Türkiyənin Qaziantep vilayətində konfranslar keçirmək üçün bu bölgəyə səfər edən millət vəkili Qənirə Paşayeva Qaziantep valisi Əli Yerliqaya ilə görüşüb.
Deputat görüşdə Azərbaycan, Dağlıq Qarabağ problemi, Xocalı soyqırımı həqiqətləri haqda və Azərbaycan-Türkiyə birliyinin güclənməsinin önəmi barədə danışıb.
Gənclərə yönəlik konfrans və tədbirlərin artmasının vacibliyini vurğulayan millət vəkili bu istiqamətdə təkliflərlə çıxış edib. Q.Paşayevanın fikirlərini dəstəkləyən vali bu məsələyə xüsusi diqqət göstəriləcəyini bildirib.
Millət vəkili Türk Ocaqları və bölgənin tanınmış QHT rəhbərləri ilə görüşdə Azərbaycanla Türkiyənin QHT, gənclər və qadın təşkilatları arasında əlaqələrin genişlənməsindən məmnunluğunu ifadə edib.
Görüşlərdə həmçinin Ermənistanın torpaqlarımızın 20 faizini işğal altında saxlaması, qaçqın və məcburi köçkünlərin uzun illərdir öz doğma yurdlarına dönə bilməməsi, Dağlıq Qarabağ və işğal edilmiş digər Azərbaycan ərazilərində dinc azərbaycanlılara qarşı ermənilər tərəfindən törədilən soyqırımlar, tarixi abidələrin erməni vandalizminə məruz qalması barədə də geniş məlumat verilib.(Axar.az)
Xəbərdən istifadə edərkən istinad etmək vacibdir.
