Jurnalistlər Facebook sosial şəbəkəsində keçirilmiş bir sorğu ilə 2013-cü ildə ən fəal, mediaya açıq mətbuat xidməti rəhbərlərinin adlarını müəyyənləşdiriblər. 
Sorğunun dünən açıqlanan nəticəsindən razı qalan mətbuat katibi də var, narazı qalan da.
Maraqlıdır, başa vurduğumuz bu ildə mətbuat xidmətlərinin rəhbərləri necə, jurnalistlərin işini necə qiymətləndirilər?
Modern.az-ın əməkdaşı bu sualla nazirlik və dövlət komitələrinin mətbuat xidmətlərinə müraciət edib.

Bakı Metropoliteninin mətbuat xidmətinin rəhbəri Nəzakət Tanrıverdiyeva: “Mən özüm də jurnalistəm. Jurnalistlər arasında çoxlu dostlarımız, bəzilərilə əla münasibətlərimiz var. Lakin ANS-dəki jurnalistlərdən çox incimişəm. Haqqımızda yerli-yersiz məlumatlar yaydılar. Onların xəbərləri çox qərəzli, qeyri-obyektivdir. Ağızlarına nə gəldi ünvanımıza səsləndirdilər. Buna görə də onlardan çox incimişəm. Başqa jurnalistlərlə əməkdaşlığımız çox yüksək səviyyədə davam edir”.

Əmək və Əhalinin Sosial Müdafiə Nazirliyinin İctimaiyyətlə əlaqələr şöbəsinin müdiri İlham Məmmədov: “Kifayət qədər anlaşıqlı bir il keçirdik. Düşünürəm ki, jurnalistlər də bizdən razı qalıb. Çünki onların sualına ən qısa zamanda cavab verməyə çalışmışıq. Ən gec cavablandırdığımız sorğu isə 3 gün çəkib. Xırda narazılıqları nəzərə almasaq, hər şey yaxşıdır. Elə bir insidentimiz olmayıb, biz jurnalistlərdən narazı deyilik”.

“Dövlətqaçqınkom”un mətbuat katibi Elçin Qədimov: “Ümumilikdə mediadan razıyam. Lakin narazı qaldıqlarım da var. Bəzi hallarda zəng vurub, müəyyən məsələlərlə bağlı məlumat öyrəniblər, amma özləri istədiyi kimi yazıblar. Bəzən də hansısa bir xəbəri bizim mövqeyimizi öyrənmədən yayırlar. Bu isə ictimaiyyətdə çaşqınlıq yaradır. Mövqe bildirmək bizim borcumuzdur, amma elə jurnalistlər var ki, müsahibə verirsən, yazı çıxanda görürsən dediklərini çevirib tam başqa cür yazıblar. Təbii ki, adam ikinci dəfə həmin jurnalistə müsahibə vermək istəmir”.

Ekologiya və Təbii Sərvətlər Nazirliyinin mətbuat xidmətinin rəhbəri İradə İbrahimova: “Mən jurnalistlərin hamısından razıyam. Onları çox istəyirəm”.

Standartlaşdırma, Metrologiya və Patent üzrə Dövlət Komitəsinin mətbuat katibi Fazil Talıblı: “Mən jurnalistlərdən razıyam. Bu sahədə çalışmış bir insan kimi də inanıram ki, jurnalistlərin təkmilləşdirmə fəaliyyəti daha güclənəcək və biz əməkdaşlığımızı yüksələn xətt üzrə bundan sonra da davam etdirəcəyik”.

Ailə, Qadın, Uşaq Problemləri üzrə Dövlət Komitəsinin mətbuat katibi Elgün Səfərov telekanal jurnalistlərindən narazıdır: “Düşünürəm ki, jurnalistlərin peşəkarlığının artırılmasına ehtiyac var. Şou kimi qeydə alınan proqramların sayı azaldılmalıdır. Həmin proqramlarda zorakılığa məruz qalmış qadın və uşaqların adlarının çəkilməsi, üzlərinin efirdə göstərilməsi hallarının qarşısı alınmalıdır”.

