Artıq Bakı şəhərinin 3 rayonunda - Binəqədi, Yasamal və Nəsimidə 4 Mənzil Mülkiyyətçiləri Müştərək Cəmiyyəti (MMMC) yaradılıb və Ədliyyə Nazirliyində dövlət qeydiyyatına alınıb. 

Paytaxtın bir neçə rayonunda 20-dən artıq çoxmənzilli binada yeni idarəetmə üsullarının tətbiqi, eləcə də MMMC-lərin formalaşması ilə bağlı müvafiq təşkilati işlər görülür. 

60 minə yaxın iş yeri olacaq 

İqtisadçı-ekspert Samir Əliyevin fikrincə, yeni qurumlar yaradılacağı təqdirdə ölkə üzrə təxminən 60 min yeni iş yerinin açılması mümkündür: “Hazırda ölkədə 15 minə yaxın çoxmənzilli bina mövcuddur. Onların sayı getdikcə artır və eyni zamanda 1-2 mərtəbəli binalar çoxmərtəbəlilərlə əvəzlənir. Bu binaların əksəriyyətinə Sovet dövründə olduğu kimi, MİS-lər və az bir qisminə MTK-lar xidmət göstərir. MİS-lərin əvəzində yaradılacaq MMMC-lərə ən azı 3 nəfər işçi tələb olunacaq. İşçilərin sayı mənzillərin sayından asılı olaraq 2 dəfəyədək arta bilər. Bura MMMC sədri, mühasibi, texniki işçiləri və s. daxildir”. 

15 minə qədər MMMC yaradıla bilər 

Bina idarəçiliyinin MMMC-lərə verilməsi həmçinin ölkədə kommunal xidmət bazarının formalaşmasını şərtləndirəcək. Yəni, həmin qurumun tərkibində binaların cari təmirindən tutmuş kapital təmirinə qədər olan işləri həyata keçirən özəl şirkətlər və paralel olaraq iş yerləri yaradılacaq: 

“İdarəetmə üsulları arasında binaların MMMC-lər vasitəsilə idarə edilməsi təcrübəsi dünyaya daha geniş yayılıb. Bu qurumlar beynəlxalq təcrübədə kondominium adlanır. Hazırda 4 MMMC dövlət qeydiyyatından keçib. Qeydiyyat sistemi sadələşdirilərsə və bütün çoxmərtəbəli binalar bu addımı atarsa, onların sayı 15 minə qədər arta bilər”. 

MMMC-nin gəliri hardandır? 

Xatırladaq ki, MMMC-lər çoxmənzilli binanın sahə mülkiyyətçilərinin könüllü birliyidir. Bu qurum çoxmənzilli binada daşınmaz əmlak kompleksini birgə idarə etmək, binanın ümumi əmlakının istismarını, ona sahibliyi, ondan istifadəni və qanunvericiliklə müəyyənləşdirilmiş hədlərdə barəsində sərəncam verilməsini təmin edir. MMMC-lər qeyri-kommersiya təşkilatı olan hüquqi şəxsdir və onun əsas məqsədi mənfəət götürmək deyil. MTK-lardan fərqli olaraq, MMMC-lərin rəhbəri bina sakinləri tərəfindən seçilir. MMMC-lərin gəlirləri əsasən 3 mənbədən formalaşır: sakinlərin verdiyi aylıq haqlar, dövlət büdcəsindən ayrılan maliyyə yardımları və MMMC-nin fəaliyyəti nəticəsində (satış və icarə) əldə olunan gəlirlər.(xezerxeber.com)