“Uğurun sirri” layihəsinin növbəti qonağı Şimali Kipr Türk Cümhuriyyətində yaşayan azərbaycanlı jurnalist Elza Alışova Dəmirdağdır. E.Alışova Dəmirdağ 1998-2006-cı illərdə Azərbaycanda “Üç nöqtə”, “Mərkəz”, “Vətəndaş Həmrəyliyi”. “Xalq Cəbhəsi”, “Cümhüriyyət”, “Yeni Müsavat”, “Bakı-Xəbər” qəzetlərində işləyib. “Azərbaycan Naminə” İctimai Forum və “Yeni Siyasət”  (YeS) Secki Blokunun Mətbuat Xidmətinin rəhbəri olub. “Seçici Qadınlar Liqasının” (SQL) sədri olaraq işləyib. Hazırda Şimali Kiprin Girnə Amerikan Universitetinin Eğitim fakültəsinin müəllimidir.

“Uğurun yaşı və başı yoxdur, uğurun nəfəsi var”

Elza xanım, uğurun rəngi, dadı, qoxusu, səsi, görüntüsü necədir və ona toxunmaq nə zaman mümkündür?

- Uğurun rəngi, qoxusu, səsi və görüntüsü fərdidir. Bu insanın yaşama fəlsəfəsi ilə bağlıdır. Hər insanın uğur anlayışı və bu uğura sevinmə şəkli özünəməxsusdur. Mənim uğurumun rəngi  yaşıldırsa, yəni mənə hüzur verirsə, sənin uğurun qırmızıdır, səni daha dinamik, həyəcanlı edir. Bəziləri qazandığı uğurda hüzur tapırsa, tam tərsi, digərlərini uğur daha həyəcanlı edir, daha çox qazanmağa sövq edir. İnsan uğur qazananda xoşbəxt olur və uğuruna qovuşur. Uğuru sadəcə qazanmırlar, həm də yaşayırlar. Uğuru  yaşamaq bu rəngi, dadı, səsi və qoxunu hiss edəndə meydana çıxır.

Deyirlər, yanlışlar olmadan doğrular tapılmaz. Uğursuzluq yanlışlardanmı doğar?

- Təbii ki, insan həyatı yanlışlar edərək öyrənir. Yanlışlar da yaşamaq üçündür.  Hər zaman doğru addım atmaq mümkün deyil. Mütləq deyil ki, etdiyin yanlışlıq uğursuzluq gətirsin. Bəzən bir yanlış həyatınızı dəyişə bilər. Olaylara fərqli pəncərədən baxmaq imkanı əldə edə bilirsiniz.  Digər tərəfdən doğru və yanlışı zamana görə qiymətləndirməyi daha doğru hesab edirəm. Bu gün doğru hesab elədiyin addım sabah sənə yanlış görünə bilər və ya tam əksinə. Doğrular və yanlışlar zamana bağlıdır və sadəcə bunu etdiyin zaman üçün keçərlidir. Türklər demiş, “fazla bu nöqtələlərə takılmamak lazım”, mücadiləyə davam eləmək lazımdır.

Apardığınız mübarizədə uğursuzluqlarla üzləşəndə nə edirsiniz? 

- Ruhdan düşməməyə çalışıram və olaylara fərqli  baxmağa cəhd edirəm. Yeri gələndə, uğursuzluqda belə uğur axtarmaq lazımdır.

Hər insanda bir istedadın olduğunu söyləyirlər, bunu necə üzə çıxarmaq olar? 

- İlk növbədə elm. Hər insan mütləq istedadlı doğulur. Hər kəsin bacarıqlı ola biləcəyi ən azı bir sahə mütləq var. Bizə düşən sadəcə bu sahəni tapmaqdır. Bunun yolu təhsildən keçir. Təhsilli insan daha gözəl analiz edə bilər. Təhsildən sonra isə özünü mütləq müxtəlif sahələrdə sınamalısan. Təbii, şans, zaman, məkan faktorlarını da unutmamaq lazımdır. Tarixdə və günümüzdə yüzlərlə belə istedadlı insanların şahidi oluruq. “İstedad varsa, mütləq bir yerdə çıxacaq” deyənlər də az deyil. Ancaq bütün bunlar təhsillə birləşəndə istedad daha qalıcı olur. 

Bəzi gənclər bir işə başlayanda “düşün, tətbiq et və nəticələndir” prinsipini unudurlar. Yəni, onlar düşündüklərini ya tətbiq etmir, ya da nəticələndirmirlər. Bu problemlə üzləşənlərə nə söyləmək istərdiniz?

- Doğru prinsipdir və mütləq əməl etmələri lazımdır. İnanmaq uğurun yarısıdır -  deməyiblər boş yerə. Əgər işə inanaraq başlayırsansa, artıq yolun yarısını qət etmişsən, deməkdir.

Qarşısındakına “əhəmiyyətlisən” mesajını verməkdə çətinlik çəkənlərə nə söyləmək istərdiniz?

