2013-cü ilin sonuna sayılı günlər qalıb. İl ölkəmiz, şəhərimiz üçün olduğu kimi, ayrı-ayrılıqda hər birimiz üçün də yadda qalan hadisələrlə tarixə qovuşur. Sorğumuz da elə bu mövzudadır. Öyrənmək istədik ki, görək 2013-cü ili respondentlərimiz necə xarakterizə edirlər,
bu ili hansı hadisələrə görə yaddaqalan hesab edirlər.

Buyurun, bu da cavablar:

Şahin Seyidzadə (Azərbaycan Respublikası Gənclər Təşkilatları Milli Şurasının (ARGTMŞ) sədri):

- Bu il ərzində təşkilatımız bir çox layihə və proqramları inkişaf etdirərək uğurlara imza atmışdır. Bunlardan ən yaddaqalanı ARGTMŞ-nin Avropa Şurasının Gənclər üzrə Məşvərət Şurasına seçilməsi və Azərbaycanda ilk dəfə Gənclər Təşkilatlarının I Milli Konqresinin keçirilməsidir...

Mətanət Məhərrəmova (Qızıl Aypara Cəmiyyətinin Sumqayıt şəhər bölməsinin sədri):

- İllər bir-birini əvəz edərək, ötüb keçir. Geriyə baxaraq, götür-qoy edəndə görürsən ki, sıxıntı keçirdiyin günlər olubsa da, yadda qalan günlər ondan da çox olub. Şükürlər olsun! 2013-cü il yaddaşımda çox əlamətdar hadisələr qoyub. Belə ki, hörmətli icra başçımız Eldar Əzizovun sərəncamı ilə 5-ci mikrorayonda yeni ofis binasının tikintisi üçün 500 m2 sahə ayrılıb ki, yaxın gələcəkdə yeni, müasir tipli şəhər bölməmizin ofis binasını tikdirməyimizə zəmin yaranıb. Bundan əlavə, müraciətimizə cavab olaraq, yerləşdiyimiz ofis binasının qəzalı vəziyyətdə olmasını nəzərə alaraq, Fövqaladə hallar naziri cənab Kəmaləddin Heydərovun göstərişi ilə Mülkü müdafiə idarəsinin təlim korpusundan 4 otaq təmir olunub, yeni avadanlıqlarla təchiz olunaraq ixtiyarımıza verildi. İl ərzində şəhər rəhbərliyinin diqqət və qayğısı sayəsində 2000 nəfərədək aztəminatlı, ahıl və ehtiyaclı insanlara humanitar yardım göstərmişik. “Azərikimya” İB-nin dəstəyi ilə "Mərhəmətli olmağa tələsin" devizi altında keçirdiyimiz çoxsaylı humanitar aksiyalarda sağlamlıq imkanı məhdud olan uşaqlara da etinasız qalmamış, onları da mütəmadi olaraq sevindirmişik. Fəaliyyətini könüllülər vasitəsi ilə həyata keçirən bölməmizə bu il də könüllü axını davam etmiş, onların sayı birə on artmışdı. Ümidvaram ki, üzümüzə gələn 2014-cü il daha da, uğurlu olacaq. Bizə göstərilən etimadı layiqincə doğruldacağıq. Fürsətdən istifadə edib, xalqımızı qarşıdan gələn Dünya Azərbaycanlılarının Həmrəyliyi Günü və Yeni il münasibəti ilə səmimi qəlbdən təbrik edirəm. Hər birinizə həmrəy olmağı arzulayıram!

Faiq Ağayev (müğənni, Xalq artisti):

- Sənət baxımından 2013-cü il mənim üçün 4 günlük anşlaqlı "F.A VIDA" adlı solo-konsertimlə, "Əlvida" mahnısı və klipi ilə yadda qaldı.

Vüqar Bayramov (iqtisadçı ekspert):

