Xalq artisti Valeh Kərimov açıqlamasında uzun illərdir ki, çalışdığı Sumqayıt Dövlət Dram Teatrından uzaqlaşdırılmasından şikayətlənib. V.Kərimov işdən azad olunmağı özünə qarşı hörmətsizlik kimi dəyərləndirib: "Mən uzun zamandır, Sumqayıt teatrında çalışıram. Bu neçə ildə uğurlarım olub. Sumqayıt teatrında ilk Xalq artisti adı alan mən olmuşam. Hacı İsmayılov, Afaq Bəşirqızı, Ramiz Novruzov, Sabir Məmmədov kimi aktyorlar bizdə işləyib, ancaq adı başqa teatrlardan almışdılar. Sumqayıt teatrında işləyə-işləyə ad alan ilk aktyor isə mənəm. Məndən sonra iki nəfərə Xalq artisti adı verilmişdi. Məncə, bir teatrda adı, tamaşaçılar arasında hörməti olan aktyorun çalışması həmin teatrın yalnız xeyrinədir. Sumqayıt teatrında yeganə Xalq artisti mən qalmışdım. Məni də çıxardıb atdılar. İşdən azad olunanda mənə dedilər ki, get, özümüz çağıracağıq. Müqaviləni dərhal da bağlamaq olardı. Bunu özümə hörmətsizlik hesab edirəm”.

V.Kərimovun işdən hansı səbəbdən azad edildiyini aydınlaşdırmaq, xalq artistinin narazılığı ilə bağlı qarşı tərəfin mövqeyini öyrənmək üçün Moderator.az saytı və "Hürriyyət” qəzeti olaraq Sumqayıt Dövlət Dram Teatrının direktoru İslam Həsənovla əlaqə saxladıq.

V.Kərimova bir sənətkar kimi böyük önəm verdiklərini bildirən İ.Həsənov, xalq artistinin Sumqayıt Dövlət Dram Teatrından kənarlaşdırılmadığını, bu gün də həmin teatrın işçisi olduğunu vurğuladı:

 "17 may 2011-ci ildə respublika prezidentinin yaş senzi ilə bağlı fərmanı oldu. Biz V.Kərimovu özünün ifadəsi ilə desək, kənara atmamışıq. V.Kərimov yenə bu teatrın işçisidir. O, bundan əvvəl də burda işləyib, bundan sonra da burda işləyəcək. Sadəcə olaraq, onun gəlib müqaviləyə qoy çəkməsi lazımdır. V.Kərimov Sumqayıt teatrının çöx hörmətli aktyorudur, xalq artistimizdir. Onun Sumqayıt teatrına ehtiyacı yoxdur. Bizim, Sumqayıt teatrının ona ehtiyacı var. Onun burda işləməyi bizə şərəfdir. O, öz işini yenə burda davam etdirəcək. Sadəcə, biz qanuna əsaslanaraq addım atır, onunla əməkdaşlığın başqa formasına keçirik. V.Kərimov bundan sonra da teatrda öz rollarını oynayacaq, hər şey qaydasında davam edəcək”.

"V.Kərimova müqavilə ilə bağlı təklif göndərilibmi” sualının cavabında isə İ.Həsənov xalq artistinin  bu barədə məlumatlı olduğunu qeyd etdi:

"Təxminən sentyabr ayından bu proses gedir, onun özü də bu barədə məlumatlıdır. Sadəcə, Valeh müəllim gəlib müqaviləyə qol çəkməlidir. İnşallah yəqin ki, çəkər. Bir daha qeyd edirəm ki, Suqmayıt teatrının Valeh müəllimə ehtiyacı var, onun Sumqayıt teatrına o qədər də ehtiyacı yoxdur. O, bizim teatrda işləyib, bizim biletlərimiz ona görə satılıb. Onu işdən uzaqlaşdırmamışıq. Əmrini verib başqa formada əməkdaşlığa keçirmişik. O, bu teatrın aktyorudur və Allah nə qədər ömür veribsə, burada da işləyəcək”.    (moderator.az)