Daxili İşlər Nazirliyinin mətbuat xidmətinin şöbə rəisi Orxan Mansurzadə: “Bizim mətbuat xidməti jurnalistlərlə sıx çalışan qurumlardan biridir. Demək istədiyimiz sözü mətbuata həmişə demişik və çalışırıq ki, onları da maraqlandıran bütün sualları cavablandıraq. Ayrı-ayrı cinayətlə bağlı məlumatlar istisna olmaqla, bütün məsələlərdə həmişə çalışırıq ki, məlumatı jurnalistlərə operativ şəkildə çatdıraq. Bütün hallarda çox səmərəli və işgüzar əməkdaşlıq olub. Jurnalistlərlə hər hansı narazılıq hallarının baş verdiyini xatırlamıram. İnşallah gələn il də bu əməkdaşlıq davam edər. Həm vətəndaşlar, həm jurnalistlərin işini asanlaşdırmaqdan ötrü DİN-in saytında vaxtaşırı məlumatlar yerləşdiririk. Düşünürəm ki, bu da əməkdaşlığımızın səmərəli inkişafına müsbət təsir edir”.

Rabitə və İnformasiya Texnologiyaları Nazirliyinin mətbuat xidmətinin rəhbəri Müşfiq Əmirov: “Hər şey əladır. Sağ olsunlar. Yüksək səviyyədə münasibətlər qurmuşuq. Həm informasiya alınmasında, həm də ötürülməsində hər şey əla təmin olunub. Modern.az da öncüllərdəndir”.

Kənd Təsərrüfatı Nazirliyinin mətbuat katibi Murtuzəli Hacıyev: “Kənd Təsərrüfatı Nazirliyi olaraq heç bir jurnalistlə problem yaşamamışıq. Əksinə,  əlaqələrimiz daha da genişlənib, ünsiyyətimiz daha sıx olub. Elə bir ciddi narazılıq yaşanmayıb”.

Mədəniyyət və Turizm Nazirliyinin mətbuat katibi Zöhrə Əliyeva: “Yeni jurnalistika deyilən anlayış ki, var mən həm köhnə komandayla, həm də yeni komandayla çox yaxşı işləmişəm. 2 dəfə olub ki, jurnalist həqiqətə uyğun olmayan, kobud informasiya yazıb, lakin lazımi cavabını da alıb. Mən onlara jurnalist demirəm. Biz jurnalistlərə açıq olan bir qurumuq, hər zaman bizdən soruşulan informasiyanı cavablandırmışıq. O zaman problem yaranardı ki, mən onlardan qaçım, suallarını cavablandırmayım. Sağ olsun jurnalistlər, işlərimizə obyektiv baxıblar. İşlərimizi yaxşı mənada işıqlandırıblar. Bir yerdə ki, iş gedir orda nöqsan ola bilər. Mən düşünürəm ki, əsl jurnalist həqiqəti cəmiyyətə düzgün çatdırandır. Bəlkə də bəxtimiz gətirib ki, biz yaxşı jurnalistlərlə çalışırıq. Ayrı-seçkilik etmədən hətta ildə, ayda bir dəfə çıxan hansısa qəzet də məlumat almaq istəyəndə biz onlara da hörmətlə yanaşırıq. Ümumilikdə jurnalistlərlə çox gözəl münasibətlərimiz var. Yenə deyirəm, bir-iki nəfəri çıxmaq şərtilə”.

Dini Qurumlarla İş üzrə Dövlət Komitəsinin mətbuat katibi Orxan Əli: “Mən öz adımdan deyə bilərəm ki, jurnalistlərlə heç bir problemimiz olmayıb. Ola da bilməz. Jurnalistin peşəsi sual ünvanlamaq, bizim də vəzifəmiz cavablandırmaqdır. İl ərzində də jurnalistləri razı salmağa yönəlik işlər görməyə çalışmışıq. İl də çox müsbət keçdi. Tədbirlərimizdə də media yüksək səviyyədə iştirak edib, əlaqələrimiz daha da genişlənib“.