- 2013-cu ili həm professional, həm də elmi fəaliyyət baxımdan uğurlu il hesab edirəm. Əvvəlla, 2013-cu ildə Avropa Birliyi Vətəndaş Cəmiyyəti Forumunun ilk azərbaycanlı həmsədri seçilməyim yalnız mənə deyil, eyni zamanda bütövlükdə Azərbaycana olan bir etimad idi. Qeyd edim ki, seçimlər bu ilin noyabrın 27-28-də Vilnüsda təşkil edilən Vilnüs Sammiti çərçivəsində baş vermişdir. Avropa Birliyi və Şərqi Tərəfadaşlıq ölkələrini təmsil edən 17 İdarə Heyəti üzvünün 12-i mənim namizədliyimi dəstəkləmişdir. 2013-cü il rəhbərlik etdiyim İqtisadi və Sosial İnkişaf Mərkəzinin fəaliyyəti üçün də uğurlu olmuşdur. Belə ki, biz bu il 9 dövlət sənədi hazırlayaraq hökümətə təqdim etmişik. Bu sənədlər Azərbaycan iqtisadiyyatının müxtəlif sektorlarını əhatə edirdi. Bu sənədlər eyni zamanda dövlət qurumlarının əməkdaşlarının iştirakı ilə geniş müzakirə edilmişdir. Eyni zamanda, ISIM Dünya Beyin Mərkəzləri Alyasında Azərbaycanı təmsil edən ilk və yeganə Azərbaycan qurumudur və inanmaq istərdik ki, gələn il bu alyansda Azərbaycan qurumlarının sayında artımlar olacaq. Elmi fəaliyyətim üçün də 2013-cü il uğurlu olmuşdur. Belə ki, müsahibələrim müxtəlif beynəlxalq və yerli mətbuatda çap edilmişdir. “CNBC”, “Financial Times”, “Royter” kimi nüfuzlu mətbuat qurumları fikirlərimə yer vermişdir. Eyni zamanda, bu il 2 yeni kitabım çap edilmişdir. Onlardan biri ingiliscə çap edilərək yayılmışdır. 2013-cü ildə bir sira xarici nüfuzlu şəxslər ilə, o cümlədən Litva prezidenti, Avropa Parlamentinin sədri, Avropa Komisisyasinin vitse-prezidenti və s. şəxslər ilə görüşlərim olmuş və fikir mübadiləsi aparılmışdır. Şəxsi həyatım üçün də 2013-cü il uğurlu olmuşdur. Təbii ki, bu ili salamat başa vurmaq ən ciddi uğurdur və 2013-cü ildə qazandıqlarımı eyni zamanda Allahın bir töhfəsi kimi dəyərləndirərdim. Mahmudəli Çöhrəqanlı, Güney Azərbaycan Milli Oyanış Hərəkatının (GAMOH) lideri 2013-cü il fars molla rejiminin Ruhanini iş üstünə gətirməsi ilə son kartını oynadığına şahid oldu. Otuz ildən çoxdur Amerikanı “böyük şeytan” olaraq adlandıran və irtibatları kəsik olan İran İslam Respublikası göstərir ki darda qalanda nə qədər tülkü siyasəti yürütməkdə başarılıdır. Cenevrədə baş tutan 5+1 müzakirələri ardından İranın uranı zənginləşdirmə proqramının Qərbin kontrolu altına girməsi... Nə yazıq ki, Ruhaninin verdiyi bəzi boş və təhqir içərikli seçim vədlərin də hamısı yalan çıxdı və ona inanıb oy verənlərin başına börk qoyuldu. Urmiya gölü son çırpınışlarını etməkdə ikən Azərbaycan türkcəsinin təhsil dili olması ilə ilgili də heç bir addım atılmayıb. Fars rejimi hər halda yıxım və köçüş prosesinin son aşamasındadır və yürütdüyü işğal, təhqir və assimilasyon siyasətlərinin sonucu olaraq Güney Azərbaycan Türk millətimizin haqq mubarizəsi sonucunda tarixin zibilliyinə atılacaqdır.

İlqar Əliyev (top-model):

- Bu il ölkəmizdə prezident seçkiləri və benzinin bahalaşması ilə yadda qaldı. Şəxsi həyatımda isə - Varisin “Sənə inanıram” adlı serialına çəkilmək təklifi aldım.

Murad Arif (şoumen, Lider TV-də aparıcı):

- Bu il yaddaşımda Stokholm və Paris istirahəti, bir də oğlumun 1 yaşlı məclisi ilə yadda qaldı.

Əkbər Qoşalı (yazıçı, publisist):

- Şəxsi planda böyük övladımın ali məktəbə, kiçik övladımın isə orta məktəbin I sinfinə qəbul olması ilə... Mənsub olduğum ictimai birliyin uğuru baxımından isə il "Türk Dünyası Gənc Yazarlarının Bakı Toplantısı", "Gənc Yazarların Bakı Görüşü" layihələrinin gerçəkləşməsi, "Türk Dünyasında Ədəbiyyat" kitabının çıxması ilə yaddaqalan idi. Vətəndaş olaraq: - Dövlətimin, millətimin hər bir uğuru uğurum, hər bir uğursuzluğu uğursuzluğumdur! Ən gözəl il Qarabağı qaytardığımız, Qarabağa qayıtdığımız il olacaq, inşallah! Ümumi baxımdan: - İnsanlığın, sənətin 2013-cü ildə əldə etdiyi uğurlara sevinir, itirdiklərinə kədərlənirəm... Və nəhayət, əslində, 2013 bir rəsmi təqvim ilini göstərməkdədir. Bəlkə də Tanrı qatında heç 2013-cü il deyil!?. - Ona görə də, bu yer üstündə, bu göyün altda Tanrıya xoş gedən bir işimiz olubsa, nə mutlu bizə!

