Sahibkarlıq subyektləri fəaliyyətləri dövründə müxtəlif zərər və itkilərlə qarşılaşa bilərlər. Bu baxımdan sahibkarların, xüsusilə də mikro, kiçik və orta biznes subyektlərinin sahibkarlıq fəaliyyətlərini sığortalaması vacibdir. Sığortanın biznes üçün əhəmiyyəti ilə bağlı Azərbaycan Respublikasının Kiçik və Orta Biznesin İnkişafı Agentliyi (KOBİA) tərəfindən mütəmadi olaraq KOB-lar arasında maarifləndirmə işləri həyata keçirilir, təlim və seminarlar təşkil olunur, məsləhət xidmətləri göstərilir.

Bu istiqamətdə növbəti tədbir KOBİA-nın Sumqayıt KOB İnkişaf Mərkəzində keçirilib. Sığorta ilə bağlı təşkil olunmuş təlimdə Sumqayıt şəhərində fəaliyyət göstərən əlilliyi olan sahibkarlar iştirak ediblər.

Tədbirdə təlimçi-ekspert Ramidə Əliyeva iştirakçılara müasir dövrdə sığortanın önəmi, sahibkar (işə götürən) tərəfindən işçilərin icbari sığortalanması, biznesin könüllü sığortası, tərəflərin hüquqi məsuliyyəti və s. barədə məlumat verib. Qarşılıqlı müzakirə formatında təşkil olunmuş təlim çərçivəsində iştirakçıları maraqlandıran suallar da cavablandırılıb. 

Qeyd edək ki, təlimlər  Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə "Əlil Sahibkarlar Təşkilatı” ictimai birliyi tərəfindən "BMT-nin DİM prinsiplərinə uyğun Azərbaycanda ƏOŞ və digər həssas sosial qrupların davamlı iqtisadi inkişafın təmin edilməsində sahibkar kimi rolunun artırılması və bu sahədə mövcud problemlərin həllinə zəmin yaradılması” layihəsi çərçivəsində keçirilir.

Xəbərdən istifadə edərkən istinad etmək vacibdir.