- Təbii ki, hər insan əhəmiyyətlidir. Sevmək, əhəmiyyətli  olduğunu hiss etdirmək çox vacib bir məqamdır. Sevgi ilə çox insanın həyatını dəyişmək mümkündür. Özünü əhəmiyyətsiz hiss edən insanlar aqressiv olur, özünə və cəmiyyətə zərər verməyə daha çox meylli olurlar. Cinayətkarlar da təsadüfi deyil ki, məhz belə insanlardan yaranır. Bunun için ilk növbədə ailədə uşaqlara sevgi öyrədilməlidir. Sevgi sadəcə sevmək deyil, həm də qarşısındakı insana hörmət etməyi öyrətməkdir, onun fikirlərinə dəyər verməkdir.  

Ancaq bir şeyi də qeyd edim ki, insan qarşısındakı insanın fikrini də mütləq qəbul etməməlidir. Çünki insanlar sərt şəkildə tənqid etməyi çox sevirlər. Buna görə kənar fikirlərə sadəcə hörmət etmək lazımdır, bunu həyat prinsipinə çevirmək çox böyük yanlışdır. Başqalarını düşünüb uğur qazanmaq mümkün deyil. 

Övladınızın gələcəkdə uğurlu ola bilməsi üçün nə edirsiniz? Daha fərqli davrana bilirsiniz?

- Hər bir valideynin arzusudur ki, övladını uğurlu bir insan kimi yetişdirsin. Uğurlu insan ilk növbədə sevgini anlamalıdır. Övladıma ilk növbədə insan sevgisini anlatmağa çalışıram. Ailə, Vətən, Millət sevgisi bu sırada önəmli faktorlardan biridir. Mənim üçün önəmlisi şəxsiyyət olaraq yetişməsidir. Və bir də yaxşı təhsil verməyə çalışıram. 

Sizcə insanların ən güclü silahı nədir - ağıl, yoxsa ürək?

- Ağıl və ürək arasında seçim etmək ən böyük səhvdir. Elə etmək lazımdır ki, ağlın cəzasını ürək, ürəyin cəzasını ağıl çəkməsin. Mütləq bunların ikisinin arasında harmoniya olmalıdır. 

Uğurun yaşı olur, yoxsa başı, bu barədə nə düşünürsünüz?

- Uğurun yaşı və başı yoxdur, uğurun nəfəsi var. Nə qədər həyatdasınız, bunu hiss edəcəksiniz.

Fərqliliyiniz və fərdliliyiniz haqında nə deyə bilərsiniz? Nəyə görə Siz sizsiniz? 

- Hər bir insan fərqli və fərdidir. Bu isə onun psixologiyasına gizlidir. Yaşadıqlarımız bizi fərdli və fəqli edir.

Həyatın enini və uzununu ölçdünüzmü heç, yaşamı uzun edən nədir? 

- Çox şey yaşamaq, çox şey öyrənmək və çox gəzmək. Sağlam həyat tərzi, sağlam düşüncə və təmiz ürək. Ən önəmlisi isə sevgi. 

Əgər Sizə dünyada yalnız bir şeyi dəyişdirmək imkanı verilsəydi, nəyi dəyişərdiniz?

- Cahilliyi ortadan qaldırardım. Hər şeyin kökündə cahillik durur.

Həyat toplananlar, çıxılanlar, vurulanlar və bölünənlərdən ibarətdir deyirlər. Sizin payınıza ən çox hansı əməl düşüb? 

- Bunun cavabını vermək üçün hələ çox cavanam.

Bəs, Siz özünüz özünüzə dost ola bilsəydiniz, özünüzə Sizin kimi bir dost istərdinizmi? 

- Əlbəttə, istərdim. Çəkinmədən deyirəm ki, mən çox yaxşı dostam. Əgər illərdir, yanımda yaxşı dostlarım varsa, deməli, burada mənim də payım az deyil.  Məncə, dost olmağı bacarmayan insanlardan uzaq durmaq lazımdır. Dost olmağı bacaran çox az insan var.

Əgər uğurlu olmaq istəyənlərə gərəkli ola biləcək bir məsləhət versəydiniz, nə deyərdiniz?

- Məsləhət vermək qədər asan iş varmı görəsən bu dünyada? Təbii ilk növbədə sevgini öyrənsinlər. Dəyər verməyi, sayğı duymağı bilsinlər. Ən önəmlisi xəyallarının arxasınca getsinlər. “Mən bunu bacararam” devizindən vaz keçməsinlər.

Dəlinin doğru xəbəri nə olar sizcə? Dəliliyin gözəlliyi mümkünmü? 

- Bu dəliyə kimin və necə baxmasına bağlıdır. Dəlidə doğru xəbəri görənlər, nədən gözəlliyi də görməsinlər?

Hesab - kitab dəftəriniz var?

- Qısa qeydlər almaq üçün təbii ki, hər insanın kitab-dəftəri olur. Ancaq həyat hesabında kitab-dəftərim beynim və vicdanımdır. 

Təbliğ etdiyiniz gerçəklər hansılardır, necə düşünürsünüz sevginin təbliğata ehtiyacı varmı? 

- Sevgi mütləq öyrədilməlidir.  Sevgi ilə doğmaq, yaşamaq və onu təbliğ etmək lazımdır. Ətrafımızda təbliğ olunan o qədər zərərli şeylər var ki. Niyə sevgini təbliğ etməyək ki? Sevginin nə zərəri var? 

Yaşamaq və var olmaq arasında fərq nədir?

- Hər şeyə rəğmən yaşamaq gözəldir. Yaşamaq hər şeydən üstündür. Hər kəs var olur, ancaq hər kəs yaşamır. 

/azadinform.az/