Xeberle.com-un əldə etdiyi məlumata görə, sözügedən "KARSAN” adlı marşrut avtobusları artıq 9 nömrəli avtobus xəttindən çıxarılacaq.

Sözügedən avtobusların Sumqayıt-Bakı istiqamətində hərəkət edən marşrut xəttinə verilməsi nəzərdə tutulub.

9 nömrəli marşrut avtobuslarının hansı avtobuslarla əvəzlənəcəyini öyrənmək üçün isə Sumqayıt şəhər İcra Hakimiyyətinin başçısı yanında Avtomobil Nəqliyyatı ilə Sərnişin Daşıma İdarəsinin rəisi Seyfulla Əsədullayev ilə əlaqə saxladıq. S.Əsədullayev məlumatı təsdiqləyərək bildirdi ki, şəhərə 16 ədəd "İSİZU” markalı avtobus gətirilməsi və 9 nömrəli marşrut xəttinə verilməsi planlaşdırılır: "Qanunsuz "FORD”ların fəaliyyətini dayandıra bilmədiyimiz üçün, 9 nömrəli marşrut avtobuslarını Sumqayıt –Bakı istiqamətində hərəkət edən marşrut xəttinə verməyi planlaşdırırıq. Bu günlərdə şəhərə gətirilən 16 ədəd, 25 yer tutumu olan "İSUZU” markalı avtobusların isə 9 nömrəli marşrut xəttinə istifadəyə verilməsi nəzərdə tutulub. Amma yeni avtobusların sırf həmin marşrut xəttinə verilməsi hələ ki, rəsmi şəkildə təsdiq olunmayıb”.

"KARSAN” markalı kiçiktutumlu və oturacaqları az olan marşrut avtobuslarının yarım saatdan çox gediş müddəti olan Bakı-Sumqayıt xəttində sərnişinlərin ayaq üstə necə gedəcəkləri məsələsini gündəmə gətirir.

Bu məsələyə aydınlıq gətirən S.Əsədullayev bildirdi ki, bu avtobusların sözügedən marşrut xəttinə verilməsində məqsəd yalnız qanunsuz "FORD” markalı avtobuslarının fəaliyyətini dayandırmaqdan ibarətdir:"Bizim məqsədimiz yalnız qanunsuz fəaliyyət göstərən avtobusların fəaliyyət göstərməsinin qarşısını almaqdır. Əlbəttə ki, tələsdikləri üçün ayaqüstü getmək istəyən sərnişinlər olacaq. Lakin həmin avtobusların oturacaqları az olsa da, dolan kimi hərəkət edəcəklər”.

Qeyd edək ki, bir müddət əvvəl şəhərə gətirilən "KARSAN” tipli marşrut avtobusları kiçiktutumlu olduğu üçün sakinlərin narazılığına səbəb olmuşdu.

Elnarə Salamova

Xeberle.com