Bakı şəhərində təxminən iki ay əvvəl yoxa çıxmış avtobus dayanağından, hələ də, səs-soraq yoxdur. Bakı-Sumqayıt yolu üzərində, "Ekologiya" postuna yaxın yerüstü piyada keçidinin yanında olan dayanacaq bir neçə ay əvvəl yoxa çıxıb. Elə o vaxtdan dayanacağın taleyi qaranlıq qalıb. Dayanacağın olmamasından əziyyət çəkən sakinlər artıq bu problemlə bağlı Milli.Az saytına ikinci şikayət məktubu ünvanlayıblar. Bu məktub da əvvəlki ilə eyni məzmundadır: “"Binəqədi rayonu, Bakı-Sumqayıt yolunda, "Ekologiya" postuna çatmamış yerüstü piyada keçidi yoxa çıxıb. Sərnişinlər üçün təhlükəli vəziyyət yaranıb. Yayda istidən, qışda isə yağış-qar sularında əziyyət çəkirik”.

 

İlk şikayət məktubunun cavabında Binəqədi rayon İcra Hakimiyyətinin ictimai-siyasi və humanitar məsələlər üzrə şöbə müdiri Nuridə Allahyarova bildirmişdi ki, həmin ərazidə vaxtilə olmuş dayanacağın yenidən qoyulması haqda araşdırmadan sonra cavab verəcəyini desə də, problem, hələ də, həll edilməmiş qalıb.

 

N.Allahyarova bu dəfəki cavabı da əvvəlkindən fərqli olmadı: “Dayanacaqların yerini Nəqliyyat Nazirliyi təyin edir və Bakı şəhər İcra Hakimiyyəti tərəfindən qoyulur. Bu məsələnin Binəqədi rayon İcra Hakimiyyəti ilə heç bir formada əlaqəsi yoxdur. Lakin rayonumuzun ərazisi və bu problemdən sakinlərimizin əziyyət çəkdiyini nəzərə alaraq, həmin əraziyə dayanacaq qoyulmasına çalışacağıq”. 

Anar Məmmədov