Təhsil hər bir ölkənin həyatında mühüm rol oynayan amillərdən biridir.

Təhsilin inkişaf və mənimsənilməsində isə müəllimlərimizin rolu əvəzolunmazdır. Bəs müəllimlərimiz üçün yaradılan şərait bugünkü gündə müəllimlərimizi qane edirmi?Təhsil nazirliyindən verilən açıqlamalara görə ölkəmizde müəllimlər üçün yaradılan şərait və verilən maaşlar qaneedici sayılsa da, sualımıza cavab olaraq bugünkü günümüzdə canlı şahidi olduğumuz şəraitin bu deyilənləri tam olaraq doğrultmadığı qənaətinə gəlirik. Buna misal olaraq deyə bilərik ki,Təhsil nazirliyinin Strateji təhlil, planlaşdırma və kadrların idarə olunması şöbəsinin müdiri Fərzəli Qədirovun bu il rayonlara 800 müəllimin işləməyə göndərildiyi və onların heç birinin göndərildiyi yerdən imtina etmədiklərini bildirib.

Amma hal-hazırki vəziyyət bunu göstərir ki,ucqar kəndlərə və digər rayonlara göndərilən müəllimlərin əksəriyyəti getdiyi yerlərdə lazımi şərait və maaşla təmin olunmadıqlarına görə orada qalıb dərs demək istəmirlər. Unutmamalıyıq ki, müəllimlik çox ali bir peşədir. Gənclərsə bizim gələcəyimiz. Amma çox təəssüflər olsun ki, gənclər bizim gələcəyimizdir deyildikdə, nədənsə idmanın müxtəlif sahələrində gənclərimizə dövlət tərəfindən göstərilən qayğı nəzərdə tutulur. Birmənalı şəkildə deyə bilərik ki,gənclərimizin gələcəyi daha çox təhsilimizə yaradılan şəraitdən və onun gələcəyindən asılıdır. Bu təhsilin də bizlərə kimlər tərəfindən verildiyi hamıya məlumdur. Müəllimlik sahəsinə maddi marağın az olmasının nəticəsi olaraq bir çox şəxslər ya bu peşə üzrə təhsil almırlar, ya da bu peşəni bitirənlər tam aidiyyatı olmayan sahələrdə çalışırlar. Həmçinin məktəblərimizə nəzər saldığımızda kişi müəllimlərimizin azlıq təşkil etdiyini görmək mümkündür. Bu isə onlara ayrılan məvacibin ailə məişət problemlərini tam olaraq ödəməməsindən irəli gəlir. Bütün bu ünsürlər birmənalı olaraq müəllimlik sahəsinin tənəzzülünə gətirib çıxarır. Bu tənəzzülsə bütövlükdə həmin ölkənin təhsil sisteminin olmamasından və oradakı çatışmazlıqlardan qaynaqlanır. Çünki, hər bir görkəmli tanınmış alimlərin professorların da bugünkü səviyyədə olmalarının başlıca əsas səbəbi onların müəllimləridir. Sevimli şairimiz və dramaturqumuz Abbas Səhhətin həkimlik peşəsinə yiyələnməsinə baxmayaraq həkimlikdən müəllimliyə keçid etməsi müəllimlik peşəsinin necə də müqəddəs olduğuna bariz nümunədir. Hətta A.Səhhətlə bağlı məqalələrin birində ona sual verilir ki, nə üçün həkimlikdən müəllimliyə doğru addım atdın ?” O isə bunun cavabında : "Mən millətimin ən böyük xəstə yeri olan təhsilini sağaltmaq üçün bu peşəni seçmişəm” -deyə cavab verir.

Digər ölkələrin müəllimləriylə müqayisədə bizim ölkəmizdəki müəllimlərin maaşı həyat səviyyəsinə yetməyəcək qədər cox aşağıdır.

Məsələn, ABŞ, Böyük Britaniya, Almaniya, Avstraliya,Yaponiya kimi ölkələrdə yaşayan müəllimlər Azərbaycanla müqayisədə 10 dəfə artıq maaş alır.

Müəllimlər ABŞ-da 3000 , Böyük Britaniyada 5000, Fransada 1100, Yaponiyada 2000, Avstraliyada 2500, Almaniya isə 2000-3000 dollar əmək haqqı alırlar. Bu göstərici isə bizim ölkədə 200-300 man təşkil edir. Açığı bugünkü vəziyyətdə bu maaşla bir müəllimin öz həyat səviyyəsini təmin etməsi çox çətindir. Biz yeni yaranmış müstəqil dövlət ola bilərik, lakin bunu qeyd etmək lazımdır ki, bu ölkə hal-hazırki imkanlarıyla müəllimlərə ayrılan maaşları daha da artıra bilər.

Hadi Rəcəblinin bir sözü var: "Əgər müəllim 150-200 manat maaşla dolana bilmirsə onda gedib işdən sonra fəhləlik etsinlər”.

Görünür ki, Hadi Rəcəblinin özü bu qədər maaşla öz maddi ehtiyaclarını qarşılayır. Bu sözlərdən belə bir nəticəyə gəlmək olur ki,təhsilimizə və müəllimlərimizə verilən qiymət çox aşağı səviyyədədir.

Nail Mehdiyev