəstəxanalarında son zamanlar doğuş zamanı ana ölümlərinin artma səbəbləri ilə bağlı açıqlama verərkən qeyd edib.

Müsahibin sözlərinə görə, əksər hamiləliklər normal və fizioloji qaydada keçmir: “Burada xeyli patoloji dəyişiklilklər baş verir ki, kifayət qədər riskli məsələlərdir. Nəticədə baş verənlər müəyyən fəsadlara və ölümlərə gətirib çıxardır. Ona görə də hamiləliklərin aparılması texniki protokollar üzrə olmalıdır. Səhiyyəmizin çatışmayan ən mühüm problemlərindən biri Qərbin mövcud kliniki protokollarının ölkəyə gətirilməməsidir. Sözügedən kliniki protokollar bütün dünyada qəbul edilmiş qaydadır və hamilə qadınlar doğuş müddətinə qədər nəzarətdə saxlanılır. Eyni halda hər bir ağırlaşma və ölüm hallarının səbəbləri ayrıca araşdırılır. Nəticədə aparılan araşdırmalara görə ümumi bir nəticəyə gəlinir və səbəblər aradan qaldırılır. Bütün dünyada doğuş zamanı baş verən neqativ hallar məhz bu cür yollarla həllini tapır.”

Ölüm halları ilə bağlı həkim səriştəsizliyinin də payının az olmadığını söyləyən ekspert, “ təbii ki, həkimlərin də baş verən hadisələrdə payı var. Lakin bununla bağlı ortalıqda obyektiv və ciddi araşdırma olmadığına görə, həkimlərlə bağlı konkret nəyisə demək mümkün deyil”, - deyə bildirdi:

 “Belə ki, bununla bağlı ilk öncə peşəkar ekspert qrupu tərəfindən araşdırma aparılmalıdır. Yalnız bundan sonra ölüm hadisələrinin konkret səbəbləri və səbəbkarları barədə nəyisə demək mümkündür. Hətta bəzi vaxtlar vətəndaşların özləri də araşdırmanın aparılmasın da maraqlı görsənmirlər. Yaxşı olardı ki, hər bir hadisə məhkəmə tibbi ekspertizası tərəfindən araşdırılsın. Lakin insanlar özləri buna meyilli deyillər və bəzi hallarda bundan çəkinirlər.”

Xeberle.com 

Xəyal Şükür