Bakı şəhərindən sonra Sumqayıt da avtoxuliqanların meydanına çevrilir.Mübariz adlı şəhər sakini Milli.Az-a Azərbaycan prospektindəki "avtoş"luqlardan yazıb:

“Yol birbaşa Nəsiminin heykəlindən başlayaraq, Sumqayıt şəhər İcra Hakimiyyətinə qədər uzanır. Bu yolda dəfələrlə qəzalarla nəticələnən faciəli ölüm halları baş verib. Maşınların səs boğucularından çıxan tükürpədici səslər, qulaqbatırıcı musiqi səsləri, avtomobillərin, sözün əsl mənasında, “ralli” yarışlarına çıxması insan həyatı üçün böyük təhlükədir. Övladlarım hər gün bu yolla məktəbə gedib-gəlirlər. Onları sağ-salamat evdə görəndə Allaha dua edirəm ki, şükürlər olsun, qudurğan məmur balalarının faciəsindən bu gün qurtulublar. Nə qədər həyəcan içində yaşamalıyıq? Harınlamış və millətinin qanını içməyi vəzifə borcu elan etmış bu qudurğanlar barədə ciddi ölçü gotürün”.

Sumqayıt şəhər Yol Polis Şöbəsinin təbliğat-təşviqat inspektoru Nizami Yusifov Milli.Az-a açıqlamasında bildirdi ki, həmin ərazidə yol polisi xidmət aparır. Onun sözlərinə görə, avtoxuliqanlıq edən sürücü aşkarlanarsa, dərhal cəzalandırılır: “Bir küçədə bütün avtoxuliqanlara nəzarət etmək mümkün deyil. Ola bilsin yol polisinin gözündən yayınıb. Bu dəqiqə bir avtoxuliqan tutularaq məhkəməyə aparılır”.