Bu gün cəmiyyətimizdə bəzi gənclər peşə vəzifələrini ən ucqar kəndlərdə yerinə yetirilər. Onlar necə deyərlər, gözdən-könüldən uzaqda olsalar da, şəhərdə fəaliyyət göstərənlərdən daha yararlı, daha vacibi şlə məşğuldular. Elə bizim növbəti müsahibimiz kimi. 
Peşə vəzifəsini hazırda ən ucqar kənddə  yerinə yetirən  gənc müəllim Cavanşir Əsədov suallarımızı cavablandırıb. 

1986-cı ildə Kəlbəcər rayonunun Alolar kəndində anadan olmuş Cavanşir Əsədov hazırda Goranboy rayonunun Qaraçinar  kənd orta məktəbində riyaziyyatdan dərs deyir. O, Təhsil Nazirliyinin imtahanında yüksək bal toplayaraq, ucqar kənd məktəbində dərs keçməyi seçən gənc müəllimlərindəndir. 

- Cavanşir müəllim, sizi ətraflı tanıyaq... 

- 1993-cü ildə Kəlbəcər rayonundan məcburi köçkün düşmüşəm. 2003-cü ildə  Gəncə Dövlət Universitetinə qəbul olundum. 2007-ci ildə universitetin riyaziyyat və fizika ixtisasını fərqlənmə diplomu ilə bitirdim. Bu il magistr təhsilimi başa vurdum.

Müəllim olmağı özüm istəyirdim, imtahandan sonra da seçdiyim birinci ixtisasdır. Riyaziyyat ixtisasına gəldikdə isə atamın riyaziyyat müəllimi olması mənim bu sahədə daha çox bilgimin olmasına şərait yaradıb. Elə ona görə, bu ixtisası seçmişəm. 

Müəllimlik şərəfli peşədir. Düzdür,  dövlət tərəfindən müəllimliyə yüksək qiymət verilmir, maaşlar çox aşağıdır, ancaq xalq müəllimləri qiymətləndirir. Bu gün cəmiyyətimizdə şəhərlə kənd müəlliminə yanaşma  fərqlidir. Şəhərdə fəaliyyət göstərən müəllimə daha savadlı, kənddə işləyənlərə isə savadsız biri kimi baxırlar. Universitetdə oxuyanda şəhərdə işləməyim üçün imkanlar yaranıb, lakin dərslə iş ikisi bir arada düz gəlmədiyi üçün çalışmamışam. Sonradan özüm kənddə işləməyi seçdim. 

- Ucqar bölgədə yerləşən Qaraçinar kənd orta məktəbi və buradakı dərs şərati barədə nə deyə bilərsən... 

- Qaraçinar kənd orta məktəbində şərait normaldır. Məktəb təmir olunub. Lakin laborotoriyaların (fizika, kimya, biologiya) olmamağı bəzi məsələrdə problem yaradır. İmkan daxilində bütün  fənnləri tədris etməyə çalışırıq. Mən hazırda 5, 8, 11-ci siniflərə dərs keçirəm. Həftənin bütün günləri məktəbdə dərsim olur. Həmçinin universitetə hazırlaşan abituriyentlərə kömək edirəm. Bu il şagirdlərimdən biri 617 balla ali məktəbə daxil olub. 

- Yəqin ki, pedaqoji təcrübəni şəhər məktəblərində keçmisiniz. Müqayisə edəndə kənd məktəbi ilə hansı fərqlər görürsünüz? 

- Şəhər məktəblərində təhsil alan şagirdlərin dünyagörüşü, həyata baxışları tamam fərqlidir. Onlar daha azaddırlar və öz maraqları üçün çalışırlar. Lakin kənd uşaqları valideynlərin istəyinə uyğun hərəkət edirlər. Buradakı uşaqların dünyagörüşlərində fərqin olmasının əsas səbəbkarı valideynlərdir. Valideynlər o qədər dünyagörüşlü deyil deyə, uşaqlarını da bəzən doğru yola istiqamətləndirə bilmirlər.  Düzdür,  kənd həyatında qayğıların çox olması  da buna təsir edir. 

- Hansı məsələlər həll olunsa, kənddə təhsilin keyfiyyəti arta bilər?

- Məncə, kadr ehtiyatlarının çoxalması və məktəbdə fənnlər üçün laboratoriyaların yaradılması tədrisin inkişafına müsbət təsir edə bilər. Kəndin özündə mavi yanacaq yoxdur. Odun sobalarından və qızdırıcılardan istifadə olunur. Qış burada sərt olduğu üçün, mavi yanacaqsız çətindir. Mavi yanacaq həm kənd sakinlərinin rahatlığı üçün,  həm də meşə örtüyünün qorunub saxlanması üçün çox vacibdir. 

- Aylıq gəlirinizlə ehtiyaclarınızı ödəyə bilirsiniz?

- Maaşım qaneedici deyil. Buradakı şəraiti fikirləşəndə müəllim olmaq istəmirsən. Maaşımız vaxtında veilmir. Artıq dekabr ayıdır, lakin hələ noyabr ayının maaşını almamışıq. Çox istərdim ki, uzun müddət kənd məktəblərində müəllim işləyim, amma bu maaşa baxanda belə düşünməkdən vaz keçməyə məcbur olursan...

- Ümumiyyətlə, kənd şəratində yaşamaq, müəllim işləmək necədir?

 - Kənd həyatı çətin olsa da, maraqlıdır. Kənddə insanlar bir- birləri ilə daha mehriban, ünsiyyətcildirlər.  Kəndin insanları daha qonaqpərvər olurlar.  Düzdür, yağış yağanda kənddə palçıq olur və dərsə getməkdə çətinlik çəkirik. Lakin təbiəti seyr etmək,  havanın təmizliyi adamı ruhlandırır. Burada demək olar ki, hər şey təbiidir – meşə, onun zənginlliyi, gözəlliyi, yağan qarın hər yeri ağ rəngə boyaması ətrafa bir fərqlilik qatır. Meyvələrin birbaşa ağaclardan dərilib yeyilməsininin öz ləzzəti var. Qaraçinar kəndi ermənilərlə həmsərhəddir. Arada güllə səsləri kəndin içindən eşidilir. Kəndin gözəl təbiəti və meşə zolağı var. Murov dağının ətəyindən gələn su ilə təmin olunub. (modern.az)