“Uğurun sirri” layihəsinin növbəti qonağı tanınmış bəstəkar, Xalq artisti Eldar Mansurovdur.

Eldar müəllim, fərqliliyiniz fərdliliyiniz haqında nə deyə bilərsiniz? 

- ALLAH insanların hər birini digərindən başqa cür yaradır. Məni də belə yaradıb, hamıdan fərqli və hamıdan fərdli. 

Sizcə, insan oğlunun ən böyük uğuru nədir? Ümumiyyətlə, bir insanın uğurlu olub-olmadığını necə müəyyənləşdirə bilərik?

- Zənnimcə, əgər bir insan həyatda öz layiqli yerini tapa bilirsə və cəmiyyətə xeyri ilə digərlərindən fərqlənirsə, düşünürəm ki, uğurlu olmaq məhz budur.

Bəs, uğurun rəngi, dadı, qoxusu, səsi, görüntüsü necədir və ona toxunmaq nə zaman mümkündür? 

- Uğurlu olmaq üçün təkcə istedadlı olmaq azdır. Burda həm də bilikli, savadlı olmaq lazımdır və bir az da gərək bəxtin gətirsin.

Apardığınız mübarizədə uğursuzluqlarla üzləşəndə nə edirsiniz? 

- Mən həmişə başladığım işi sona çatdırıram, yarı yolda heç vaxt dayanmıram. Həyat təkcə sevgi-məhəbbətdən ibarət deyil. Həyat mübarizədir. İnsan hər zaman, hər şey üçün mübarizə aparır. Yəni, birinci olmaq üçün, xoşbəxt olmaq üçün və s.

Hər insanda bir istedadın olduğunu söyləyərlər, bunu necə üzə çıxarmaq olar sizcə? 

- Hər bir insanı öz əməllərinə görə tanıyırlar. Düşünürəm ki, bunu üzə çıxarmaq lazım deyil. Hər insanın istedadı üzdədir, onu hamı görür. Məsələn, Hitlerin və Napoleonun istedadı vurub dağıtmaqdır və yaxud, Üzeyir Hacıbəyovun, Fikrət Əmirovun istedadı musiqi yaratmaqdır.

Ümumiyyətlə, bir insanın uğurlu olub-olmadığını necə müəyyənləşdirə bilərik? 

- Bunu müəyyənləşdirmək heç də lazım deyil. Bu insanın ancaq əməllərinə baxmaq və onun uğurlarından düzgün qərar çıxarmaq bəs edir. 

Uğurun düsturunu necə açıqlayardınız? 

- Uğurun düsturu olmur. ALLAH insanların hamısına həyatdan başqa hədiyyə olaraq bir pay da verib. Kimsənin payına uğur çıxır, kimsənin isə uğursuzluq.

Bəs, uğurun başlanğıcı və sonu varmı?

- Bəli var. Hər şeyin əvvəli olduğu kimi sonu da var.

Bəzi gənclər bir işə başlayanda “Düşün, tətbiq et və nəticələndir” prinsipini unudurlar. Yəni, onlar düşündüklərini ya tətbiq etmir, ya da nəticələndirmirlər. Bu problemlə üzləşənlərə nə söyləmək istərdiniz? 

- Bu bəzi gənclərin yox, ümumiyyətlə bütün gəncliyin problemidir. Ona görə ki, gənclər əvvəlcə nəyi isə edirlər, yalnız bundan sonra etdikləri üzərində düşünürlər. Zənnimcə bu problemin həlli yoxdur. Həmişə belə olub, belə də olacaq.

“Yanlışlar olmadan doğrular tapılmaz” - deyirlər. Uğursuzluq yanlışlardanmı doğar?

- Yox, uğursuzluq yanlışları təkrar etməkdən doğur.

Övladlarınızın gələcəkdə uğurlu ola bilməsi üçün nə edirsiniz? Daha fərqli davrana bilirsiniz? 

- Övladlarıma yalnız bir tövsiyəm olub – “Oxuyun və bilikli olun, öz işinizin peşəkarı olun. Onda bütün qapılar sizin üçün açıq olacaq”.

Sizcə uğura götürən yolda insanların ən güclü silahı nədir? 

- Bunun iki amili var. Birincisi – savad və bilik. İkincisi isə bəxtdir.

İnanmaq asandır, yoxsa inandırmaq?

- Əlbəttə ki, inanmaq. Elə bununla bağlı atam (C.M- tarzən, Azərbaycanın xalq artisti Bəhram Mansurov) həmişə deyərdi - "Mən ağlamasam, səni heç vaxt ağlada bilmərəm. Səni ağlatmaq üçün özüm gərək ağlayım". Səni inandırmaq üçün, özüm gərək inanam.

Həyatın enini və uzununu ölçdünüzmü heç, yaşamı üzün edən nədir? 

- Hələ ölçməmişəm, amma düşünürəm ki, yaşamı uzun edən həyatın enidir. Çünki, yaşadığımız dövrdə etdiyimiz səhvlər və doğru hərəkətlər zənnimcə, məhz həyatın eninə düşür. Həyatın uzunu isə həm düz, həm də müəyyən nöqtəyə qədərdir. İnsan yaşadığı zaman yolunu heç vaxt düz gedə bilmir. Çünki həyat boyu düz yol olmur. Hər bir insanın yolu eniş və yüksəlişlərdən ibarət olur.

Əgər Sizə dünyada yalnız bir şeyi dəyişdirmək imkanı verilsəydi, nəyi dəyişdirərdiz? 

- Bilmirəm. ALLAHın işinə qarışmaq olmaz!

Həyat toplananlar, çıxılanlar, vurulanlar və bölünənlərdən ibarətdir deyirlər, Sizin payınıza ən çox hansı əməl düşüb? 

- Belə düşünürəm ki, özünə hörmət edən adam özü haqqında nə yaxşı, nə də pis fikir söyləməz. Onun necə adam olduğunu məhz kənardan izləyənlər bilərlər.

Bəs, Siz özünüz özünüzə dost ola bilsəydiniz, özünüzə sizin kimi bir dost istərdinizmi?

- Artıq mənim belə bir dostum var. O da mən özüməm!

Dəlinin doğru xəbəri nə olar sizcə? Dəliliyin gözəlliyi mümkünmü?

- Dəlinin doğru xəbəri, onun anlamadığı həqiqətdir. Məhz bu həqiqət dəliliyin gözəlliyi hesab oluna bilər.

Hesab - kitab dəftəriniz var?

- Hələ yoxdur. O kitab-dəftəri mənə dünyamı dəyişəndən sonra təqdim edəcəklər.

Təbliğ etdiyiniz gerçəklər hansılardır, necə düşünürsüz sevginin təbliğata ehtiyacı varmı? 

- Bu gün həqiqətən sevginin təbliğata ehtiyacı var. Çünki bütün 4 tərəfimizdə zorakılıqla üzləşirik. İnsan cildində olan bir qism canlılar həqiqi insanlara zülm verirlər və bu günü-gündən artmaqdadır. Məhz buna görə sevgini, insana sevgini təbliğ etmək lazımdır.

Bəs, ceyranın gözündə aslan sevimli ola bilərmi? 

- Bəli, ola bilər. Yalnız o zaman ki, aslan ceyrandan azı 10 dəfə kiçik olsa...

Cəfər Mənsimi.azadinform.az