Bu gün Azərbaycan inamla irəli gedir, dünya dövlətləri arasında öz yerini tutur. Gün-gündən xarici ölkələrdə Azərbaycan haqqında təəssürat və fikirlər müsbətə doğru dəyişir. Ölkəmizin xarici siyasəti möhkəm təməllər üzərində qurulub və açığını deməliyəm ki, hətta bir çox dövlətlərdə də açıq-aşkar qısqanclıq, narahatçılıq yaradır. Lakin bir vətəndaş, ölkəmi sevən bir insan kimi məni narahat edən məsələlər var. Onlardan biri biz azərbaycanlıların həmrəyliyi məsələsidir. Qarşıdan 31 dekabr Dünya Azərbaycanlılarının Həmrəyliyi Günü gəlir. Odur ki, bu kiçik yazımı sizlərlə bölüşməyi özümə lazım bildim.
Xaricdə azərbaycanlılar bir-birini heç də istənilən səviyyədə tutmur, dəstəkləmirlər. Hamısına aid etməzdim, bir qismini deyirəm. Dünyanın bir neçə ölkəsində oldum və gördüm ki, hər şey Vətənimdəki kimi deyil: Həm də ordakı həmvətənlərimizdə mehribanlıq, səmimiyyət, milli birlik kimi anlayışların yerinə, həmin yerin mühitindən, milli-irqi məsələlərindən doğan amillər özünü mənfi mənada büruzə vermişdir.
Belə soyuq "səhnə”ləri görüb dərin təəssüf hissi keçirdim, Özlüyümdə çox götür-qoy etdim ki, ay Allah, niyə biz azərbaycanlılar xaricdə bir-birimizə tərəf çox soyuq və bəzən də sərt oluruq?!
Bunları yazmağımda məqsədim o deyil ki, diaspora işimizi heçə endirim, xaricdə yaşayan bütün azərbaycanlıları tənqid edim, onları bir-birinə düşmən edim. Əsl istəyim odur ki bir vətəndaş mövqeyi qoyum ortaya, fikrimi sizinlə paylaşım. Bəlkə səhv deyirəm?! Biz çox qədim mədəniyyəti olan bir xalqıq, belə gözəl, zəngin, bərəkətli torpaqda dünyaya göz açmışıq. Vətənim Azərbaycan dünyaya Nəsrəddin Tusi, Lev Landau, Yusif Məmmədəliyev, Azad Mirzəcanzadə, Lütfizadə və sair kimi elə qabiliyyətli, elə istedadlı insanlar bəxş etmişdir ki! Həmçinin, Heydər Əliyev kimi uzaqgörən siyasətçi, mükəmməl insan, dahi səxsiyyət də Azərbaycan xalqının yetişdirməsidir. Elə tək bu, çox şeyə dəlalət edir ki, biz necə güclü, istedadlı, məğlubolunmaz xalqıq!
Qeyd etməliyəm ki, dünyada mövcud olan 28 imperiyadan 4-ü biz azərbaycanlılara məxsus olub. Çox istərdim kimi doğma Vətənimizdə bir-birimizə necə isti, səmimi, gözəl münasibətlərimiz var,  xaricdə də bundan ikiqat artığı olsun ki, biz azərbaycanlıları sevənlər də var, sevməyənlər də. Ona görə də bizim xaricdə mövqelərimiz sivil, demokratik, diplomatik cəhətdən uzunmüddətli və davamlı, dərin fəlsəfi dayaqlara söykənən və nizam-intizamlı çərçivədə olmalıdır və bir-birimizə əsl vətəndaş kimi – bir azərbaycanlı kimi baxmalıyıq. Unutmamalıyıq ki, biz azərbaycanlıyıq, yüksək səviyyəli adət-ənənələrə, dəyərlərlə, norma və prinsiplərə, tarixə, ədəbiyyata, dilə, dinə malikik. Hər millətin öz məxsusi xüsusiyyətləri olduğu kimi, bizim də yüksək dəyərlərimiz var. Azərbaycanlılar çox gözəl və misilsiz dərəcədə yüksək təfəkkürə sahib millətdir. Gərək ki, belə zəngin xalqın milləti ayıq-sayıq olsun, bir-biriylə həmişə hörmət, sevgi, ehtiramla davransınlar.
Sevindirici haldır ki, bizdə hər şey var, hər şey üstündür, hər şey yüksək səviyyədədir, bircə bu məsələ çox zəifdir. Hər hansı millətin evini yıxmaq istəyəndə, o ölkədə dini milli irqi provokasiya aparılır, yaxud yaradılır. Ona görə də biz azərbaycanlılara belə şeylər yad olmalıdır! Mənim üçün heç bir fərqi yoxdur - Azərbaycan vətəndaşı, əsl azərbaycanlı ürəyimdir, başımın tacıdır! Vətənimə, millətimə qurban olum!!!
Görün necə bənzəri olmayan ölkədə yaşayırıq - ərazicə kiçik olsaq da, milliyyətcə çox böyük və qədimik, dünyanın hər guşəsində varıq. Güclü birliyimiz olsa, içimizdə özümüzə qarşı paxıllıq kin-küdurət olmasa, kənarda bizə zaval yoxdur, kimsə bizi yixa bilməz. Hamımız bir olub Vətənimizi qoruyaq, zəngin ölkəmizə və onun güclü Prezidentinə - çox ağıllı, elmli, istedadlı mərd liderinə hər zaman dəstək olaq, onun ətrafinda bir yumruq olaq!
Çıxışımı bu sözlərlə bitirmək istəyirəm:
Hər kəsin qürur mənbəyi namusu, vicdanı onun başının tacı öz Vətənidir! Bu gün hərə bir vasitəylə Vətəninə, cəmiyyətinə yararlı olmalıdır, onu uğurla təmsil etməlidir. Cəmiyyəti və ölkəmizi xaricdə bizim kimi vətəndaşları təmsil edir. Vətəndaşlar olmasa, ölkə də olmaz, Vətən olmasa, şərəf və ləyaqətimiz də əldən gedər! Vətən anadır, anamız isə canımızdır, qanımızdır".

Əli Cavadov
Fitoterapevt, kosmetoloq, trixoloq