Leyla Ramazanlı (müğənni):

- Bu il mənim üçün uğurlu bir il oldu. Çoxdan gözlənilən konsertim baş tutdu. Bundan başqa, yeni mahnılarım və 3 klipim (“Sehirbaz”, “Unut”, “İsti-isti”) işıq üzü gördü.

Təranə Şükürlü (AMEA-nın Nəsmi adına Dilçilik İnstitutunun böyük elmi işçisi, filologiya üzrə fəlsəfə doktoru, dosent):

- Yeni ili digər bayramlardan daha çox sevirəm. Ancaq köhnə ili yola salanda nədənsə kövrəlirəm. Çünki qarşıdakı il bizi 1 yaş da yaşlandırır. 2013-cü il öz payından mənə də xoş günlərini bağışladı. Doktorantura pilləsinin ikinci mərhələsinə (elmlər doktoru mərhələsinə) qəbul oldum. Həmçinin, Milli Televiziya və Radio Şurası ilə əməkdaşlıq etmək mənim üçün 2013-cü ilin yaddaqalan hadisələrindən biri oldu. Bunlar çox xoş idi. Lakin mən həyatımın yaddaşıma iz sala bilən gününü 2014-cü ildən gözləyirəm...

Ramin İbrahimov (şoumen, ATV telekanalında aparıcı):

- 2013-cü il mənim həyatımda bir sıra hadisələrlə yadda qaldı. İş yerimi dəyişərək ATV telekanalına keçdim. Orada “Pozitiv” layihəsini gerçəkləşdirdim. “Maşın” realiti-şousunda Murad Dadaşovun verdiyi şansı dəyərləndirib, açılışda aparıcılıq etdim.

Vüsal Məmmədov (ARDNŞ-in Belçika nümayəndəliyinin rəhbəri):

- Mənə görə, 2013-cü il ən çox bununla yadda qaldı: Azərbaycan Şahdəniz qazının Avropaya nəqli marşrutunu müəyyənləşdirdi. Artıq dünən yekun İnvestisiya qərarının da imzalanmasıyla növbəti - çox uğurlu bir layihənin əsası qoyuldu.

Zaur Rəcəbli (cüdo üzrə əməkdar məşqçi):

- Oğlumun toyu və atamın həcc ziyarəti ilə...

Rəhman Rəsulov (Lider TV-nin aparıcısı, Anten FM-də dj):

- Bu il, əsasən, benzinin qiymətinin qalxması ilə yadımda qaldı... İ

İlqar Mirzə ("Impler"-in marketinq üzrə direktoru, "BarCamp Azerbaijan"da layihə meneceri):

- Azərbaycan miqyasında götürsəm, benzinin səbəbsiz bahalaşması ilə.

Niyazi Mehdi (filosof, tənqidçi, ədəbiyyatşünas, tərcüməçi):

- Prezident seçkiləri, benzinin bahalaşması, "Qanun" nəşriyyatına vergi hücumu, bir neçə yazı adamının mühacirət etməsi, "Nida" üzvlərinin həbsi – məncə, ilin hadisələri bunlar oldu.

Anar Heybətov (aktyor):

- Çox şey olub. Amma mənimçün ən yaddaqalanı fevralın 5-i Almaz qızıma ad günü qeyd etməyimizdir. Bu sevincimi mənimlə bölüşən və orada iştirak edən bütün dostlarıma, qohumlarıma öz təşəkkürümü bildirirəm. Fürsətdən istifadə edib, qarşıdan gələn yeni il münasibəti ilə bütün Azərbaycan xalqını səmimi qəlbdən təbrik edirəm.

Məhsəti Şərif (jurnalist):

- Əslində ilin əvvəli xoş gəldi. Yəni, mən bu il ana oldum. Oğlum İlhan dünyaya gəldi. Hər şey çox yaxşı idi. Amma ilin sonu çox qəmgin oldu. Dayım qızı 26 yaşında həkim məsuliyyətsizliyinin qurbanı oldu. Onun kiçik qızı anasız qaldı. Bu baxımdan 2013-cü il mənim üçün yaxşı başlayıb, pis bitdi.

