Sumqayıt şəhər İcra Hakimiyyətinin başçısı yanında Sərnişindaşıma və Nəqliyyat İdarəsinin rəisi Sultan Əsədov ictimai nəqliyyatla əlaqəli şəhər sakinlərini maraqlandıran suallara Xeberle.com-a müsahibəsində aydınlıq gətirib.

- Sultan müəllim, son vaxtlar Sumqayıtda ictimai nəqliyyatda yaşanan vəziyyətlə bağlı sərnişinlərin narazılıqları müşahidə olunur. Artıq havalar istiləşib, amma avtobuslarda soyutma sistemləri qoşulmayıb. Buna səbəb nədir?

- Deməzdim ki, bu sahədə ciddi problemlər var. Avtobusların demək olar ki, 70%-də kondisionerlər işləyir. Düzdür, bəzilərində işləmir xarabdırlar, onların da detalları xaricdən gəlir deyə düzəldilməsi vaxt alır. Biz avtobuslara gündəlik nəzarət edirik, sərnişinlər də kondisioner işləmədiyi halda sürücüdən tələb etsinlər. Bəzi hallarda sürücülər benzinə qənaət etmək üçün kondisionerləri söndürürlər.

- Doğrudur ki, şəhər Nəqliyyat Departamentinin rəhbərliyi sürücülərə yanacağı ancaq idarədən almağa və avtobusları məhz idarədə yuyulmağa məcbur edir?

-Yanacağı haradan doldurmalı olduqlarına biz qarışmırıq, bu barədə maraqlı da deyilik. Özləri haradan istəsə yanacaq ala bilərlər. Avtobusların yuyulmasına gəldikdə isə, böyük bokslar yalnız idarədədir, ümumi şəhərdə böyük həcmli bokslar yoxdur. Ona görə avtobuslar idarədə yuyula bilər.

- Sultan müəllim, ötən il Sumqayıtda ictimai nəqliyyatda nağdsiz ödəniş sisteminə keçildi. Amma bu uzun çəkmədi. Sərnişinlərə kartlar satıldı. Hələ də bəzilərində kartın balansında ödənişlər də qalıb. Artıq 2022-ci ilin birinci yarısını başa vurduq. Yenidən kart sisteminin tətbiqi niyə bu qədər uzanır?

- Paşa Bank avtobusların kart sisteminə keçməsində özü maraqlı olan tərəfdir. Çünki avtobusların krediti ödənilməsi üçün pullar vahid mərkəzə yığılsa yaxşıdır. Validatorlarla olan problemə görə gecikmə yaşanır. İndiyənə qədər çoxdan kart sisteminə keçilməli idi.

Xədicə Səxavətqızı

Xeberle.com