XeberLent.az informasiya agentliyi xəbər verir ki, artıq bir aya yaxındır ki, Bakı-Sumqayıt yolunun bəzi hissələrində yolu işıqlandıran küçə lampaları işləmir.

Daha dəqiq desək, “Ekologiya postundan”, düz “Saray postuna” kimi yollar zülmətə bürünüb. Bu barədə, redaksiyamıza Bakı-Sumqayıt yolunundan gündəlik istifadə edən sürücülərdən şikayət gəlib. Onlar daha sonra bildirdilər ki, indi şükürlürdür. Qarlar yağan zaman, nəinki adıçəkilən iki post arasında işıqlar yanmırdı, hətta bütün yol qaranlıq içində idi, göz-gözü görmürdü. 

Nədənsə müvafiq qurumları, xüsusilə də Küçə İşıqları İdarəsi problemin aradan qaldırılması istiqamətində addım atmır. Yəqin fərqinə varmır ki, qaranlığa qərq olan küçə piyadalar və sürücülər üçün təhlükə mənbəyidir. Bu yolda bədbəxt hadisə baş verərsə, buna kim cavab verəcək? Yəqin bir çox yerlərdə olduğu kimi, Bakı-Sumqayıt yolunda da böyük fəsadlar, qəzalar və ölümlər olandan sonra ayılacaqlar. Bəlkə heç onda da ayılmayacaqlar...