. Sumqayıt şəhərindəki Heydər Əliyev Mərkəzinin qarşısında 1 iyun-Uşaqların Beynəlxalq Müdafiəsi Günü münasibətilə bayram şənliyi təşkil edilib.
Şəhər icra hakimiyyəti başçısının müavini Lalə Hacıyeva tədbirdə çıxış edərək bu günün əhəmiyyətindən danışmışdır. Bildirilmişdir ki, 1 iyun bütün dünyada Uşaqların Beynəlxalq Müdafiəsi Günü kimi qeyd olunur. Bu da təsadüfi deyildir. Çünki müasir dövrdə uşaqların problemlərinin həlli, uşaq hüquqlarının qorunması ən aktual vəzifələrdən biridir. Uşaqların yüksək qayğı ilə əhatə olunması, onların əlverişli mənəvi və sosial mühitdə böyümələri üçün zəruri şəraitin yaradılması, hərtərəfli şəxsiyyət və layiqli vətəndaş kimi formalaşması əsası ümummilli lider Heydər Əliyev tərəfindən qoyulmuş dövlət uşaq siyasətinin istiqamətlərindən birini təşkil edir.
Son illər uşaqların təlim-tərbiyəsinin daha da təkmilləşdirilməsi istiqamətində mühüm tədbirlərin həyata keçirildiyini qeyd edən L.Hacıyeva bildirmişdir ki, Prezident İlham Əliyev və Heydər Əliyev Fondunun prezidenti Mehriban Əliyeva uşaqların problemlərinə böyük diqqət və qayğı ilə yanaşırlar.
Diqqətə çatdırılmışdır ki, Heydər Əliyev Fondu tərəfindən uşaqların hərtərəfli inkişafı, keyfiyyətli təhsil, yüksək standartlara cavab verən tibbi xidmətlərlə təmin olunması istiqamətində önəmli layihələr həyata keçirilir.
Sonra Sumqayıtda fəaliyyət göstərən uşaq bağçaları və məktəb şagirdləri hazırladıqları bayram konserti proqramı ilə çıxış etmişlər. Uşaqlardan ibarət rəqs qruplarının ifaları, şən və hazırcavab balacaların şeirləri və mahnıları, rəngarəng səhnəciklər tamaşaçılar tərəfindən maraqla qarşılanıb