Zaur Dərəbzadə ( “Avto FM”in koordinatoru):

- 2013-cü il Prezident seçkiləri, 2015-ci il Avropa Olimpiya Oyunlarının evsahibliyini qazanmağımız, benzinin qalxması və yeni AvtoFM-in açılması ilə yadda qaldı.

Sirac Mustafayev (rejissor):

- 2013-cü il mənim üçün yaddaqalan bir il oldu. Bu il 12 seriyalı bədii televiziya filmi - “Bir ovuc torpaq”ı çəkdim. Həmin film “Lider” TV-də nümayişi olundu. Üç il bundan əvvəl başladığım bədii filmin ssenarisini nəhayət ki, bu il bitirdim. Ümumiyyətlə, bu il mənim üçün uğurlu bir il oldu.

Rauf Zeyni (Milli QHT Forumunun prezidenti):

Ulu öndər Heydər Əliyevin 90 illik yubileyi, AXC-nin 95 illik yubileyi, Azərbaycan Silahlı Qüvvələnin 95 illiyinə həsr olunmuş hərbi parad, Azərbaycanın BMT TŞ-yə 2-ci dəfə sədrlik etməsi, ölkə prezidentinin 18 sentyabrda Quba rayonunda tarixi bəyanatı: "Vaxt gələcək biz İrəvanda, Göyçədə, Zəngəzurda yaşayacağıq", Azərbaycanda prezident seçkiləri və cənab İlham Əliyevin prezident seçilməsi, yeni təyinatlar (baş nazirin müavinləri, nazirlər və s.), III Bakı Beynəlxalq Humanitar Forumu, IV Muğam müsabiqəsi, 3 dekabr Beynəlxalq Əlillər günündə yanacağın qiymətinin qalxması, M.Ə.Rəsulzadənin 130 illik yubileyi ilə əlaqədar prezidentin sərəncamı, prezidentin media nümayəndələriylə tarixi görüşü, Vilnüs sammiti.

Tahir Əmiraslanov (Azərbaycan Milli Kulinariya Mərkəzinin baş direktoru, Azərbaycan Milli Kulinariya Assosiasiyasının prezidenti):

- 2013-cü bir sıra hadisələrlə yadda qaldı: 1) Qızımdan qız nəvəm oldu. 2) “Söz Mətbəxi” kitabım çapdan çıxdı. 3) Qiymətlər qalxdı.

Vüsalə Hüseynli (“Demokratik İslahatçı Gənclər” İctimai Birliyinin sədri):

- 2013-cü il mənim həyatımın dönüş nöqtəsi oldu. Elə hər mənada; həm şəxsi, həm də iş dünyasında. Belə demək olar - 2013 mənim ilim oldu. Bu il təşkilatda bir çox ciddi uğurlara imza atmışıq və nəticələrini 2014-cü ildə açıqlayacağıq. Hələlik tezdir nəsə demək. Əsas isə xaricdə təhsillə bağlı arzumu reallaşdırdım. Gələn il yenidən tələbələrə "qarışası" olacam.

Elgiz Əkbər, (ANS telekanalının aparıcısı):

- 2013-cü il mənim üçün ən uğurlu illərimdən oldu. “Adam içi” verilişi yarandı və sevildi.

Fərda Xudaverdiyev (yumoristik aktyor):

- Ötməkdə olan bu 2013-cü il yumordan, zarafatdan anlamayanların duzsuz ssenarilərini zorla millətə satmaları və hələ də bunu arsız-arsız anlamamaları, nəhayət, bu işləriylə utanmadan qürurlanan bəzi bəsit düşüncəli insanları görüb dərindən təəssüflə ah çəkməyimlə yadda qaldı. Hə, bir də unutmamışkən, təəssüfləndiyim bir məqamsa, ölkəmizdə tək STAND UP-çı kimi 2 böyük konsert verən bir azərbaycanlı kimi hələ də, lazım olan dəstəyi, diqqəti və dəyəri almamağımdır... İnşallah, uğur qalsın 2014-cü ilə!

Oktay Mehdiyev (Sumqayıt Dövlət Musiqili Dram Teatrı və “Tuğ” teatrının aktyoru):

- Prezident seçkiləri, “Karvan” Ticarət Mərkəzinin yanması və benzinin bahalaşması.

Elmir Ağayev, “168 saat”