XeberLent.az informasiya agentliyi Sumqayıt şəhərindəki bəzi heykəllərin üzərində olan naqisliklərlə bağlı məlumat yaymışdı.

Bu cür neqativ halların niyə hələ də aradan qaldırılmamasını öyrənmək üçün Sumqayıt Şəhər Mədəniyyət və Turizm İdarəsinin rəhbəri Namiq Qaffarova müraciət etdik. İlk olaraq N.Qaffarov məsələnin ona aidiyyəti olmadığını bildirərək, suallarımızı cavabsız qoymaq istəsə də, daha sonra yaranmış vəziyyətə aydınlıq gətirdi:

“Heykəllərin mərmərləri üzərində olan yazıları hal-hazırda dəyişmək mümkün deyil. Ona görə ki, bunun üçün heykəlin postamentinin bütün mərməri dəyişdirilməlidir. Bu da mənim gücümdə olan bir məsələ deyil ki, mən adıçəkilən heykəlin yazısını dəyişdirim. Şəhər rəhbərliyi və aidiyyəti qurumlar məsələdən xəbərdardılar.

Xəbər mediada işıqlandırıldıqdan sonra Sumqayıt şəhər İcra Hakimiyyətindən mənə zəng vuruldu və tapşırıldı ki, məsələni həll edək. Biz də öz növbəmizdə, Nəriman Nərimanovun heykəlinin adı və soyadını göstərən hərifləri latın əlifbası ilə hazırlatdırmışıq və yaxın günlərdə yeni hərifləri heykəlin üzərinə qeyd edəcəyik.”

Maraq üçün onu da bildirək ki, artıq Sumqayıt şəhərində yerləşən digər büst və heykəllərin çatışmayan cəhətləri təmir edilir. Bunu isə bizə sakinlər bildiriblər.