Xəbər verdiyimiz kimi, dünən redaksiyamıza Murad Orucov tərəfindən şikayət daxil olmuşdu.

Biz də, öz növbəmizdə məsələni araşdırmaq üçün yollandıq Sumqayıt şəhər Səhiyyə şöbəsinə.  Yaranmış vəziyyətə aydınlıq gətirilməsi üçün şöbənin baş pediatrı Xalidə Quliyevaya suallarımızı ünvanladıq. Xanım Quliyeva da öz növbəsində məsələyə aydınlıq gətirdi:

“Əvvəla onu qeyd edim ki, Murad bəyin oğlu xəstəxanaya gətirilərkən vəziyyəti çox ağır idi. Artıq həkimlər mənə bildirirlər ki, uşağın vəziyyəti normallaşmağa doğru gedir və heç bir boğulma halına rast gəlinmir. Dərmanlar isə xəstəxananın öz dərmanlarıdır və ona heç bir dərman pulla verilmir. Düzdür, elə olur ki, bir dərman lazım olur, ancaq həmin dərman bizim xəstəxanamızın aptekində tapılmır. Ona görə də, valideynlərdən xahiş edirik ki, lazım olan dava-dərmanı özləri alıb gətirsinlər. Ancaq Murad bəyin oğlu Məhəmməd üçün əlavə dərman lazım olmayıb. Gündəlik nə lazımdırsa, onun üçün təmənnasız istifadə olunur. Hal-hazırda da cənab Orucovun balası tam nəzarətdədir və şəxsən özüm, o xanımı və onun balasını ciddi nəzarətdə saxlanılmasını tapşırmışam. Rüşvət məsələsinə gəldikdə isə onu qeyd edim ki, rüşvəti həkim yox, hansısa işçi ondan tələb edib. Tapşırmışam həmin işçi tapılsın və dərhal haqqında tədbir görülsün. Tapılması üçün isə ananın(şikayətçinin) özündən xahiş etmişəm ki, o xanımı bizə göstərsin.”

Deyilənlərin nə dərəcədə düz olub-olmamasını aydınlaşdırmaq üçün Murad Orucov ilə birlikdə yollandıq Sumqayıt şəhər Uşaq Xəstəxanasına. Səhiyyə ocağının baş həkimi xanım Arzu Ələkbərova da bütün deyilənləri təsdiqlədi. Hətta A.Ələkbərova bildirdi ki, “vəziyyətin bu həddə çatmasında ananın da öz günahı var. Belə ki, xanım Orucova uşağına həkim ilə məsləhətləşmədən uşağın səhhətinə uyğun olmayan yeməkləri verib.” Artıq xanıma onun balası üçün bütün xeyirli yemək və dava-dərmanların resepti verilib. 

Xanım Orucova ilə telefon bağlantısı saxlayaraq körpəsinin vəziyyətinin necə olduğunu və eyni zamanda deyilənlərin düz olub-olmamasını aydınlaşdırdıq. O da bizə onu bildirdi ki, “bəli, artıq mənə əvvəlkindən fərqli olaraq yaxşı baxırlar. Rüşvət istəyən xanım isə “rentgen” çəkənlərdən biri idi. Uşaq az da olsa, əvvəlkinə nisbətən yaxşıdır. İndi əvvəlkindən fərqli olaraq, az-maz yemək yeyir.”

/Xeberlent.az/