Günümüzdə dil öyrənmək üçün saysız səbəblərimiz
var. Səyahət etmək, yeni dostlar qazanmaq və s. ilə yanaşı, yaxşı işlə təmin
olunmağımız üçün də dil əsas faktorlardan biridir.
Bəs dil öyrənməyin ən asan yolları nələrdir?
Xeberle.comolaraq poliqlot (ana dilindən başqa, ingilis, ispan, portuqal, türk, rus və erməni
dillərini bilir) Əfqan Xəlillinin(Hispaniya SRL təsisçisi) bu haqda fikirlərini öyrəndik. Onun sözlərinə görə,
bir dili öyrənməyin ən asan yolu, o dilin danışıldığı ölkələrdə yaşamaqdır:
"Mən, ana dilim Azərbaycan dilindən başqa,
ingilis, ispan, portuqal, türk, rus və erməni dillərini bilirəm. Təbii qeyd etməliyəm
ki, bu dilləri müxtəlif səviyyələrdə bilirəm - C2 səviyyəsindən B1 səviyyəsinə
qədər. Bir dili öyrənməyin ən asan yolu, o dilin danşıldığı ölkələrdə
yaşamaqdır. Çünki, bu vəziyyətdə insan həm özünü məcbur hiss edir ki, "həyatda
qalmaq üçün" dili tez mənimsəsin. Belə də onun bütün duyğuları aktivləşir
və daha tez öyrənir. Həm də hər yerdə - yolda, TV-də, eşitdiyi, gördüyü hər
yerdə insanın duyğu orqanlarına "hücum edilir". Belə intensiv
"hücum" qarşısında insan nə qədər qapalı olsa da, dərrakəsi zəif olsa
da, tab gətirə bilmir və bu effekt vətənindəki ən yaxşı kursda, ən yaxşı müəllimdən
dərs almasından daha təsirli olur. Bu da məlumdur ki, hamının xaricdə təhsil-təlim
almaq imkanı olmaya bilər, bu səbəbdən öz ölkəsindəki kurslara, müəllimlərə
(tutor) müraciət edə bilər. Bu zaman diqqət etmək lazımdır ki, pedaqoji təhsil almış və ana dili öyrəndiyiniz
dil olan müəllimlə işləyəsiniz. Digər versiyaların elə də təsirli olacağını
düşünmürəm. Sadəcə müəyyən mərhələdə kömək edə bilər. Əgər kimsə yaxşı öyrənmək
istəyirsə, sonrasında mütləq həmin ölkədə yaşamalıdır. Bu müddət 6 ay - 12 ay
arası dəyişir.
Əlavə olaraq qeyd edim ki, yeni dil
öyrənərkən, söz-söz əzbərləməkdənsə, mətnləri bütöv şəkildə əzbərləmək daha
faydalıdır və əzbərlədiyiniz mətnin tərcüməsini də yaxşı bilməlisiniz. Belə
olduqda cümlə quruluşu, ifadələr və s. kimi incəliklər mətnin içərisində artıq
öyrənilmiş olur, daha sonra danışarkən insan bu ifadələri, qaydaları düşünmədən
istifadə etməyə başlayır. İnternet əsridir, internetdən hər kəs istifadə edir.
Amma çalışmaq lazımdır ki, təcrübə etmək üçün internetdə xaricilərlə söhbət etməklə
onların sosial media yazışmalarından nəsə öyrənməyək, çünki onların əksəriyyəti
dilin qaydalarına riayət etmir. Sadəcə anlaşılmayan sözlərin, ifadələrin
açıqlanması üçün sürət baxımından canlı söhbətlər əlçatan olduğundan, köməyi də
az deyil. Əlbəttə ki, günümüzdə dil öyrənmək bir çox baxımdan vacibdir. Lakin bəzi
insanlar dil öyrənməkdə çətinlik çəkməsələr də, bəziləri bunun onlar üçün çox çətin
olduğunu vurğulayır”.
Psixoloq Nərmin Quliyeva isə dil öyrənməyin
tamamilə beynin qavrama gücü ilə bağlı olduğunu deyir: "Necə ki, bir sinifdə
oxuyan uşaqların dərsi qavrama qabiliyyətləri eyni deyil, bu eləcə də dil öyrənməyə
aid oluna bilər. Ümumiyyətlə uşaqların
nitqinin inkişaf dövrü 1-5 yaş arası başlayır. Çox vaxt valideynlər bu yaşda
uşaqların qavraması daha yaxşı olduğundan düşünürlər ki, onlara əlavə dil öyrətsinlər.
Amma bu düzgün deyil. Valideynlər özləri də bilmədən övladlarının psixikasına,
qavramasına zərər vururlar. Çünki uşaq ilkin olaraq öz dilində danışmağı öyrənməlidir.
Uşaqlar ana dilini 1-5 yaşında öyrəndikləri üçün, 5 yaşından sonra onların əlavə
dil öyrənmələri məsləhətdir”.
Elnarə Salamova
Xeberle.com
Xəbərdən istifadə edərkən istinad etmək vacibdir.