Baş nazir Artur Rasizadə "Azərbaycan Respublikası Vergi Məcəlləsinin 220.8.1-ci maddəsinə uyğun olaraq sadələşdirilmiş verginin məqsədləri üçün Bakı şəhəri, habelə onun qəsəbə və kəndləri üzrə zonaların sərhədləri”ni təsdiq edib.

Sənədə görə, Bakı şəhəri, habelə onun qəsəbə və kəndləri üzrə 12 zona müəyyənləşib. Bununla da Azərbaycanda mənzilin satışı zamanı ödəniləcək verginin yeni məbləğləri məlum olub.

Daşınmaz əmlak üzrə ekspert Ramil Osmanlı mənzil alqı-satqısı ilə bağlı yeni qayadları AzVision.az-a şərh edib. 

Ekspert bildirib ki, bundan əvvəl mənzilin satış dəyəri 120 min manatı ötürdüsə, o zaman həmin əmlak Əlavə Dəyər Vergisinə (ƏDV) cəlb olunurdu. 

"Eyni zamanda burada mənzilin alındığı və satıldğı dövr arasındakı fərq müəyyən olunurdu və satış qiyməti alış qiymətindən baha idisə, aradakı fərqə görə mənfəət vergisi ödənilirdi. İndi Vergilər Nazirliyi bu qaydaları ləğv edib və yeni qaydalar tətbiq edib. Yeni qaydalar Bakı, Sumqayıt şəhərləri və Abşeron rayonuna aiddir. Bu yerlər üçün zonalar üzrə qiymət müəyyənləşib. Regionlar üçün də bu qiymət var. Şəhərdə isə zonalar üzrə qiymətlər dəyişir”. 

R.Osmanlı qeyd edib ki, yeni qaydalara əsasən vergi rüsumu hesabat dövrünün sonuna qədər deyil, məhz alqı-satqı zamanı ödənilməlidir: "Vergi rüsumu satış yerində notariuslarda ödənməlidir. Əvvəlki qaydalarda vergi ödənişləri hesabat dövrünün sonun qədər ödənilə bilərdi, indi isə notariusda alqı-satqı olunan gün dərhal həmin əmlakın vergisi tutulur. Notarius bunu etməsə, həmin əmlakın vergi yükü sənədi imzalayan notariat kontorunun üzərində alır. Bəzən vətəndaş vergidən yayınırdı. Bunun qarşısını almaq üçün onu satış zamanı vergiyə cəlb edirlər. Vətəndaşın satış zamanı əldə etdiyi vəsaitdən vergi tutulur. Əvvəlki qaydalarla müqayisədə ev alıq-satqısı qismən sadələşib. 

Məsələn, 100 kv/m mənzilin Bakının mərkəzində qiyməti təqribən 250 min manatdır. Qaydalar dəyişənə qədər 250 min manatdan 45 min manat ƏDV ödənməli idi. İndi isə həmin 100 kvm mənzil 1.5 əmsalı 4-ə vurulur, 1kvm üçün 60 manat olmaqla vergi ödənilir. Bu da 6000 manat təşkil edir. İndi yeni qaydalarla mənzillər ümumiyyətlə ƏDV-dən azad olundu. İndi isə qaydalar sadələşdirilib”.

Anar Kəlbiyev